السلام عليكم ورحمة الله وبركاته
هو موضوع مستوحى من الواقع
في ظل الأوضاع الراهنة هناك الكثير من المخطوبين
منهم من يفضل الزواج بسرعة ومهما كان الظرف بحجة ان وجودهم معاً في الوقت الراهن أفضل من وجود كل واحد في مكان وقد يتزوج أصحاب هذا الرأي بعد حفلة عرس صغيرة أو حتى بدون حفلة وبعدها قد يبدأ مشوار الشنططة الذي يمر فيه جميع السوريون الآن......
بينما يفضل الآخرون تأجيل الزواج بحجة (مو معقول نتزوج والناس عم تموت، وبلا مانتشنطط بعدين ) ولكن التأجيل إلى أجل غير مسمى فما من أحد يعلم ما نهاية كل هذا خاصة بعد عام ونصف....
بالتأكيد دعاؤنا الأول هو لسوريا والفرج عنها لأنه الحل لكل مشكلة تواجهنا ونرجو من الله أن يكون الفرج قريب
ولكن في ظل الظروف الراهنة هل تختار الزواج أم التأجيل؟؟ ولماذا؟؟
يرجى المشاركة وإبداء الرأي
وشكراً سلفاً

والله خياران أحلاهما مرًّ...

يعني بالحالتين رح يكون في سلبيات مايستهان فيها

لكن بتحكيم العقل ،، اذا كانوا الطرفين جاهزين وفترة الخطبة المحددة خلصت
فالخيار المرجح انو يتكلوا على الله ويتزوجوا ،،
((لكن الشي الأهم ليكون هاد القرار الأصح .. انو يكونوا الطرفين مستعدين وقادر كل واحد انو يستوعب التاني والأكيد يكون كل واحد منن  آخد هاد القرار عن قناعة ومسؤولية  ))

وغير هيك حالة ،، برأيي التأجيل أولى حتى مايكون لاسمح الله هاد سبب لفشل الزواج
وممكن اذا اتأمنت الامور الاعتيادية انو يبدو يفكروا بالزواج بشكل جدي

والله يوفق الجميع يارب ،، ويحمي هالبلد ويرفع عنها البلاء


تحيتي ،،

السلام عليكم

برأيي الأفضل بهالحالة هو الزواج ... لأنو إذا الواحد بدو يأجل لتستقر الأمور فحتكون شغلتو طويلة والله أعلم

إذا حطو إحتمال الشنططة بعد الزواج فكمان هو وهي متشنططين مع أهلهم قبلو ... يعني ما حيقل شي بالنتيجة

والزواج ممكن يكون نوع من الاستقرار للطرفين ... بس التأجيل حيخلي في قلق وانتظار ... وبشكل عام الخطبة الطويلة ما كتير محبذة

أما بالنسبة لأنو ما يتزوجو والناس عم تموت فهاد ما منطق طالما هالحكي بعد ما صار في ارتباط ... ولا حتى بالدين في هيك شي ... الواحد لازم يشتغل مو يوقف حياتو بعد ما توقفت حياة غيرو ... هيك ما حيفيد ولا يستفيد ... بس أكيد لازم يكون في تقدير للظروف ... فلازم كل شي يكون عالضيق وما في داعي حالياً للحفلات والمباركات متل قبل ... وإن شاء الله الله بيباركلهم لأنو العبرة بأنو الواحد ينوي بهاليوم تأسيس عائلة بترضي رب العالمين بس مو العبرة بالاحتفال ولا المظاهر ... في ناس كتير احتفلت ودفعت مبالغ طائلة ما إلها داعي وبالأخير ما مرتاحة بحياتها ... طبعاً الإحتفال ما بيضر كمان بس الواحد هالأيام بدو يقبل بالحد الأدنى

والله اذا ما في سبب للتاخير فعلى بركة الله لانو الزواج بيحصن من الحرام وبركي انشالله التنين بيخففوا عن بعض بهل الظروف الصعبة
عقبال كل العزابية  يارب

السلام عليكم

إذا الشب مأمّن مسكن ملائم للزوجة وعندو مصدر دخل بيكفلهم حياة كريمة عندها مافي ضرورة للتأجيل.

طبعاً ما ممكن ينعمل حفل زواج كبير بحكم ظروف البلد والحزن السائد. لكن ان شاء الله الزوج بعوّض زوجته بحفل بعد حلول الفرج عن هالبلاد عن قريب بإذن الله.
وفي الزواج عفاف للرجل والمرأة.

اي يتزوجو ليش لاء !! و بتحمل البنت و بيستشهد الشب و بترجع على بيت اهلا مرة تانية بس هالمرة مع ولد بي بطنها !



انتو وييييييييييييييييين و الدنيا وين !

cute*
((لكن الشي الأهم ليكون هاد القرار الأصح .. انو يكونوا الطرفين مستعدين وقادر كل واحد انو يستوعب التاني والأكيد يكون كل واحد منن آخد هاد القرار عن قناعة ومسؤولية ))

هي الجملة كتير منطقية برأيي يعني إذا بدهم يتزوجوا ويتخانقوا فهاد مو حل لازم يكون في استعداد من كلا الطرفين لتحمل الطرف الآخر

شكراً على المشاركة وإبداء الرأي

*Hope*
شكراً على رأيك بس الفكرة إذا كان بيت أهل كل منهما أكثر أماناً من البيت يلي رح يسكنوا فيه فممكن بعدها يضطروا يتشنططوا من بيت لبيت وبهالحالة الزواج ما رح يكون استقرار وممكن هالشي يسبب بمشاكل لكلا الطرفين

نور سحتوت، zaid
شكراً على إبداء الرأي

why
بتخيل الموضوع جدي ومافي داعي للكلام بهالطريقة
يعني أكيد الوضع صعب عالكل بس كمان في مشاكل اجتماعية لازم تنحل بظل هالظروف أو غيرها الدنيا ما رح توقف
بكل الأحوال شكراً على إبداء الرأي