مساء الخير
أولا أحيي الأخ صديق الكل على الموضوع الجميل والمميز ...
الحقيقة انا كنت متابعة له باستمرار ولم يسبق أن شاركت فيه من قبل ..
ولكن بما أنه الحكي عن جودي ...فهي فرصة حلوة  ومو كل ساعة بتصير..!
بصراحة انا ما  تكلمت مع الأخت جودي الا مرات معدودة ..وكانت كافية لحتى أعرف انها انسانة كتير رائعة ومجتهدة وصاحبة رؤيا وهدف ...ومواضيعها ومشاركاتها بتشهد على هالشي ..وكمان لمست عندها حس انساني عالي  ومسايرة ومسالمة ..وبتحب تناقش بهدوء لحتى توصل للحل ...
بالنسبة للاسئلة مافي بذهني شي معين ..شو بدي اسألك ....؟ لأنو الأخوة اللي مروا كفوا ووفوا ..!
ممممم .... اي تذكرت....
بدي اسألك اسم جودي هو اسمك الحقيقي ولا لأ ..واذا لأ فشو هو الاسم الحقيقي .... ؟ اذا ما عندك مانع....
وبدي اسأل جودي  الانسانة الرقيقة ...شو هو أكتر شي بيخلي دمعتك قريبة وما بتتحملي لما تشوفيه الا ما تبكي...؟
وتحياتي الك وان شالله موفقة على طول بحياتك وبدراستك.........

الحديث يدور حول أخت أقل ما يمكن القول عنها هو أنها متميزة

سواء بفكرها.. أو علمها .. أو أسلوبها ..

لا أعرف الأخت جودي عن كثب ... لكن عرفت أسلوبها وفكرها من خلال مواضيعها

وبعض من ردودها في بعض الساحات ...

وصراحة أعلن هنا أمام الملأ أني من خلال فكرها لم أتردد بطلب العون المساعدة

منها في موضوع هام ومصيري بالنسبة لي ..
( طبعاً موضوع يتعلق بدراستي لكي لا يحار القارىْ).

ــ علماً أنه بإمكاني التوجه لأشخاص على أرض الواقع ــ .. لكن آثرت التوجه للأخت

جودي وذلك لثقتي بها من خلال قلمها وفكرها الذي انعكس أمامي هنا في

المنتدى... وهي بالمقابل لم تتردد ومدت كل يد العون والمساعدة..

وهنا أتوجه بالشكر لها مرة ثانية وثالثة ..

هذا ماعرفته عن الأخت جودي..

وأسئلتي التي أود التوجه بها للأخت جودي..

ـــ من خلال تواجدك هنا ماهو تقييمك لأقلام وفكر طلاب جامعة دمشق .
طبعاً أعضاء منتدانا كأنموذج.

وإن كان هناك حديث نسب في إجابتك لمن ترجح الغلبة.

ــ طموحك على الصعيد الدراسي أين يقف.

تحيتي لكِ أخت جودي وتحيتي لكاتب الوضوع .

الجولاني

السلام عليكم....

مع إنه أنا مو من عادتي التطفل.. ولا من عادتي إني ادخل بشي مالي فيه... ولا حتى أعطي رأيي بشي ما بعرفه.. ولأنه ما بعرف حدا من المشرفين اللي انذكروا بشكل كبير فما أعطيت رأيي أبداً...

وجودي ما بعرفها أبداً... ولا مرة حكيت معها.. بس عنجد من الشخصيات اللي حبيتها عن بعد عالمنتدى..  ...    واسألي مرام... واسمك عنجد بيذكرني متل ما قال اليزن بصاحب الظل الطويل.. ولو إنه (يمكن) الشخصية ما لها دخل.. بس اسم بالفعل كتير لطيف....

أنا ما فيني أعطي رأيي فيكِ... بس أنا لما قول عن إنسانة لطيفة.. وفهمانة.. بتعني إلي كتير.. على الأقل بالجزء اللي بعرفك فيه..

بس بدي اسألك كم سؤال...

- أول شي: الهدف الأسمى بحياتك... أو أحد أكبر أهدافك بالحياة بتسعي لتحقيقه....؟

- المبدأ بحياتك ما هو موقعه؟ لأي درجة ممكن تتنازلي عن أشياء في حياتك لتقولي أنا صاحبة مبدأ ولن أتخلى....

- أكتر شي بتحبيه بالإنسان اللي أمامك....

- نصيحة لجميع طلاب الإنجليزي لتنمية اللغة الإنجليزية بشكل موسع (كونه مجال دراسة)... وللطلاب العاديين اللي بيسعوا ليفهموا الإنجليزي كلغة أصبحت عالمية ولازم الكل يعرف فيها...

- حكمة لحياتك بتحطيها بتحبيها.. وممكن تعطيكِ دافع كبير لما تكوني بأقسى حالاتك..

- وسؤال عن حياتك: شو بتشتغلي؟

شكراً كتير عالإجابة سلفاً  ...
تحياتي 
بنان

العزيزة جودي
شكرا على الرد اللطيف ..ولا تنسي اللي وعدتيني فيه ...انو تقوليلي اسمك الحقيقي بيني وبينك...
على كل حال هي حرية شخصية وفعلا انا ما بحب التطفل بس السؤال كان لمجرد الفضول للتعرف على اخت غالية وعزيزة  ..... اذا ما حبيتي تحكي انا ما بزعل ابدا صدقيني ....
وبالنسبة لدمعة الوالد الله يخليلك ياه ...ان شالله ما بتشوفيها ابدا الا بدموع الفرح لما بدو يفرح فيك ويرفع راسو فيكي لما بتوصلي لاعلى المراتب باذن الله ....
وقلك شغلة معك حق والله ...لأنو انا كمان نفس الشي ما بقدر شوف دمعة البابا لأنو هو بالنسبة الي أهم سند وأقوى حق بتمتع فيه بالحياة.........