والله يا لورد شفتك زتيت الورقة السورية لأخر شي
أنا شو بفهمني بالأحداث بمصر ولا باليمن ولا بتونس ولا بليبيا
أنا فيني احكيلك عن أول مرة سمعنا انو أهل درعا عم يطلعو مظاهرات
وقتها كنا نسمع ومانصدق
وكنا عم ننحرق كل مااسمعنا خبر وماعم يطلع بايدنا شي
طلعت أول مظاهرة بحمص ورحنا كم شب من الحارة للمظاهرة
استشهد مباشرة أول شهيد بحارتنا
وبعدها صرنا نطلع من جامع حارتنا ومن هداك اليوم ما اهدينا
وصارو شهيد ورا شهيد
فيني احكيلك عن اعتصام الساعة
لما اجتمعنا اسلام ومسيحية
وبعدين صلينا بصف واحد
والمسيحية يجيبولنا أكل ومي من بيوتون
ناس تعبت ورجعت وناس ضلت معتصمة
الساعة 2 بنص الليل اجى أمر بفض الاعتصام ولو بالسلاح
وكانت هي أخر مرة منشوف فيها ساحة الساعة
يلي ضلو راحو بين شهيد ومعتقل وهربان ومشرد
فيني احكيلك عن باب السباع وباب الدريب وبابا عمرو وباب هود والخالدية والحميدية والبياضة ودير بعلبة وكرم الزيتون والكرم الشامي والوعر والانشاءات والميدان ........
اذا بدك فيني احكيلك عن الرستن وتلبيسة والقصير وتلكلخ والحولة والقريتين وكل ضيع حمص
فيني احكيلك عن الشيخ محمود الدالاتي الله يحميه وكيف كان يهدينا ويقول هي فتنة
بس بعدين هو طلع معنا بالاعتصام وصار عراس كل مظاهرة لحتى اليوم
فيني احكيلك عن التكبير بنص الليل وكيف كان صوت الرجال مع الأطفال مع النساء يزلزل حمص والناس كلها عم تنادي ( الله أكبر )
وصوت الرصاص ما عم يهدا
فيني احكيلك عن مزح الحماصنة وكيف كانو يجيبو الفتيش مشان يخوفو العساكر
كانو يمسكو بايدين بعض ويقولو يا منموت سوا يا منعتقل سوا يا منرجع سوا
فيني احكيلك عن مقبرة حمص ( تل النصر ) وكيف صار مستحيل نوصل لهنيك مشان ندفن الشهداء
وصرنا ندفنهن بالحدايق
فيني احكيلك عن جامع خالد بن الوليد وكيف انضرب بالقذائف والصواريخ
فيني احكيلك عن يلي شفناه وكيف عشنا الأحداث
بس مافيني احكيلك عن أحداث ما عشتا وما بعرف عنها شي
غير يلي بتنقلو وسائل الاعلام
والتحليلات السياسية ما بفهم فيها كتير
تقبل مروري