السلام عليكم

رح بلش دغري بموضوعي

الحقيقة اني دورت عليه بالصفحات الاربع في القسم وما لقيته للأسف.


الجزرية ...صفات الحروف ومخارجها


هالكلمات التلاتة مالي عرفانة كيف مشي حالي فيهن



اليوم  سألتني الانسة .. شو صفات حرف الذال


قلتلها الجملة الوحيدة يلي حافظتا : رخو وشدة


   


قالتلي شلون اجتمعو معك وهنن ضد بعض !!

و اكلنا بهدلة عالناعم لضرورة حفظ الجزرية وهيك مابيمشي الحال 

وشلون بدنا ناخد الاجازة ... هاد غير انو صار لازم نعرف الاعرااب    ليش هيك عم يطولوا الطريق علينا 

طيب عنجد حابة احفظها بس صعبة كتيييييير

يادوب عم اقرأها

وحتى لما عم تشرحها الانسة بنساها دغري


لاقولي حل يا جماعة

غير اني اسمعها بشريط كاسيت

لأنو يمكن قد ماعدت و فتقت بهالشريط حفظوها الجيران

وانا لسااااااااااا 


بتحبو نعمل حلقة حفظ سوا ؟

او اي حل تاني



سلام


                                                                                                                                                                                                                                                                                                                                                                                                                                         

أنا الصراحة ما فهمت شو بتقصدي بحلقة الحفظ !! يعني شلون ؟ و كيف بدنا نحفظ سوااا؟
بس استغربت أنك لسا ما حفظتيها مع أنك سمعتيها على شريط ...
أنا هيك حفظتا ...ههههه بس نسيتا هلأ  طبعاً مو كلا
على كل حال .... فيكي تحفظيها بأنك تلاقي نغمة خاصة فيكي بتقريها فيها ,,, والله يعينك ,, ويعينك على الإعراب كمان !

والله أنا من 4 سنين حفظتها لحالي بالبيت..يعني افهمها واحفظها..
وهي بالعكس حلوة وبتنحفظ ولهلأ حافظتها رغم إني ما كتير براجع..
بس فعلا شلون اجتمعو معك الرخو والشدة؟؟

ولي علي عليكي يا رغد
شو هاد الإعراب كمان؟؟
الحمد لله لحقت حااااااااااااااااااااااااااالي

Obay Qasim

بقصد اننا بالمنتدى نحدد كم بيت بكل اسبوع ونحفظو


مع انو مامشيت معي هالشغلة


___


شيماء .. ما شالله عليكي .. عئبالي يارب


مابعرف كأنو ماحدا عندو اقتراحات يا أما الموضوع ما بهم الكل


                                                                                                                                                                                                                                                                                                                                                                                                                                                                                                                                                                                                                                       

اقتباس

بقصد اننا بالمنتدى نحدد كم بيت بكل اسبوع ونحفظو

أنا موافق ,,, بلكي برجع بحفظها ... شكراً للتوضيح !

اقتباس

مع انو مامشيت معي هالشغلة

ممكن يمشي حالا هل المرة !

الله يوفق!              شكراً

طيب يا رغودة..
أول مقطع من الجزرية..
يقول راجي عفو رب سامع
محمد بن الجزري الشافعي
الحمد لله وصلى الله
..............................

...........................

وليس بينه وبين تركه
إلا رياضة امرئ بفكه


هاد أسهل شي
يلا بلشي

السلام عليكم ...
اسمحولي إبدي رأيي ...
أول الشي لازم تحطي ببالك شو هدفك من حفظها وليش لازم تحفظيها وبعدين لازم تإيمي من بالك إنها صعبة .. هي فيها بعض الصعوبة مابقول لاء بس بالجامعة عم نحفظ شغلات أصعب بكتير ..!!!!!فليش هي ظبتت معك وهديك لاء ؟؟؟؟؟؟؟؟؟
بعدين الجزرية بتساعد كتير على فهم التجويد وتثبيته ...
والله بعينك ان شاء الله بس انت ادعي واتوكلي على الله واستغفري وانا عم قللك عن الاستغفار من خلال تجربة شخصية صارت معي .. ولح قلك بيت هالشعر يلي يمكن بتعرفيه :
شكوت إلى وكيعٍ سوء حفظي    فأرشدني إلى ترك المعاصي
وقال لي إن العلم نورٌ                  ونور الله لا يهدى لعاصي
على سلامتك مو تفهمي مني شي تاني بس كلنا منخطئ وماحدا على راسو خيمة .. صح !!!!
ومشان الإعراب .. لك هي لغتنا ليش كتير مستخفين فيها يعني نحنا منركد ركيد لحتى نتعلم انكليزي ولغات تانية ونسيانين أنو هي من تراثنا وأنو هي لغة القرآن ولغة أهل الجنة ..
بالله لح اسألك سؤال .. شو السبب يلي خلا انو اللغة الانكليزية تصير هي لغة العصر ؟؟؟
مشان هيك لا تنهمي وحطي دائما هدفك قدام عينك ..
بعدين الإجازة يلي لح تاخديها لح تكوني آخدتيها بجدارة وبحق .. مو شلون ماكان ؟؟
لاتزعلي مني أنا كتير حبيت حاكيك لأني حسيتك عن جد بدك .. بس الألماس مابيجي ببلاش ..
وشوفي شي رفيقة معك بالجامعة تكون راكزة وفهمانة وعدي إنت وياها بأوقات الفراغ واتسلي فيها وحدة بتبلش والتانية بتكمل ...
طولت عليك عفواً... تقبلي مروري ... ولا تنسي تدعيلنا وتدعي لحالك ..
السلام عليكم ..

نحنا دائما مننسى أنو القرآن وعلومه مو كأي علم و حفظو بدو فتوح رباني لهيك منشوف ناس فطاحل بالحفظ و أوائل بس ما بيقدرو يحفظو صفحتين قرآن و ناس مو مكملين دراستن و مهرة بكتاب الله
هالشي بينطبق عالقرآن و كل علومه متل الجزرية وشرحا .

والقصة بدها شغلتين : طهارة و حرارة


وما ننسى قول الإمام الشافعي :
شكوت إلى وكيع سوء حفظي
                          فأرشدني إلى ترك المعاصي
وأخبرني بأن العلم نور
‏ ‏                            و نور الله لا يهدى لعاصي
   

يعني ما شاء الله على هالهمة عليكن يا شباب (صبايا و صبيان  )
الكل مهتم بهالموضوع (الإجازة وما إلى هنالك ) والله يهدي شباب بلدتنا 

المهم أنا حبيت قول أني  خلصت اللي قالت عليهن الأخت شيماء !!!

برجو تقبلو أنو أحفظ معكن !! سلام