رد مشاركة : اسبوعا لكل عضو نعبر فيه عن حبنا....
إن شاء الله بونسوارين وشقفة وأحلى مورنينغ عند هالمسا.. والله شرفتينا يا آنسة فضولية 
اقتباس
بما أنه بلسمو فتحت سيرة الطفولة حابة كمان أسمع قصص قد ما بدك هو صح الطمع بالجامع بس مااااااا بقدر بما أنه أكيد لح يكونوا كلهم حلوين
طيب من عيوني..
مرة كنا عم نلعب طميمة ببيت جدي مع أخواتي وولاد خوالي وخالاتي.. إجيت حضرة جنابي وتخبيت تحت التخت.. بس مو هون القصة.. القصة إنو كان في شناتي سفر .. فحطيتن حواليي مشان ما حدا يشوفني.. وحطيت راسي ... ونمت
..
هالعالم صاروا يدورو عليي وينادوا لي بس ما حدا هون.. وعلى وينها البنت ولا تكون طلعت برات البيت ولا تكون ضاعت ولا شي.. صاروا يدوروا عليي برا وجوا البيت وما خلوا حدا من الجيران ولا البياعين حوالين البيت.. بعدين راحوا خبروا الجامع ونادوا عليي فيه.. وحضرتي شو؟.. نايمة... وتموا عهالحالة مدري أديش لحتى مالت الشمس وطلع معها خيالي من تحت التخت هون انتبهت وحدة إنو في حدا وتطلعت تحت التخت وإذ... نهى خانم نايمة ومروءة والعالم رح يجنو.. والله كان يوم ظريف
.. بس ظريف إلي مو إلن..
وقصة تانية.. "حاسة حالي حكواتي"
كنت وقتها بالحضانة وكنا ناقلين عهالبيت جديد وما بعرف حدا من الجيران.. يومها قالتلي أمي إنها رح تتأخر شوي بالشغل وأبي كمان رح يكون بالشغل وأختي كان عندها رحلة.. فطلبت مني إني استناها شغلة ربع ساعة أو نص ساعة بالكتير عند باب البيت أو البناية"وما أمنت تعطيني المفتاح".. وفعلا هدا اللي صار.. رجعت من الحضانة وقعدت عند باب البناية بس ما استحملت أكتر من 5 دقايق كان داء خلئي..ولقيت وحدة من الجارات مع بنتها طالعين على بيتن (بنايتهن بعيدة منيح عن بنايتنا ولو إنا بنفس الحي).. فرحت لعندها.. قلتلها "خالة بتعرفي وينها أمي".. "لأ حبيبتي مين أمك".... "فلانة"... "لا والله ما بعرفها ليش ماقالتلك وين رايحة؟"... "مبلا قالتلي بس تأخرت وأنا خايفة لحالي" –
مع إني والله لا خايفة ولا شي بس هيك
- .... "أي تعالي إذا بدك بتلعبي إنتي وبنتي لبينما تجي إمك"... "أي ماشي".. يعني ما بحب خجل حدا فطلعت معها ولعبنا بالجنينة شوي فقالت الأم لبنتها "ما بدك تجيبي رفيقتك مشان تاكل مجدرة؟".. "مبلا ماما.. تعالي معنا "... أنا سمعت كلمة "أكل"
فصرت بروح بكل سرور وخصوصي إني كنت ما بعرف شو هي المجدرة (وعلى قولة عزوز هوايتي الأكل
.. بس كانت مو هلأ).. رحنا عبيت الجماعة وأكلنا وكل شي تمام.. بعدها الأم حطت راسها ونامت والبنت شغلت هالتلفزيون وقعدت.. أنا حسيت عحالي إني تأخرت عالبيت وصرت هلوس بحدا عم ينادي باسمي.. فصرت قلها للبنت خلينا نرجع بتكون إجت أمي.. وهيي تقلي لأ لسه بتكون ما إجت .. بدها تخلص الفيلم اللي عم تشوفو.. المهم إنو كان المفروض تجي أمي عالوحدة... وأنا رجعت عالبيت مع البنت عالـ 4.5... مو محرزة مو هيك؟
.. هلأ هون بئى وصلت لعند بنايتي وإذ بلاقي جماعات من الناس .. واشرأبت الأعناق نحوي.. حسيت في شي مو طبيعي.. ليش كل العالم هون؟
.. وستي كمان هون.. وحتى أبي مع إنو ما خلص دوامو لسه.. فمسكتني أمي وطلعتني عالبيت وطعمتني اللي فيه النصيب
وهيي عم تبكي يا حرام..
