لماذا لا نجعل الدراسة باللغة الانكليزية مثل كل الجامعات في العالم بصراحة لقد اصبحنا مهزلة في جميع الجامعات الاخرى                                     
                                               
                                                           

                              والله يا ريت بس متل ما انت شايف في كتير ناس
                              وخصوصا الطلاب بكرهو اللغة الانكليزية بشكل مو طبيعي
                            وما عندن استعداد يتقدمو خطوة لقدام ومن جهة تانية انا مع انو نتعلم الانكليزي بشكل موسع بس هادا ما بيمنع انو نترك لغتنا العربية لانو اللغة العربية لغة القران الكريم  .............وبشكرك ع الموضوع الحلو    
             
                                   

والله يا أخي الكريم الموضوع الو عدة أبعاد

1- وهو الأهم انو القسم الأكبر من دكاترة البلد عنا غير مهيئين لهيك موضوع....لأنو تقريبا 90% منن أكتر أو أقل شوي دارسين بدول الاتحاد السوفييتي سابقا....يعني لغتهم روسية بامتياز وما بيعرفو غير كم مصطلح انكليزي وبيخطئو فيهن كمان

2- وفي حال توفر الدكاترة المؤهلين الموضوع بدو اعادة هيكلية لكل النظام الجامعي....من كتب ومحاضرات ونوط....والدكاترة حاليا بنسبة كبير منن عم يعتمدو على كتب الدكاترة اللي قبلن وبس بيغيرو الاسم....او على مراجع روسية مترجمة للعربي...


بقى اذا كم دكتور اقترحوا الفكرة...جماعة روسيا رح ينطو ويعترضو



3- الطلاب ضعاف كتير بالانجليزي....يعني بدك تغير النظام بالمدرسة بالأول لتوصل للجامعة




والأسباب بتطول وبتطول


ولو اني من لما دخلت عالكلية بتمنى الانجليزي.....ولكن سوريا مع التعريب....لأسباب متل ما قلتلك طويلة وأكبر من اللي ذكرتها فوق



بتمنى تكون وضحتلك الفكرة




مجد

انا مع الفكرة 100% وبقترح تعملوا تصويت عليها!!!

يعني نحنا الوحيدين اللي لساتنا عم ندرس بالعربي!!! بينما كل الجامعات بتعطي المناهج كاملة بالانكليزي!!
ومشان الطلاب الضعاف..في دورات تقوية كتير

بتمنى ينعمل تصويت

وكمان بالنسبة للدكاترة (خريجي الاتحاد السوفيتي)      هو المفروض يكونوا متقنين لل لغة وإزا لاااااااااااااأأأ.. بتنحط الادارة  أمام الأمر الواقع !!وهي بتلاقي الحل مو نحنا


نشالله يتاخد هيدا الامر بجدية  

بس سؤال هل الجامعات في المانيا و فرنسا وغيرها تدرس مناهجها باللغة الانكليزية ؟؟ راح اقول انو نحنا مطرين نحسن لغتنا الاجنبية لحالنا و اللغة راح تلزمنا ضروري بس اذا بدنا نشتغل برا 
الملخص انا مو مع التدريس المناهج باللغة الانكليزية بس لانو الجامعات الخاصة عناوبعض جامعات الوطن العربي هيك بيعملوا  نحنا يلي لازم نتعب على حالنا مشان نطور لغتنا الانكليزية أو الفرنسية
تـــــقبلوا مروري

هي الفكرة منيحة وبتساعد الطلاب للي بدن يكملوا ماجستير لأن عم يكون دراسة هدول الطلاب هي المراجع الأجنبية, بس مستحيل تصير هي الفكرة  بين يوم وليلة يعني cutie التصويت شو بدو يفيد ومشان دورات التقوية العلة مانا بالطلاب لأن هي الخطوة كبيرة و بتحتاج دراسة لسنوات والتطبيق لسنوات و هادا السبب برجع للأسباب للي ذكرها الأخ مجد .
تقبلوا مروري

والله يا pinky girl التصويت هو مجرد اقتراح مني لحتى نشوف شو رأي الطلاب (مين مع الفكرة ومين ضدها ) مو أكتر!!!

بعدين الواحد منا إزا بالمستقبل حب يسافر ويشتغل برا فأكيد رح يعاني (لأن المصطلحات اللي بيعرفها ما رح تكون كافية).. ونحنا لازم نسعى ونمشي لقدام مو نضل (مكانك راوح) او نرجع رجوع!!!
وحتى لو هيدا المشروع ضل سنين ليتنفذ.. المهم انو يتنفذ لأنو ما بيضر الطلاب بالعكس هو لمصلحة الجميع
بالنهاية هيدا رأيي انا ومابطالب حدا يتقبله بالرغم عنه

آسفة cutie إزا فهمتي كلامي غلط أنا ماني ضد الفكرة بس كنت حابة بين حقيقة الواقع للي عايشين فيه و أنا ما طالبت أنو نضل مكانا بالعكس أنا مع التطور.
و أنا أصلاً ماني معترضة رأيك بالنهاية كل واحد له رأي و هو حر فيّ .
و أسفة إزا انزعجتي مني.