القاموس الشامي

متل ماعودتكون وبعد نجاح السلسة الشهيرة (القاموس الحلبي)
قررنا إصدار القاموس الشامي وهو يباع حصرياً من وكلاء منتدى الجامعة
انشالله يعجبكون  بعد هالتعب  (قصدي أنو ملطوش يعني تعبت لحتى لطشتو مو لحتى جمعتو) منشان ما يروح فكركن لبعيد.

· شاضومة

تعبير مؤنث لا مذكر له يفيد كون المرأة غير مرتبة وليست من الأكابر وتحب الكلام غير المنمق وكثرته


· شرنه

(إنظر الشرح في تفسير مصطلح شاضومه )



· ملحو على ديلو

يعني لا يقيم وزناً للعشرة والخبز والملح


· يلي ببلي بالك

كناية عن أمر يتعذر ذكره


· معصمص

نحيل بارز العظام صغيرها


· يا إيدكم!

تعبير عن الهرب من شيء ما بسرعة


· زمق

أي هرب ببراعة وحذق، وزمط شرحو


· سرّي مرّي

أي جيئة وذهاباً بشكل متكرر إلى حد الغلاظة وتتبعها أحياناً أو تنوب عنها (خدني جيتك) و(كيلي ميلي)


· حط بالخرج

أي لا تعبأ بما يقال


· على قفا مين يشيل

كناية عن كثرة الشيء وشيوعه و(قابر القنى) مثلها


· مأنّف

يعني لا يعجبه العجب ولا الصيام برجب


· فش نيعو

يعني انتقم منه شر انتقام وهي بالحلبي: يفشر حنكو


· أزّت نفسو

أي نفر من الشيء نفوراً كأنه رأى صرصوراً


· جفص

صفة للجلف غليظ الروح


· حنتر

أي "تيّس" و"بوزم" في الوقت نفسه


· طلع من عيونو عامص

يعني دفع ثمناً غالياً وندم على ما نال


· كل طلقة براحة

أي يقوم بالشيء رويداً رويداً بين الفينة والأخرى


· يلي بدو يموت يوصّيك بولادو

ذم بصيغة المدح يعني أن المذكور غير أهل لحمل المسؤولية


· على كراريت حلقو

يعني مصاب بغثيان شديد وإقياء لا يستطيع كبحه لا بحلال ولا بحرام


· لا تكرّك عليه

يعني لا تلح عليه إصراراً


· قلبه عميقول حق بق (نسيت قلكون القاف تلفظ مخففة يعني آاف)

يعني أنه يريد أمراً بشدّة لكنه يضمره إضماراً ولا يظهره إظهاراً ( مشان ما يزعل سيبويه)


· لحم السير عالقبقاب وصاروا المبغضين صحاب

مبينه وما بدها شرح


· يلي بيجي منمدلّه فرشة ويلي ما بيجي منرتاح من وشه

مثل نسائي بحت يفيد عدم الترحيب بأشخاص معينين ما عم يجوا أصلاً


· شو هالتجرة

يعني الأفندي ما عجبته هالحكاية كلها وحاسس إنو تعبو ذهب سدى أو أدراج الرياح (كمان مشان سيبويه الله يرحموا)


· وحياة خالقك ماني مفارقك

تعبير يفيد غلاظة المتكلم وتغالظه على المتكلم عنه ويتبعه عادة: مومحبة فيك بس بدي دايئك


· العين الطرّاءة

عبارة عن التمسخر على المتكلم عنه وأن لا شيء فيه بينحسد عليه


· بيقطش وبيلحش

يعني المهذار كثير الهفوات ومن يهرف بما لا يعرف ولسانه يسبق عقله


· ولي على كسرتو

تعبير يفيد التحسّر على شخص ما مع لومه على ما فعل (في تناقض، مهيك؟)


· كـــــــن

بكسر الكاف وتسكين النون يعني اهدأ أحسنلك


· كروج

يعني درمل، وبتعبير أفصح افرنقع من هنا، وادحال مثلها


· فــز

كمان بكسر الفاء يعني قوم (أوقف وانت بتكلمني)


· جماش

أي همجٌ رعاع مستجحشون


· مصطهج

يعني مسلطن، مكيّف، مبسوط أو كما قال سيبويه: منتشي



جميع حقوق الغسيل والنشر محفوظة

يعطيك العافية

عنجد هالمعاني و التفاسير كتير مفيدة

بس اللهجة الشامية ما في أحلى منها
   
   

يسلمو ايدك فعلا مزبوطين
ههههه شكرا كتتير لك     

Rose 8    شكراً يازهرة المنتدى على مرورك ويسعدني أنك أول من يرد على مواضيعي وفعلاً مافي أحلى من الحكي الشامي.

Lovely face    ما أروع من إطلالتك بمواضيعي شكراً لمرورك الأكثر من رائع

بس لو اضمن انو الزملاء بالمنتدى

عندهم المام بالغة السنسكريتية

كنت نزلت القاموس الحوراني

بس مالكن مصلحة

للقوة هيبتها انت عندك عندك ردود فلجى


انا عندي كلمة شامية بس شو معناتا يلي بيعرف يحكي

تتحورئي



تحيتي

أخي الرائع ماهر   مقولة في احلى من لغة الحوارنة لحتى عم تقول عنها سنسكريتية مع اني ماني من هديك المنطقة بسبيكفي اني سوري وبحب أرضها وسماها وشعبها

mbk شكراً لمرورك اللطيف   أما معنى كلمة تتحورئي (مو تتحورني) تنمحقي ولاتسألني أكتر من هيك لأنو مابعرف

معسل تفاحتين :


الموضوع كتير حلو وبشكرك علي عالأقل لأني شامي


          مشكووووووووووووووووووووووووووووووووووور

يا للهول يا للكارثة وا معتصماه

يا معسل اسمها اللهجة الحورانية مو اللغة الحورانية


بعدين انا مو عم هاجم لهجتي ولهجة الاباء والاجداد

يعني مو معقول هالحكي

بس اردت ان اشير ان اللهجة الحورانية تحتوي على مفردات صعبة


طيب بتحداك اذا في لهجة غير الحورانية فيها 4 تاءات وهي:

تتفتفت

يعني تتمزق اربا اربا