انا اطلب من وقتك الثمين 20 دقيقة فقط 5 دقائق لقراءة الموضوع و15 دقيقة تفكيروانا رح اختصر قدر المكان 

غرفة الدردشة
غرفة الدردشة بمنتداك متل الدستور السوري موجودة بالاسم فقط والمشرفة بعد غياب طويل رجعت بس مشان تحارب الفنان سامي واللي بعرفو انو مشرف الدردشة لازم يكون ذو تواجد دائم مو كل شهر مرة واذا ماكانت خرج تقدم استقالتا 

ساحة الحوارات الجادة
قبل ان تعود ساحة التسالي بفترة طويلة ومن بداية ظهور ظاهرة العلاك بكافة اقسام المنتدى قلنا للمشرف العام صار لازم ترجع ساحة التسالي وانو كل المنتدى رح يصير ساحة علاك ماشاف من كل الموضوع وقتها غير جملة (هديك مرحلة مرت ونحنا ولاد اليوم والادارة قررت منع الحديث السياسي )وبلش متل الشحادين بقصة الولاد والعيال
والآن ياريت ترجع ساحة الحوارات لانو (خلصت الامتحانات من زمان ورح تبلش امتحانات جديدة )

التواقيع
انا شفت منتديات كتير ولكن التعامل العسكري الموجود بهالمنتدى مابظن موجود باي منتدى آخر
يازلمة معقول انت تطبق مبدا العقوبات الجماعية
شو ذنب 90% من اعضاء المنتدى اذا 10% من الاعضاء مابتفهم
والحل جاهز ومعروف ومابدو تفكير والسبب (نتيجة للتجريح والتجاوز بالتواقيع )متل سبب ساحة الحوارات الجادة

التقييمات السلبية
صار لازم تشوف الحل المناسب  بسرعة لانو كترت المشاكل من وراها

المشرفين
اولا نبدا باختيار النخبة الاشرافية الجديدة
شفلي المرشحين اللي حطن المشرف محمد وقال بانه لن يتم ااختيار الكثيييييييييييير منهم  بل البعض فقط 

ياسمين
الشام العتيق .. كلية الحقوق

عازف النهاوند .. كلية الحقوق

عاشقة الكيمياء .. كلية العلوم

لبوة سوريا .. كلية العلوم

دموعة .. كلية العلوم

زرقاء اليمامة .. كلية الفنون

Sandy .. كلية التربية

جرير .. قسم المكتبات

Dr.bashari .. كلية الطب

Muhammad 1933 .. كلية الهمك

أبو أمجد .. كلية الهمك

أبو بهجت أميرال .. كلية الشريعة

الحب المفقود .. كلية الشريعة

وزيرة الثقافة .. كلية الآداب
انا ماعندي اطلاع على كافة المرشحين مشان هيك رح احكي عن اللي بعرفن فقط
دموعة :من المعروف لدى الكثير من الاعضاء انها زبون مداوم بالعطل فقط وبايام الدراسة غير متواجدة فكيف يتم قبولها والاغرب اني ماشفت طلب ترشيح منها وانما من قبل احد الاعضاء
ساندي كلية التربية تقدمت بطلب وتم رفض الطلب من السيد فهد بداعي عدم الحاجة فاذا اسمها موجود بين المرشحين (الاسم موجود بين المرشحين مو يعني قبلت لانو رح يصير تصفية ومتل كل انتخابات لازم يكون في عالم براانا هيك قلت لحالي بالاول  )
مشرفوا الهمك (صارو عندك برسالة مستعجلة حتىلا اطرح أي امر بيخصني بهالموضوع  )
وبعد نقاش طويل بيطلع المشرف فهد ليقول بان كل المرشحين فازوا بالانتخابات (بزمتي انا وقتاصرت  متل اللي اكل 1000كف)
اذا هيك طريقة اختيار المشرفين بمنتدى جامعة دمشق بظن انو  واضح كتير لوين رايحين

اما الامر الآخر والاهم فهو التخبط اللي صاير بالمنتدى وكانو صاير متل الزر....كل واحد بيصيح من جهة وما في ولا مشرف متل العالم موجود حاليا كل واحد بيشتغل بمزاجية شكل ونص المشرفين غايبين وحتى الطقم الجديد ضعيف كتير
والضعف والتخبط  مو ناتج عن المشرفين كاشخاص ياسيد ياسر وانما بسبب حضرتك

المشرف العام واقع بين مطرقة الامن  وسندان الضمير(وصيتي الك من كل الموضوع لا تقرا غير هالجملة )

