بتكون قاعد بامان الله عم تتفرج على فلم عم تستنا فيه من اسبوع ليطلع ، بفوت ابوك بقلك شو عم تتفرج على فلم .......؟؟



لا عم بتفرج على برنامج ارضنا الخضراء .....

((وكل هالتسميعة بتكون مشان يقلب عالجزيره او العربيه مشان يسمع اخبار طول النهار قاعد يسمع فيها)) عكلن اذا كبر ابوك خاويه .

هي خالصين منها ...




بتطلع بميكرو(سرفيس) وبتحط هيك وبتطلع ( خمسة ليرات) وبتعطيها للي ئدامك، وبكل برودة بيئلك: واحد ؟


لأ 60 !!!!!!!!!!!!!!!!!؟ ورجعلي الباقي كمان (يعني الخمس ليرات بتركب كم واحد ؟؟)



-


بدك تنزل من الميكرو: بتقول للشوفير عاليمين زكاتك.... بتتلقى الرد: نازل ؟؟

لا والله بس كنت عم جرب صوتي شو رايك انت ؟؟.




مذيعة بيوم العيد عم تلفلف بالشوارع وتلطي ع كم مواطن وتسأل وبنفس الوقت هي بتجاوب: شو بتساوي اول يوم العيد ؟ أكيد بتروح بتزور الأهل والقرايب..

لا والله بالعادة بفكر العب دء طميمة وماروح لعندهم



نفس المذيعة بتشوف ولد بالشارع وبتساله؟ حبيبي بتحب البابا والماما؟
لا مابحبهم ابداً , انا بحب البوسنة والهرسك .

ليش مذيعاتنا دائما عندون نفس الأسئلة؟؟
ليش كل الشعب حفظان شو هي الأسئلة؟؟


يعني المذيعة بتروح على شي حديقة أو شي مطرح متجمعين فيه الأولاد الصغار بالعيد..... وبتبلش بالأسئلة الفذة تبعونها....



اشتريت لبس جديد على العيد حبيبي؟؟؟
يعني شوبتتوقع يقولها؟؟


لأ...ما اشتريت لبس جديد.... هادول سرقة من على حبل الغسيل تبع الجيران ولا بتتوقع يقولها

أخدت لبس أخي الكبير تبع السنة الماضية ولبستو...؟؟


طيب بركي فعلا كان في ولد هيك وضعو.... ليش حتى تسألو وتكسرلو نفسيتو قدام بقية الأولاد؟؟؟




شو بتشتري بالعيد...شوكولاته وأكلات طيبة؟؟


لا والله....على العيد بشتري 10 غرام حشيش...وبنقعد نصطهج فيون أنا ورفقاتي...... وبعدين بنأرجل...... وبناخدلنا كاسين


يعني الولد الصغير شو بيحب يشتري وياكل؟؟ مجدرة ولا عدس بحامض؟؟




شو بتعمل بالعيد احكيلنا حبيبي....بتلعب بالمراجيح؟؟


لأ أبدا...ما بقرب صوب المراجيح.....بالعيد بروح بلعب مصارعة رومانية...وشوية تايكواندو....





بتلعب مع أصحابك بالعيد؟؟

أعوذ بالله... شو مع أصحابي..... أبدا... بنزل بلعب مع شوفيرية التكاسي والزعران...




مع مين بتحب تروح بالعيد؟؟ مع ماما ولا بابا؟؟


لا والله ؛مابحب روح معهن التنين أسئل من بعض . يعيني عادة مع مين بيروح الصبي ؟ مو مع أبو وآمو ؟؟




احكيلنا ...وين بتروحو بالعيد إنت ورفقاتك... حبيبي....؟


ما بدها سؤال...على الكباريه....

