رد مشاركة : اسبوعا لكل عضو نعبر فيه عن حبنا....
السلام عليكم ورحمة الله وبركاته...
بس لآخد نفس عمييييق... وهلأ منبلش نحكي..
حابة بدايةً إني اشكر د.ماجد عهالتقديم الحلو والكلمات اللطيفة يلي ان شاء الله كون محققة نصها..
وولا يهمك.. بإذن الله كل الأسئلة رح تكون عبارة عن تعبير حلو عن محبة الأعضاء بس بأسلوب مختلف.. وبإذن الله سأسعد بأسئلتكم..
نبلش باسم الله الرحمن الرحيم...........
بلسم الآلام.. رفيقتي الغالية والأحب على قلبي.. والله انبسطت إنو الافتتاحية كانت بأسئلتك.. يعني استفتاحية مباركة.. وطمنتيني إنو مو دورات.. يللا نقول يارب
اقتباس
السؤال الأول:
شو الشي الموجود بحياتك ومابتستغني عنو أبداأبدا؟
شي معنوي.. الإيمان بالله ورحمته والتوكل عليه.. لأنو بدونن كنت متت طقيق من زمان
شي مادي.. أهلي بالدرجة الأولى.. ومن بعدن إنتي (عيشي بهالنعم)
اقتباس
السؤال التاني:
بعد دخولك كلية الصيدلة هل حسيتي إنو تغير تعامل الناس معك يعني صارو يدايقوكي ويسمعوكي حكي عن دراستك وكليتك أكيد فهمتي شو أصدي بالسؤال((طبعا هالسؤال عم اسئلك ياه من خلال تجربة لأنو بعتقد معظم الطلاب أكيدصار معهم هيك شي))؟
إييييييه.. أي والله ما بيخلى الأمر.. يعني سبحان الله في عالم عينها ضيقة وما بيرضيها إلا يلي بيملكو غيرها.. واللي بيقهرك إنك كنتي مفكرة هالعالم بيحبوكي وبينبسطو إذا حققتي شي نجاح..
بس كمان من جهة تانية في عالم تغيرت معاملتها بطريقة تانية... يعني زاد احترامن إلي وصارت كلمتي تنسمع يا مخلوقة.. الحمد لله على كل حال.
اقتباس
السؤال التالت
شو هي أسعد لحظة بحياتك وشوهي أحزن لحظة؟
أسعد لحظة 12/12/2009 الساعة 6 .. بتتذكري.. يعني مو بس سعادة على قد مو هيي راحة..
24/10/2009 .. يوم اللي رحنا هداك المشوار عالشام القديمة مع مرهمو ووالدتها.. والله لهلأ بحسو متل منام حلو مريت فيه.. إن شاء الله بينعاد قريباً جداً..
يعني في لحظات حلوة كتير غيرن بس هدول أحدث شي
أحزن لحظة.. يوم وفاة زميلنا أيهم السنة الماضية.. ما عم يروح من بالي هداك اليوم.. الله يرحمو ويصبر أهلو..
اقتباس
السؤال الرابع
دموعك على شو بتذرفيها ولمين ؟
الصراحة .. دموعي غالية عليي كتيير.. وما بحب شوفها..لهيك نادراً ما ابكي.. بس بتنزل عادةُ بلحظات الخشوع وكل شي إلو علاقة بالصحابة والأنبياء ومعاناتن.. أو برضى الله وكرمه وعذابه وعقابه.. مو بإيده الواحد ما تدمع عينو بهيك حالات..
لما بالحياة العادية.. بتنزل لما حس بالقهر.. إحساس فظيع جداً.. لما الواحد بيحس قلبو من جوا عم يحترق ومو طالع بإيده يعمل شي .. وهالإحساس غالباً بينجم عن ظلم سواء ظلم البشر أو ظلم المجتمع.. الله لا يدوقه لحدا.. لأني عنجد دقته..
لمين؟.. ما فهمت!!.. بس عكل صدقيني ما حدا بيستاهل تنزلك دمعة مشانو إلا إذا كان عنجد غالي عليكي.. يعني لكل الغوالي وعليهن..