اغلب الناس عندما يتعرضون للازمات بيحكموا العقل او القلب في حل هالمشاكل وانت مو عرفان شو بدك يوم مافي سياسة ويوم (مسموح بالحوار السياسي ولكن من غير المسموح بالجدل )
بصراحة شبعنا كزب كل المنتدى صاير كزب بكزب
قال مسموح الحوار ولكن غير مسموح الجدل ...راحت ساحة الحوارات مشان الامتحانات  والتواقيع  اختفت .وغيرا...
الاستاذ ياسرباختصار  كان طوال الفترة السابقةيتصرف ويحكم  بالعاطفة دون العقل (عاطي مخه اجازة )
انا الآن اطلب منك ان تنهي قراءة الموضوع خلال 5 دقائق  بدون ماترد وان تنسى كفربطناوكل مايحصل خارج بابك  لمدة ربع ساعة وان تفكر لمدة ربع ساعة( فقط اطلب منك ربع ساعة من اجل منتتداك )بعقلك لا عاطفتك وان تعود بقرارات وحلول لكل مشاكل هذا الموقع وما بظن كل الحلول بدها اكتر من نص نهار لتنحل وبعدها تحط رد (بدون كزب ) تشرح فيه شو طلع معك
وانا اقترح عليك احد هالحلول الثلاثة
1 : ان تسمح بالحديث السياسي بكافة اشكاله بالمنتدى (وتطلب من كتيبة التقارير يجهزولك قاووش مرتب يليق بمقامك )
2 : تحط عالجرح ملح وتفصل احداث الموقع عن ما يجري في سورية و تمنع الحديث السياسي بكافة اشكاله بالمنتدى واللي بدو سياسة يروح عالفيس بوك
3 : تعمل زيارة لهالموضوع وتتخذ نفس الاجراءات وتصير عضو عادي متلك متل أي عضو بهالموقع
http://www.jamaa.net/art3472.html

اما ان يبقى هذا المنتدى خاضع لمزاجيتك ومزاجية مشرفيك دون قوانين تضبطه فهذا ما لا يمكن السكوت عنه

اقتباس

غرفة الدردشة بمنتداك متل الدستور السوري موجودة بالاسم فقط والمشرفة بعد غياب طويل رجعت بس مشان تحارب الفنان سامي واللي بعرفو انو مشرف الدردشة لازم يكون ذو تواجد دائم مو كل شهر مرة واذا ماكانت خرج تقدم استقالتا

الدردشة كانت كمالية من كماليات هالمنتدى وليست أساسية ..

في اي شي ضروري بتكتبه بموضوع معين .. وبييجيك الجواب ..

وبغض النظر انه الدردشة رح تسبب كتير من المشاكل بالوقت هلي مافي كادر من المشرفين يغطو الدردشة ل24 ساعة . ومتل ماذكرت مانها اساسية لهالمنتدى فأذا حابب تدردش لمجرد " الدردشة " في مواقع كتير سورية تفيدك لهاللشي .




ساحة الحوارات الجادة قبل ان تعود ساحة التسالي بفترة طويلة ومن بداية ظهور ظاهرة العلاك بكافة اقسام المنتدى قلنا للمشرف العام صار لازم ترجع ساحة التسالي وانو كل المنتدى رح يصير ساحة علاك

اقتباس

ساحة الحوارات الجادة قبل ان تعود ساحة التسالي بفترة طويلة ومن بداية ظهور ظاهرة العلاك بكافة اقسام المنتدى قلنا للمشرف العام صار لازم ترجع ساحة التسالي وانو كل المنتدى رح يصير ساحة علاك ماشاف من كل الموضوع وقتها غير جملة (هديك مرحلة مرت ونحنا ولاد اليوم والادارة قررت منع الحديث السياسي )وبلش متل الشحادين بقصة الولاد والعيال والآن ياريت ترجع ساحة الحوارات لانو (خلصت الامتحانات من زمان ورح تبلش امتحانات جديدة )

الأدراة الكريمة ماتوقعت وجود هكذا نماذج من العلاكين .. هلي عملوا صبغة كاملة بالعلاك .. ووين ماتروح تشوف ردودهن وتعليقاتهم البايخة .. وهاللشي كانوا محرومين منه بقسم التسالي بسبب عدم احتساب الردود .


وبالنسبة لساحة الحوارات الجادة برأيي مافي مشكلة انها ترجع يعني ممكن بالقريب العاجل .

اقتباس

التواقيع انا شفت منتديات كتير ولكن التعامل العسكري الموجود بهالمنتدى مابظن موجود باي منتدى آخر يازلمة معقول انت تطبق مبدا العقوبات الجماعية شو ذنب 90% من اعضاء المنتدى اذا 10% من الاعضاء مابتفهم والحل جاهز ومعروف ومابدو تفكير والسبب (نتيجة للتجريح والتجاوز بالتواقيع )

الردود السيئة ممكن اي عضو يقوم بأخفائها اما التوقيع للأسف يتطلب وجود المشرفين المخولين على هاللشي . وخلال التوقيع ممكن توجه اي رسالة انت بدكياها .. وبعدم وجود المشرفين على طوال اليوم ممكن هالتوقيع يسبب مشاكل ..

