مرررررررحبن

بما أنه طُلب مني أحكي قصة من قصص الطفولة لح حاول تكون مهضومة شوي و الله يقويني

هاد يا شباب مرة أجت جارتنا الكريمة لعنا و قاعدة عم تحكي مع ماما كالعادة قصص طبخ و نفخ و هالسير المعتة و اذ

من ضمن السير بتقلها أنه و الله جارتنا يلي بالطابق الأخير في فوق شباك بيتهم عش دبابير و ما عم تسترجي تفتح شباكها خوفا من أنه شي واحد يفوت و يقرصهم بالبيت

فوفو سمعت هالخبرية و دبت فيني الشهامة و الحماس كالعادة و دقيت عصدري و قلت :

يا باااااااطل  معقول فوفو موجودة و تخلي الدبابير تزعج صفو و هناء جيرانا الأكارم  
كلا و حاشى

طلعت و الله من البيت و ما كذبت خبر
دقيت عولاد الجيران و قلتلهم شو يا شباب كفو نقتل الدبابير يلي فوق و ما حدا كذب خبر (( بتعرفوا في بنات فكل واحد من بيناتهم بده يعرض عضلاته شكل و يفرجينا مرجلته و هالحكي هاد كنت شي صف سابع تامن هيك شي يعني كنت بعدني فرتوكة و شغل حسن صبي  ))

و الله حملنا حالنا و طلعنا عأسطوح البناية و حملت كل واحد من بيناتهم عصاية (( لكن بدرعهم قبل القيام بالمهمة  )) مشان يضربوا العش و يوقعوه عالأرض يعني لتحت البناية و خليتهم يجيبوا مازوت مشان يحرقوه (( ذكية الله يحميني   ))

بس و حياتكم ما خليت حدا يبلش معقول أنا لازم أضرب ضربة الافتتاحية و حملت العصاية و قلت ياااااااااااااااا رب

أنا ضربته من هون و انكسر العش من هون و لك المصيبة أنه ما وقع بس انكسر  

يعني فُتح من الجهتين و صارت المعركة مفتوحة الأطراف

و أنا شفت هالمنظر ((  و باعتباري من الأفراد الكارهين للحشرات   ))  قلت يا ايدكم شحطت بنت جيرانا و تخبينا (( لكن أصيلة ما بهرب لحالي  ))

و الصبيان عأساس مراجل و ما بدهم يهربوا و بلشوا يا حرام هنن يهربوا و الدبابير يلحقوهم
هههههههههههه
قسما بربي منظر أنا قاعدة و دموعي صاروا عالأرض من كتر الضحك

نزلنا لتحت و كل واحد مقروص من ئرنة و شوفوا أشكاااااااااالهم
واحد عينه حمرا و التاني طلعله خد تاني فوق خده و التالت عم يعرج من رجله عم قلكم منااااظر 

يعني صح خلصت المعركة بالانتصار السحيق لشلتنا الأبطال بس كان في تمن على هالشي و هو كل شوي تيلفون من الجارات و بهدلة مدللة عالشي يلي صار لولادهم
هههههههه

و بدكم تشوفوا منظر أمهاتهم مصعوقين هيك     

بس آخر شي يعني تزينت القصة بكم دعوة حلوين من جارتنا يلي صارت تنعم بالهواء العليل مع أشعة الشمس الذهبية    

و توتة توتة خلصت الحتوتة حلوة و لا فتفوتة ؟؟


ان شا الله تكون غيرت و لو شوية جو 

من ناحية تعذيب الحيوانات  كانت طفولتي مزدهرة  لانو شكلت مع ولاد الحارة شلة
وكان النا بنامج ومواسم ومسابقات

مثلا  صيد الفراشات
صيد البابير 
صيد الفئران والقطط
*********************8
واعتبار كنا أريبين من سكة القطار كنا نضارب القطار بالحجارة
**********************88


بس كانت أفضل لعبة بالنسة الي هي
انو ندق الجرس والباب لشي بيت ونستنا ليفتحوا بعدين نهرب

أبو حسن

صبااااااااااااااح الخير للكل و أخص بذكري الناس الرايئين 

صراحة حبيت أضرب عصفورين بحجر واحد

أول قتيل قصدي عصفور هو أني حأحكيلكم قصة يمكن تكون غليظة و صغيرة بس دايق خلقي و قلت بتسلى و بسليكم شوي

تاني صرصور قصدي عصفور    أنه حضرات جنااااااابكم    بتحكولنا قصصكم يعني من كل هالموضوع طلعت الشريرة الأكبر و هذا لاااااااااااا يصح 