اقتباس
السؤال الخامس
شو قصة حد قليل لبن كتير هادا إذابدك مسامحتك بالجواب عنو
هون بئى يا غالية بتسمحيلي قلك .. العين تطرقك إنتي واللي حكتلك
.. بس لعيونك بلسمو.. فضيحة وماكانت..
هدا ياجماعة الخير.. كنت أنا وأختي بالسوق القريب من بيتنا.. اشترينا اللي بدنا ياه وما خلينا غرض يعتب علينا.. ونحنا وطالعين عالبيت (مشي) مرقنا من ناح بياع الفلافل.. قام شوو.. بعد هالتعب طيبة الفلافل.. واشتهيناها.. طلَّعت لشوف قديش باقي معي مصاري لقيتن 70 ل.س. فحسبتها.. إذا السندويشة بـ 15 ليرة وأنا بدي جيب إلي ولأخواتي يعني 4 سندويشات.. 15 x 4 = 60 .. أي كتير منيح.. بيكفو..
فتنا عهالمحل وبكل ثقة "لو سمحت بدي 4 سندويشات فلافل".. "تكرمي".. وأثناء لف هالسندويشة العظيمة.."لو سمحت بالله يا ريت تكتر لبن".. "أمرك"... "أي ومن بعد إذنك قلل حد".. "طيب".. هوي حسيتو للبياع انئرء مني بس طنشت..
وعطاني هالسندويشات وعطيتو 60 ل. س. عدا ونقداً.. وإذ.. بيقلي.. عفواً هدول ناقصين.. هدول حقن 80ليرة.. قلتلو ليش قديش حقها قال 20.. هون حسيت سطل مي باردة انكت على خلقتي.. فعطيتو ال 10 البقيانة معي وتطلعت بأختي ومالي عرفانة شو بدي أعمل وصار وشي أحمر متل الدم على قد ما استحيت.. فانتبه البياع وقال لي خلص مو مشكلة بعدين بتعطيني الباقي.. أخدت هالسندويشات وأنا متمنية تنشق الأرض وتبلعني عهالموقف البايخ .. والله لو تميت ساكتة كانت نص مصيبة .. بس شو.. قعدت عملت معلم عالزلمة وصار بدي ياها "قليل حد كتير لبن".. خرجي بستاهل.. بس كان موقف لاااا أحسد علييه... تنذكر وما تنعاد
وهي هيي كل القصة.. روقتي خانم.. احفظيها كرج ومرج وعالمقلوب..
اقتباس
السؤال السادس
الوحدةوالانعزال شو تعريفها عندك
إنو يحب الإنسان تكون عيشتو لحالو بعيد عن كل البشر.. أو يساوي عالم مصغر حوله وبينعزل فيه عن العالم الحقيقي.. وبظن هالصفة مو حلوة أبداً بالبني آدم.. لأنو بالنهاية بيصير أرنب وبيخاف من البشر وحتى بينسى طريقة التعامل مع الغير.
اقتباس
السؤال السابع
شو أكتر أكلة بتحبيها وشو أكتر مطعم بتحبي تروحي عليه
ممممممممم.. سؤال بيحير
.. أكيد الكبة بأنواعها وخصوصاً المشوية ... والشاكرية والمجدرة والرز ببزاليا.. وإجمالاً طبخ البيت أكتر من اكل السوق
..
أكتر مطعم.. ولو.. ليش أي مطعم بيحوينا دائماً.. شووونيييز.. بس لأنو إلنا ذكريات فيه.. وكافتيريا بسام(ولو إنو إلي زماان ما رحت عليها.. لازم نشد الهمة).. وفي مطعم بعين الفيجة نسيانة شو اسمو..