اقتباس

التقييمات السلبية صار لازم تشوف الحل المناسب بسرعة لانو كترت المشاكل من وراها

بالله في مشاكل .. ؟؟



معئول يكون في مشاكل ..؟؟


اذا كل واحد تقيم تقيييم سلبي وكان مخه وتفكيره سلبي فأنت بتعتبرها مشكلة بهالعضو ولا مشكلة بخاصية التقييم !!!!!  لك ويتقيم سلبي .. شو هالشغلة رح تساهم برفض فتاة احلامه مثلاً ..  ؟؟


ولا العضوة هلي عليها تقييمات سلبية رح تعنس ومارح تتجوز ... ؟؟

اقتباس

والاهم فهو التخبط اللي صاير بالمنتدى وكانو صاير متل الزر....كل واحد بيصيح من جهة وما في ولا مشرف متل العالم موجود حاليا كل واحد بيشتغل بمزاجية شكل ونص المشرفين غايبين وحتى الطقم الجديد ضعيف كتير والضعف والتخبط مو ناتج عن المشرفين كاشخاص ياسيد ياسر وانما بسبب حضرتك المشرف العام

التخبط هالمنتدى شي طبيعي وأقل من طبيعي لسبب غياب الكثير من المشرفين القدامى ولكل شخص اسبابه .. والطاقم الجديد ياسر معترف بأنه ضعيف .. بس عم يحاول يمشي المنتدى بأقل الخسائر الممكنة ..

والخيارات هلي قدامه كتير قليله فلهاللشي موجود بعض المشرفين هلي اخدوا الأشراف كسلطة عالأعضاء وصلاحياتهم  بهالمنتدى عم تستخدم بطعمة وبلا طعمة




-----------


وبالنسبة لحلولك فهيه اشبه بحلول ساكني المريخ .. !!



اولاً وآخراً .. اهم شي سلامة ياسر .. فالمنتدى لازال ضمن الرقابة .


المنتدى فيه تقصير وياسر معترف بهاللشي ..




بس ردك ......... عم حاول كون محترم .




فشكرا على حرصك عالمنتدى .




------------------------------

وياريت لو نفكر شوي شو نحكي قبل ما تطلع الكلمة منا

 

ياسر ...........
ياعيني عليك شو كبير وشو أخلاقك حلوة
يسلم إيديك عكل شي قدمتلنا ياه
تستحق منا كل الشكر والتقدير وليس العكس....
               
هذا المنصب لن يكون إلا لك ومن يعترض فليتفضل ويرينا ماعنده
                   
ولو أن هناك بعض التقصير فهذا لايبرر الإساءة ونكران الجميل
                   

                       


شو صاير هون

والله كرأيي أنا إنو نحنا حياتنا مو كلها تسلاية
ومنتدى مثلا
بإمكاننا نتوجه لأشياء تانية
وهذا يلي ذكر بالموضوع موسبب مقنع كافي,,
لانو كلنا منشهد إنو مو كل الذنب نحطو على ياسر
الله يعينه
يعني خذوا مثال تي -باغ شوفوا مستغربة كيف بقيان لهلأ بالمنتدى مع هيك هو فهمان كل القصة صح وعرف يتعامل معها

ولا الأخ محمد ياحرام شو تعذب معنا
بطعمة وبلا طعمة


باختصار
كل شي بتغير مع الزمن وكل شي إله حل
الاول إنو نبدا نغير من أنفسنا
والتاني التعاون والصراحة والنقاش للوصول لحل


وبالنهاية ما بدنا خناقات هون وبدنا رواء ع شوكولا




                     

اقتباس

ياريت يا سيد ياسر تشغل مخك ربع ساعة فقط

ما شالله حولك ! ! ! ! !
والله يا حبيبي كان فيك تختار غير هالعنوان
الله يعينك يا حج ياسر
لأنو إرضاء الناس غاية لا تدرك

كان أفضل لو تغيرت الكثير من كلماتك ..

ليس دفاعاً عن الأخ ياسر ..

ولكن عليك أن تعلم أن هذا الملتقى بجهوده الشخصية ..  والذي ما زال مستمراً منذ ستة سنوات " على ما أذكر .. "

وواجه صعاباً كثيرة .. ولكنه ما زال صامداً ويسير ..

قل لي ماذا تريد من الأخ ياسر ..

تعال لتكن مكانه .. وخاصة الآن .. فلن يكتمل الملتقى وكل هذه الضغوط ..

ولعلي شخصياً .. خالفت القوانين .. وتعرضت لبعض العقوبات ..

ولربما نعرف جميعاً ما يمر به الملتقى ..

والله لا أجد ما أكمل ..

فلعله أزعجني يوماً ما شيء فيه .. ولكن ... !!
...

أكثر ما آلمني هو .. طريقة كلامك ..

فهي مؤسفة بجد ..

 

تحيتي للجميع ..

أحمد

كل كلمة قيلت مردود عليها  ومارح رد على اي شخص انما هي رسالة وقد وصلت

ولكن عندي كلمة للسيد محمد : قصة الظهور واحد متلك بيفكر فيها وبالنسبة لخياراتك حطا لحالك واختار لانا انسبلك  وانت لو ماكنت متلي ماكنت ردت عليي بنفس طريقة كلامي 

(لاحظ رد تي باغ مع انو عندو قدرة اكبر منك بالرد على شخص متل نوعيتي)