آب اللّهاب طباخ التين والعناب
2. إذا أجا آب , الصيف عاب
3. آذار أبو الزلازل والأمطار .
4. مطر نيسان كل نقطة بتعبّي فنجان
5. خلي الجمرات الكبار لقرصات آذار
6. أخاف أقول آه يسمعني العدو ويفرح
7. أب ربّى ألف ولد ، وألف ولد ما ربّوا أب
8. من شبّهك بأبوك ما ظلمك
9. أبوك بصل وأمك ثوم ، منلّك الريحة الطيبة يامشؤوم ( يضرب للوضيع الأصل ينشأ كأبويه في الصفة )
10. حبسوه في كيس مع إبليس ، طلع منه إبليس يستغيث
11. ابن آدم أسود راس ( يقال في ذم الإنسان لإنكاره للجميل و جزائه الخير بالشر )
12. ابن آدم عينو طماعة ما بتشبع غير بكمشة تراب
13. ابن آدم مثل النملة ، ضعيف جبار
14. ابن الابن ابن الحبيب ، وابن البنت ابن الغريب
15. ابن الحلال عند ذكرو ببان
16. ابن آدم نصو خلقة ونصو خرقة ( أكثر ما يقال للمرأة ، فالثياب التي تلبسها تصف جمالها أو قبحها من جهة المنظر وإلتفات الناس إليها ) 
17. ليش انت ابن الست وأنا ابن الجارية
18. ابن الناس بيخرب البيت من الأساس ( ابن الناس : الصهر في هذا المثال )
19. لا تطوّل الحبل لابنك بيشنق حاله
20. على ابنها حنونة وعلى كنّتها مجنونة
21. ابنك وهو صغير ربيه وهو كبير خاويه
22. آخد ابن عمي وأتغطى بكمي ( يضرب في تفضيل تزوج المرأة بقريبها ولو فقير أو معناه : أتزوج من ابن عمي ولو كان فقير ) .
23. طب اللقن على قفاه بيطلع الابن لأباه
24. إجر لقدام و إجر لورا ( يقال في المتردد )
25. اجرتين بفرد بابوج ( يقال في شخصين يلازم أحدهما الآخر )
26. اجري واجرك في الفلق
27. أنا وأخوي على ابن عمي وأنا وابن عمي عالغريب
28. الله خلق أختين وما خلق بختين
29. يا أرامل يا بنات عينوا إخواتكن المجوزات
30. يا أرض اشتدي ما حدا قدي
31. لا تأخذ أرملة كان خدها مشموم إش ما عملت معها بتقول: مو متل المرحوم
32. أرنبة وعضاضة ( معناه يقال في الضعيف الجبان المتطاول على غيره )
33. الأرض مسكونة والحيطان بتسمع
34. دسنا الأراضي اللي ما بتنداس وبسنا الأيادي اللي ما بتنباس  ( يقال لقليل الحظ الذي يسغى لقضاء حاجته )
35. راد الأرض تنشق وتبلعه 
36. إن كان بدك تضحك على الأسمر لبسو أحمر 
37. أصابيعك ما كلّن سوا ( معناه أن الناس ليسوا سواسية )
38. اللي بينكر أصلو بكون ما لو أصل
39. اللي ايدو بالمي مو متل اللي ايدو بالنار
40. خود الأصيل ولو كان على الحصير
41. أعزب دهر ولا أرمل شهر
42. أكل ومرعى وقلة صنعه
43. الأكل على قد المحبة ( تقوله العامة في حلب لضيوفها للإقدام على الإكثار من الطعام )
44. أكل فول مدمَّس وتيَّس
45. أكـلُو : شم لا تدوق وتبت لا تقع ( يقال في البخيل ) 
46. يقبر أمو لو فتح تمو كان أكل الحكيم وأمو ( يقال في الكبير البطن الذي يزعم أن أكله قليل )
47. اللي بياكل تازه ما بيتآذى
48. كلما جعت بتاكل أطيب
49. أكلت وانحسب عليك , كول وبحلق عينيك
50. الله بالعين ما شافوه , بالعقل عرفوه ..
. الله يسعدهن ويبعدهن
52. الله بطعم انجاص للّي ما لو ضراس
53. الله ما بينسى دودة بصخرة
54. اللي بخاف الله لا تخاف منو
55. أم القتيل بتنام وأم المهدد ما بتنام
56. ألف أم تبكي ولا أمي
57. بعد الأم احفر و طم
58. ياريتني أمير ولو عالحمير
59. أنا أمير وأنت أمير من اللي راح يسوق الحمير
60. أمل إبليس في الجنة ( يضرب لمن يطمع في المستحيل )
61.  من أمّنك لا تخونه ولو كان خوّان
62. أمين وخاين ما بصير
63.  الإنسان ابن ساعتو
64. فلان على راسو ريشة ( يقال للمتعجرف )
65. كل شي بأوانو حلو
66. كترة الأيادي بتحرق الطبخة
67. أيلول طرفو مبلول 
68. أيار شهر الأزهار
69. من باب شقاع لباب رقاع 
70. الباب اللي بيجيك منو الريح سدو واستريح
71. كشيناه من الباب دخل من الشباك
72. فلان إذا راح على البحر بينشفو0 (يقال للمنحوس أو الذي يخرب كل ما يصل إلى يديه )
73. البخيل بيحلب النملة
74. برد الصيف أحد من السيف
75. البرد والقلة أصل كل علة
76. البصلة عيّرت الثومة قالت لها : إنت حدّه وأنا صنصونة ( يضرب لمن يعيب غيره وفيه عيوب )


