شو مشان أنو في فكرة
ومافي فكرة
شو مشان أنو الفكرة مقدسة
ياسلام ماأحلى هالصقعات أنا بموت فين
بجوز أنا فصلت وخلص شحني
أو بجوز عم فرغ شحن وأحكي...
أو يمكن نمت وعم كوبس
أو عم شوف فلم رعب
أمانة لاتواخذوني
سترو ماشفتو مني
سلام

الطاقة الجنسية من أكتر الطاقات سلبية يلي بتعود بالضرر الكبير عجسم الانسان وخاصة إذا تراكمت وتراكمت دون تفريغ بالطريقة الشرعية وهي الزواج لأن بصير الواحد عندو احتقان وبتستوحز هالفكرة عتفكيروا وبتاخد مساحة من عقلو وبتنتشر متل مرض السرطان...ومن الضغط العقلي و النفسي والجسدي بطق شرايينو!
بجوز تقولو ألها حل بالرياضة و بالصوم وبالقرآن وبغض النظر وبالصبر والإيمان...وأنا بقلكن صح مااختلفنا بس هالحلول مؤقتة ومانها جذرية لهيك أنا بشوف أنو الأفضل للتخلص من هالطاقة السلبية هوي الزواج لمبكر للحفاظ أولا:عالدين بالبعد عن الحرام،ثانيا عصفاء العقل وصحة الجسم وضمان سلامة النسل.
بس بهالأيام صارت الشباب مضطرة تفكر بالزواج المتأخر لأن أهل البنت والبنت مابفكرو إلا بالزواج تبع السبع نجوم...يعني ربو بنتن عأنها تفكر بالسيارة والطيارة والألماس والبيت العشر نجوم قبل ماتفكر بتدين هالانسان وبأخلاقو وبعلمو وبصفاتو...لأن صار الأهم عندن بهالوقت هو شي اسمو المال..(للأسف).

.......
هامش:
قال النبي صلى الله عليه وسلم:
(من أتاكم من ترضون خلقه ودينه،فزوجوه،فإن لم تفعلو تكن فتنة في الأرض وفساد عظيم).
ماني ناكر حقوق المرأة الشرعية من مهر ومسكن شرعي وخلافو..لكن يجب مراعاة المقدم على الزواج كل شخص عحسب إمكانياتو...وخلي الأب يتذكر وقت كان بعمر الشباب..ويحط حالو محل يلي جاي يطلب بنتو...وخلي الأم تزرع ببنتها القيم والمبادئ والأخلاق وأنو الزواج مانو بيع وشري ومانو مصاري.
أنا مفكر أتزوج عبكير بس يصير عمري خمسين لأن طلبات هالأيام بدها وقت وبدها تأمين.
ماحدى يقلل من أهمية الفكرة ويستسخفها ويستثني حالو ويقول أنا ملاك..لأن أنا عم أطرح فكرة علمية فيزيولوجية...ناتجة عن مشكلة اجتماعية أو بالأحرى مرض اجتماعي.
وماحدى أنو يفكر أنو قصدي من الزواج بس المواضيع الجنسية لأن بالنسبة ألي ولكتير غير الزواج هوي استقرار روحي ونفسي وجسدي..وتحمل مسؤولية وبناء أسرة صالحة ورسالة حياة.

فكرة الإنهزامية من الأفكار يلي بتقضي عالنفس البشرية وبتموتها وبتقضي على شي اسمو استمرار وإبداع.
ياناس لبقى تفكرو بالإنهزام وأنو حانخسر أو حنام ولو صفر بالمية ودائما فكرو بالنصر عفشلكن وإحباطكن ومشاكلكن وأعدائكن...
وأفضل دوا لمواجهة الإنهزامية الإيمان برب العباد...وأنو تكون دايما المعنويات بالأمل مرفوعة والهمم مابتهاب.
‏........
هامش:
عنجد بطلو انهزامية وحاجتكن تفكير تافه...بأنو بجوز يبقو...ونحنا خالص.
افهمو بقى افهمو...عدى زمن الإنهزام والناس المنهزمين.

