عيش الأكشن !!!..... - منتدى جامعة دمشق

.عيش الأكشن !!!.....

sh@!m@2

جامعـي مبـدعـ

مسجل منذ: 04-08-2009
عدد المشاركات: 218
تقييمات العضو: 0
المتابعون: 6

غير موجود
اشــترك بالتحديثات
رسالة مستعجلة

عيش الأكشن !!!.....

31-12-2009 09:31 PM

أول خطوة بتخطوها الصبح برات بيتك هيه أول خطوة من مغامرتك الأكشنية اليومية التي ستقوم بها كالآتي :

1- بتتابع الخطا طولت أم قصرت حتى توصل للموقف و تلتقي بمنافسيك الأشاوس اللي كل واحد منن على استعداد تام ليعيش هالمغامرة بس كلن على أكشنته الخاصة .

2- خليك دائما بالمقدمة لا تخلي حدا يكون قبلك مهما كانت الظروف وتعددت الأسباب , وازا حدا زورك بعين ازورو بالعينتين , بيخاف وبيتراجع و بتضل الك الصدارة بخوض المغامرة .

3- أول ما بيجي السرفيس رجاع خطوة وحدة لورا مشان ما يدعسلك رجلك .( خطوة وحدة بس مو أكتر لأنو في منافسين وراك عم يستنو منك هالحركة ) .

4- حط رجلك جوا السرفيس وقول يا رب , و قعود بأول مقعد بوشك لا تتخير وتتحير و الا بتروح عليك وبيسبقك الكل بالقعدة .

5- لا ترتاح و تفكر انو هون خلصت المغامرة لااااا هلئ بلشت , لسا السباق شغال لازم تلحق حالك و تمد ايدك عجيبتك وتطلع العشر ليرات وتناولا للشوفير قبل ما هالشوفير يبلش يعد مصاريه ويعد الركاب ويا ويل ويلو اللي ما لحق أوما اتزكر يدفع .

6- أول ما الشوفير يفضى من العمليات الحسابية و بيركّب خامس بسرعة انت بتتمسك وين ما كان بايديك و برجليك , تحسبا من اشارة حمرا تطلع بوش السرفيس بتستدعي الشوفير يدعس فرام .( المسكين هون اللي مو متمسك بيكون صار عند الشوفير علما بانو قبل ثواني كان قاعد بمقعدو ورا ) .

7- رح تتكرر الفرامات و اللفات و الطلعات و النزلات كتير بس انت أكيد يا بطلنا الأكشني حتكون آخد حبة الدوخة مشان تضل صامد للنهاية وما تأثر فيك هدول الشغلات الناكتة ( كلن كم خضة شبنا ؟!..) .

8- ازا كنت رايح عالجامعة وعندك شي تسميع أو فحص اصحك ثم اصحك تترك شي درس لتدرسو بالسرفيس , لانو كون على أتم الثقة انو شوفيريتنا شغل رواء وبحبو يسمعو أغاني من عالصبح بصوت عاااااااااالي لدرجة ما بئى تسمع شو عم تحكي مع حالك , طبعا عدا عن نوع الأغاني اللي حاطينا اللي بتعبرلك بشكل أساسي عن حسهن الموسيقي والطربي العالي .

9- قبل بموقفين بتبلش تقدم طلبك بالنزول للشوفير لبين ما يدرس طلبك ويتباحث فيه مع نفسه ازا كنت بتستحق النزول بالمكان اللي طلبتو ولا لاء ,هالشي طبعا بيتوقف عسلوكك أثناء الرحلة ازا كنت حباب وآدمي بتنزل بموقفك وازا تناقرت مع الشوفير بشي كلمة أو كلمتين أثناء الرحلة فاعرف أخي المغضوب عليك انو حيشحط فيك شي موقفين تلاتة بعد موقفك وينزلك (هيك بتكون استغرقت عملية النزول 5 مواقف ) .

10- انت بتنزل من هون و بتسارع الى هندسة اللوك و اعادته الى ما كان عليه حين خروجك من المنزل .

و ألف الحمدلله عسلامتك أيها البطل الأكشني .... واستعد لخوض مغامرة أكشنية أخرى ( شو نسيت انو في مغامرة العودة الى المنزل الا اللهم ازا فقدت حسك الأكشني وقررت ترجع عالبيت مشي ) .

تحيتي الكن أصدقائي المغامرين ...
و نصيحة مني اتبعوا هي الارشادات لتتحولو من مغامرين عاديين الى أبطال و تنتهي مغامرتكن بسلام وبأقل خسائر ممكنة انشاءالله تعالى .

شــــــــــــــــــــــ ــــــــــــــيماء

« عرض آخر مواضيع العضو »

><
>>>>>>

أنت غير مسجل لدينا.. يمكنك التسجيل الآن.