اقتباس
السؤال التامن
بدي جواب بصراحة مين أغلى عندك رفقات المدرسة والبكالوريا ولا رفقات الجامعة؟؟؟؟؟
والله وبكل صراحة.. رفقات الجامعة طبعاً.. قبل الجامعة ما كانت بتهمني كتير شغلة الرفقة لأنو ما لقيت الرفقات يلي عنجد تعجبني أخلاقن الطيبة.. والحمد لله يلي جمعني فيكن
اقتباس
السؤال التاسع
مين أغلى إنسان أو إنسانةعندك بهالدنيا طبعا بعد إخواتك وأهلك ووالدتك الله يخليلناياها ؟؟
من الرفقات إنتي ونور والمرهم الشافي
من الأهل ستي (الله إلهي يخليلنا ياها ويبارك بعمرها لأنو عندي ياها بمعزة أمي)... وبعدها خالي
اقتباس
السؤال العاشر
شو أكتر موقف انصدمتي فيه بحياتك؟؟
في كتير مواقف .. بس غالباً بتكون الصدمة من شخص معين.. يعني بتكوني بتعرفيه شكل وبلحظة بتنكشف أخلاقو قدامك وبتلاقيها عكس ما بتعرفيه.. وهدا اللي صار معي لما بالصدفة عرفت حقيقة وحدة من البنات اللي كنت مفكرتها خلوقة .. طلعت عكس هيك..
والله يا بلسمو عصرت مخي لاتذكر شي موقف محدد وما طلع معي غير هداك الموقف يوم اللي غوطنت البنت.. ومو خرج ينحكى
اقتباس
السؤال الحادي عشر
إنتي بتسامحي بسرعة ولا بتتأخري شوي لتسامحي وشو السبب يلي بيدفعك إنك تسامحي يلي حولك مهما كان غلطهم كبير معك؟؟؟؟
سألتي وجاوبتي.. لأ بسامح بسرعة أكبر ما بتتصوري.. يعني قد ماكان الشخص غلطان معي أو زاعجني.. كلمة اعتذار وحدة بتطيبلي خاطري وبتنسيني انزعاجي.. وبسامح.. بس هالشي ما بينسيني إنو هدا عمل هيك.. مو مشان احقد لا سمح الله.. بس مشان أعرف كيف بدي اتعامل معو المرة الجاية.. مشان ما يصير فيني.. الفهيم ما بيوقع بالجورة مرتين.. يعني من باب الحذر مو أكتر..
السبب يلي بيدفعني لهالشي.. والله ما بعرف.. بس ما بحب ازعل من العالم أو زعلهم مني.. كمان حديث الرسول عليه الصلاة والسلام "التمس لأخيك بضعاً وسبعين عذراً" .. بقول يمكن لحظة غضب وطلعت فيني..
اقتباس
السؤال12
بلسم الآلام شوبتعنيلك بدي جواب صريييييييييييييييييييييييييح وإلا...................
احم احم...
بلســـــــــــــــــــــــــمـ الآلام 
هيي البنت يلي الله كرمني برفقتها وتفضل عليي إنو جمعني فيها قبل ما افقد ثقتي بفكرة إنو الصداقة الحقيقية موجودة .. وبوجود صديق حقيقي الإنسان بيشعر معو بالسعادة.. يعني ما شاء الله عنك.. بتستاهلي إنك تكوني قدوة بأخلاقك الحلوة الفاضلة... الله ينفعنا من بركاتك حجة
على فكرة.. الشي يلي خلاني بالبداية ارغب برفقة بلسم هو إني دريت إنها قرايبة الدكتور راتب النابلسي.. وعالمعاشرة لقيتها مو بس بتقربو بالاسم.. كمان بالأخلاق.. بعدين صار في شي أكتر حببني فيكي وهو شخصيتك وليس نسبك..
اقتباس
بكرا إن شاالله راجعة بأسئلة كمان جهزي حالك
يا مية مليون أهلا وسهلا ومرحبا .. بانتظارك وبانتظار أسئلتك اللي ما بتجيب الجلطة..
أسعدتيني بهالأسئلة الحلوة.. مشكوورة خانم.. جهزيلي حالك عبكرا
اسبوعا لكل عضو نعبر فيه عن حبنا....
,.....لانو ما شاء الله اسئلتهن كانت كتييييييرة ووافية... 