فكرة النصيب فكرة مقنعة بس أحيانا بتكون مؤلمة لأن بيجربنا نقبل فيه غصب عنا وغصب عن  إرادتنا ومشاعرنا...لأن النصيب أقوى مني وأقوى منك وأقوى من كل البشر لأن سيد النصيب هوي القدر يلي لا منو مفر..... ولا منو مهرب.....
............
هامش:
الله يوفق وييسر....ويسعد...اعتراضنا لابقدم ولابأخر...

أتعجب كثيرا من الناس الذين يقدمون و يقترحون و يستنبطون

المصطلحات و المسميات و التعاريف و المفاهيم

في الوقت الذي عجزوا فيه عن تقديم مفهوم عام

يختصر العنوان الكبير لحياتهم الخاصة

أو - على الأقل - رسم الاتجاهات على خريطة أيامهم

ياجماعة لحد هلأ مابقى تعرفوا أنو في فرق من السما للأرض بين شي أسمو دين سماوي وبين شي أسمو تطرف(تشدد)...
تفاجأت من خلال اطلاعي عردود أعضاء بمواضيع معينة... محسوبين عطبقة المثقفين يلى عأساس عندن اطلاع وعقلن عأساس بيشتغل بآلية التحليل والتركيب أنن بيخطلوا بين التطرف (التشدد) والدين...
لك ياجماعة
الإسلام شي والتطرف شي
المسيحية شي والتطرف شي
اليهودية شي والتطرف شي
لما بكون في شخص متطرف غلط تسميه مسلم متطرف أو مسيحي متطرف أو يهودي متطرف...
المتطرف(المتشدد) شخص لاينتمي لأي دين سماوي...لأن ألو دينو الخاص..وهاد شخص لايمثل إلا نفسو...ولايشوه إلا صورتو....وفهمان تعاليم دينو غلط..
الأديان السماوية معروفة بسماحتها وتيسيرها وفضائلها...وهي لاتتأثر ولاتتشوه صورتها من خلال ناس لاينتسبون لهذه الأديان إلا بالوراثة...ولكسب مصالح دنيوية.
...............
هامش:
عفكرة الهجوم من خلال الردود ومن خلال آراء الناس عم يكون عالدين ماعالمتطرفين وخاصة عالدين الإسلامي لأنو دين سماوي وتشريع رباني متكامل ينادي بالفضائل.....ودائما بحاولو يرسخوا فكرة بأنو الإسلام يعني التطرف(التشدد) وبأنو كل مسلم متطرف وكل متطرف هو مسلم يقينا!!

هلأ عنجد وين الغلط إذا حاكا الواحد حالو ولي بقولوا عليه مجنون؟؟؟
وين الغلط ووين الجنون بالموضوع؟؟
إذا الواحد بيحمل جواتو تلت أشخاص....الأنا العقلي...والأنا القلبي (العاطفي)....والأنا المتوازن بين العقلي والعاطفي.
شو  المانع إذا تحاور الأنا العقلي مع الأنا العاطفي علانية بس بدون ماحدى يشوفو(بينو وبين حالو) وحكم بيناتن الأنا المتوازن.؟
‏..........
هامش:
كأن جن صاحبنا أما لساتو بعقلو ههههه يمكن جن!
‏
تحياتي لكل الزوار

وبعدين آه.....كل يلي عم انعمل لهلأ شو قدم وشو أخر؟؟
بالعكس بسببو كلشي زاد لهيك يكتر خيركن....وكترو من الهديا....قد مافيكن بس
إن غدا لناظره قريب....وإذا ما أجا بكرى جاي بعد بكرى....وحانشوف.
لاتديرو بالكن عحالكن بنوب وخليكن عيلي أنتو فيه أمانة.نحنا ناطرين بس أنتو لاتنطرو.