طيب مذيعاتنا المهمات... ما عم يلاحظوا كيف الولد عم يتلعثم...وعم يتلبك... وما عم يعرف يحكي... ومالو رايد يحكي....... وما عم يطلع صوتو

....وما عم يحكي شي....؟؟؟
هالمذيعة الحنونة هاي..... ما عم يطلع من خاطرها تترك الولد بحالو؟؟
لك اتركيه بحالو  و بعدين ..؟؟




حاطت راسك ونازل دحي بهالكتب والدراسة، بيجي أبوك أو امك...: عم تدرس؟


لا والله ...!! عم غير زيت للسيارة





حامل سماعة التلفون وعم تبلش تدق بالأرقام، بيجيك عنصر مفاجئة من أهلك وعلى وشهم علائم الإستغراب والدهشة: بدك تحكي بالتلفون؟

لأ شو احكي اعوذ بالله !!! كنت عم عد الأرقام يلي فيه !شوبدي اعمل يعني ؟؟




لابس أحلى لبس عندك ومتعطّر وشايل مفاتيح السيارة وجزدانك و طاير لبرا البيت، بيجي حدا من أهلك بيسألك، شو رايحلك شي مشوار !!؟؟

لا والله طالع عالأسطوح صلّح الدش




معزومين ع بيت جماعة، ولما بتدقوا الباب .. بيفتح شي فهمان وبيقول بدهشة:هه إجيتوا ؟؟؟

لا والله لساتنا عالطريق، في عجئة كتير بالمهاجرين




مطمطرء بتختك ونايم ومطفي الضو ومتغطي بالبطانية وتمك مفتوح متل مغارة جعيتا، بيجي واحد من أهلك بيفتح الباب ويقول :شو نايم ؟؟

لأ !! عم ارقص... بس الوضع بيوحي إني نايم



موناليــــــــــــــــــــــــــــــــــــزا

مومو

سلامي موناليزا ليوناردو دافنشي

عنجد شي مو طبيعي يعني اول مرة بضحك من قلبي

يعني فعلا الاسئلة اللي بلا طعمة كتير موضة دارجة عنا

بس انا بقلك شو الحل وطبعا مجربها اللي بيسال سؤال بايخ

رح يكون ناطر الجواب وهون مربط الفرس بس إطلعي فيه وابتسمي

لانو الغباء وعفوا للكلمة شقين الاول من اللي سال السؤال والشق الثاني وقت بنجاوب عليه كانو

شي سؤال مهم

اهم شي روقي حاسس انك معصبة وانت عم تكتبي الموضوع


تقبلي مروري ولك مني الاحترام والتقدير

leader

ضحكات من عند الصبح ..

صحي هالأمور بديهيات متل ما سميتيها ..

بس تعودنا .. يعني بلاها مو حلوة .. 

ألف شكر ..

لأ عنجد أنت رهيبة من وين نكشتي هالحكي والله صرخت لأمي تضحك معي شوي لأ كتير
من زمان ما هروا دموعنا من الضحك
عنجد يسلموا هالإيدين شي حلو والله

لك شو هااااااااااااااااد

من وين بتجيبهم

لك شو هالنهفات

حلوووووووين

لك ضحكت ليوم الضحك

يسلمو إيديك

تقبلي مروري
                                             

ههههههههههههههه



عنجد حلوين.......

صحيح بديهيات ......

بس بصراحة ....

أنا هيك ......

و خاصة تبع ....... شوووووووووو  نايم ..؟؟

أحياناٌ بفيئ أخي من النوم مشان أعرف إزا كان نايم أو لأ

جادبها مو ..؟؟

تحياتي إلك مومو

تقبلي مروري ......

مشكور علي الموضوع عن جد شي رائع  تقبل مروري بكل احترام                          

عنجد  ضحكت من قلبي

فعلا عنجد من وين جامعتيهن هدول

عنجد مواضيعك حلوة  موناليزا



بتطلع بميكرو(سرفيس) وبتحط هيك وبتطلع ( خمسة ليرات) وبتعطيها للي ئدامك، وبكل برودة بيئلك: واحد ؟


لأ 60 !!!!!!!!!!!!!!!!!؟ ورجعلي الباقي كمان (يعني الخمس ليرات بتركب كم واحد ؟؟)



هي  حلوة كتير

ذكرتيني بسرافيس جوبر مزة أوتوستراد الصغيرة





تقبلي مروري




علي
رابعة حقوق

">كيفكم اليوم
احلى ناس هي الناس الرايقة
عن جد شكرا الك على الموضوع اللي كتير كتير كتير حلووووووووووووووووو
       
                                                                                                                                              مدنية للأبد

    يمكن هي عاشر مرة بقرا الموضوع
بس والله كل ما اقراو بفرط ضحك

اصلن الموضوع الو حلاوة خاصة اليوم لانو من ايدين موناليزا حبيبتي

تقبلي مروري