يمكن تشوفوا أنه بعض هذه الأمثال متداول ومعروف لدى الكثيرين بس لا تنسوا اللهجة الحلبية وطريقة تناولها للموضوع ...
تقبلوا تحيتي ..

زياد عرفة _حلب

مجهود .. عظيم .. تقوم به صديقي ..

أشكرك .. عليه ..


اتمنى ان .. تنال مواضيعك الاهتمام ... الذي تستحقه ..

شكرا جزيلا ..


أخوك باسل ..

شكراً باسل وتحية لك .... وانتظر الجزء التاني بكرا إن شاء الله ....

وإذا عندك شي بتحي تعرفه عن حلب خبرنا عنه لنبحث فيه ..

مشكور زياد عالامثال الي قرائتها بشغف
وبالاخص انو كنت اسمع كتير منها بحلب
وعندنا بالبلد كمان كنا نستخدمها
بس هل يصح ان نطلق عليها اسم " امثال شعبية حلبية"

يعني شو الاثبات انها حلبية؟؟؟
في عندك دليل

ان براي الامثال هي نتاج حضارة الشعوب
ما بعتقد انها هالامثال نقدر نصفها بالحلبية او الشامية
هنالك البعض منها اوافقك الراي حلبية 100% لانك لا تسمعه الا بحلب
ولكن االاكبر مستخدم على نطاق اوسع

يسلمو ايديك اخي الكريم

عنجد امثال حلوة كتير و مفيدة

شكرا كتير 

 

يعطيك الف عافيه اخي زياده على مجهودك الدائم فيالتالق

أمين وخاين ما بصير

ياريتني أمير ولو عالحمير

يعطيك العافية....
بس كأنو كل هالأمثال منستخدمها عنا بالشام.....
مشكور لجهودك...
تقبل مروري...

حتى عنا في منهم هدول الامثال الكتير

يلا بنستنى الجزء التاني يمكن يكون في اشي جديد

شكرا الك اخ زياد .. و بانتظار الجزء الثاني

بس لا تنسوا اللهجة الحلبية وطريقة تناولها للموضوع ...
تقبلوا تحيتي .. ????


اي اكيد امثال كتييييير حلوة
بس لأنو من بلدي....حلب الشهباء(عاصمة الثقافة الاسلامية)


شكرا كتير عالموضوع