طلع شو... أمي مخبرة ستي إنو تجي لعنا مشان ما استنى برا البيت بس أنا فركتها.. وجارتنا طول الوقت عم تقلها .. يي ما تكون انخطفت.. يي من كم يوم لقو ولد مدبوح
.. ومن هالحكي... ومخبرين أبي عالشغل إنو بنتك ضايعة.. وساءلين ابن جيراننا اللي كان معي بنفس الحضانة عني ومخبرن إني نزلت هون.. وكل ما يسألو حدا من الجيران عني يبعت ولادو يدورو عليي.. والهلوسة ما كانت هلوسة.. كانت صواتن وهنن عم ينادو لي.. ومخبرين الجامع بس قالن ليصير وقت الصلاة الجاية منعلن عنها.. ومخبرين الشرطة .. وشبعرفني الله وكيلكن قيمت الدنية وما قعدتها كرمال "المجدرة"
... النكتة بالموضوع إنو من وقتها المجدرة أطيب أكلة عندي... وولاد الجيران كلما حدا يشوفني مع أمي هلأ بهالعمر بيقلها.. مو هي نهى اللي ضاعت بزمانها ودورنا عليها؟..
يللا حاجة أكتر من هيك ما عاد ينكتب...
اقتباس
لما تعرفي أنه تقريبا أغلب يلي حواليكي هنن عالم عينهم ديقة و ما بيحبولك الخير و لو يصحلهم يخربوا عيشتك ما بيقصروا شو بتعملي ؟؟ (( مع العلم أنه الأكتر هيك و قلوا و دلوا يلي مو هيك يعني كتير قلال ان وجدوا للأسف )) بتتخلي عنهم كلهم و بتعيشي مبسوطة و لا بتخففي علاقتك معهم و لا بتتركي نهائيا ؟؟
هلأ شوفي.. إذا هالعالم هنن بنات من الجامعة.. فبلاهن أحسن.. يعني ببعد عنن قد ما بقدر وبخلي علاقتنا عالرسمي جداً.. وإذا اضطريت حاكيهن فبتصرف بكل ود وكأنو مالي دريانة بشي..
أما إذا قرايبين.. هون ما فيكي تتركي أو تتجاهلي.. ولما صار معي هيك شي تصرفت من مبدأ "ادفع بالتي هي أحسن فإذا الذي بينك وبينه عداوة كأنه ولي حميم".. يعني خليت تعاملي معن بمنتهى الرقة واللطافة.. وحسستن إني متل بنتن .. وحتى صرت اذكر لهن محاسن ولادن وأخلاقن الحلوة وإنو ما في منن.. وإذا انحكى عني بالمنيح قدامن ساوي حالي كأني مو موافقة عهالحكي وإنو في كتير عالم أحسن مني.. وهيك شوي شوي لحتى عنجد فرقت معاملتن معي كتير.. وصارو عنجد يتمنوا لي الخير متل ولادن..
بس إجمالاً الحمد لله ما بتصير معي هالقصص كتير لأنو دائماً وقت اتعامل مع الناس بحاول قد ما فيني إني اتصرف متلن وحاكين متل ما بيحبو.. يعني الكلمة عم تطلع وتطلع خليها تسعد اللي عم يسمعها أحسن ما تإذيه وتإذيني بالنهاية
اقتباس
لو قالولك في ألك أمنية وحدة فينا نحققلك ياها شو بتكون هالأمنية ؟؟ (( غير تحرير القدس طبعا يعني شي بيخصك ألك ))
إني اطلع مع أهلي عالحج
اقتباس
و نهنوهة أنا ما قصدت شي لما قلتلك عأنه ما تجاوبيني عنطاق دين و لا أنه بلا المشيخة الله يسامحك
ولا يهمك عزيزتي.. وأنا ما انزعجت بالعكس ضحكت..
اقتباس
شو البلد يلي بتحبي تسافريله ؟؟ و أكيد حتاخديني معك
دبلن "مسقط رأسي" ... لندن... اليونان وخاصة أثينا.. وما بروح إذا ما بتروحي معي.. ولو..
اقتباس
شو بتحبي تتعلمي لغات غير الانكليزي طبعا ؟؟
بصراحة.. ما بحب غير العربي والانكليزي.. بس إذا إجباري.. العبري
(لا تنصدمي) أو الاسباني
اقتباس
أسئلتي اليوم خفيفة ما حبيت تقل عليكي
لا شو تتقلي.. بالعكس والله.. انبسطت كتير بعودتك..
وإن شاء الله ربي بيوفقك وبيسعد سعادة الدارين ويفرج عنك كل هموم الدنيا والآخرة... ويطعمك كل شي فيه خير إلك
..
لكِ مودتي وتحيتي..
اسبوعا لكل عضو نعبر فيه عن حبنا....
.. شقية لأبعد الحدود 
.. 
.. 