طيب لح بلش

يا اسم الله

احم احم

هاد يا سادة يا كرام أنا لما كنت صغيرة كنت كتيييييييييييييير مو عفريتة    و كان عندي بنت عم أكبر مني بسنتين (( تقولوا هلأ ئلوا على أساس    )) و هي كمان مالها قردة بالمرةةةةةةةةة

مرة كنا عند تيتة سهرانين العائلة الكريمة مجتمعة شي 70 نفر و قلة بركة 
لا طبعا عم أمزح أقل بكتير و خاصة أنه كانوا بنات عمتي غير متزوجات أو متزوجات حديثا ما بتذكر (( لأن كل وحدة عندها عر ولاد يخزي العين ))

شدتني بنت عمي اللي مو قردة    و نزلتني معها عالحارة و كانت وقتها شي الساعة 12 بالليل 

مالكم بطول السيرة

كانت هي الأخت مشتركة بالبيان الفني بالمدرسة و بالبيان الفني بيعلموهم القردنة اااااااصدي الرقص على أغاني هيك شغل جنان و هالحكي كنت أنا يمكن شي صف تالت و هي سادس أو هيك شي

المهم جارها لتيتة أم ئدري    عنده سوزوكي قام بنت عمي مشان تحلا السهرة شحطتني لفوق معها و صارت بدها ترقص  عالسيارة 

أي أي لا تستغربوا بدها ترقص هالفهمانة بنص الليل و العالم نايمة

طلعت و سايرتها 

و بلشتلكم و الله لا يوريكم 

بدها ترقص خبطة آدم كون عالأرض ....... الخ (( أكيد بتعرفوها    ))

و هالرقصة كلها تدبيك بالرجلين    و بنص الليل

و بلشت على خلع قصدي على دبك 

بعد شي عشر دقايق بلشت الأضوية تبع الجيران تشعل    و بعد ربع ساعة من الدبك المتواصل و هاد كله و هي عم تحاول تعلمني خبط برجليي قصدي أدبك معها

طلع مين يا حزركم ؟؟

أيوااااااا

طلع صاحب السوزوكي 

و هاد الزلمة معروف انه مبوجئ يعني شاضوم يعني ما بعرف فسرها أكتر 

و بلش خناء و هو بيته آخر طابق

نحنا هربنا أول مرة تخبينا بالمدخل تبع تيتة

و استمرت العملية لمدة نص ساعة على خدني جيتك يطلع نهرب يفوت نرجع و هلم جرة

الى أن

و هنا كانت القاضية













نزل بنص الليل بملابس النوم    و ركد ورانا

هههههههههههه

نحنا طلعنا عم نزلغط عالبيت و أكلنا وقتها شو خنائة محترمة حرمت قرب فيها  بعدها عحارة تيتة 

و هيك صار

ان شا الله كون ضحكتكم و لو شوي

ناطرة تضحكونا كمان بهالوقت العصيب 

يللا سلامااااااااااااات     

عودة اخرى لرحاب موضوع الطفولة

لتذكر ت اليوم ايام لما كنت صف تالت بهديك الايام كنت متعلم لعبة جديدة اسمها ( دئة رجل)

أكيد الاغلبية بيعرفوها ولما اتعلمتا حبيت علمها لولاد جيرانا وكان منهن واحد اسمو
كريم واول ما علمتن ياها كان دوري لدء رجل واحد منن وطلع كريم بخلئتي

ومسكتو من اكتافو وئدحتوا ضربة ع رجلو وئتا انكسرت رجلو وجبرولو ياها مع انو كان كريم اكبر مني بس كنت هاري نعمتو ئتل

ئصصي مع كريم ما خلصت هون اتنوعت من تلزيئ علكة براسو ايام علكة ما وكلي

وخبر الله رافسو من درج بيتنا وامخلية ينزل كرفتة ع راسو

كمان بتذكر معاناة عمتي لما كانت العيلة تجتمع عندها صحيح كانت عمتي اتحبني وادللني خير الله بس كان هاد الدلال ع حساب اولاد عمي

يلي كانو ايغارو مني وانا منشان اكسبهن لصفي كنا نتفئ انو لما انروح من عندها باخر الليل نسحب باشون الكهربا من الساعة ونطفي الكهربا ع عمتي

وكنا انجيب ئانيني الكتشب ونمسح فيهن حيطان بناية عمتي


بس عن جد برد بئولها مرة تانية قسماً بالله انو كنت ئادمي بصغري والله عم احكي جد

أهلا و سهلا أستاذ عزوز

احم احم