بحياتي اشياء كتيرة .. زمان كانت بنظري بريئة و عادية . و لما كبرت لقيت تفسيرها كتير قاسي علية  لانو فهمت و صرت استوعب حقيقة هالامور اكتر .. 

زمان  كنت مفكرة انو الموت ما بيجي الا اذا كبرنا بالعمر ... و لما كبرت عرفت انو الموت حق على كل صغير و كبير  .. صرت اخاف منه و انتظره بكل لحظة ... عرفت و يا ريتني ما عرفت  .

زمان كنت مفكرة انو المرة بتحمل  بس لانها متزوجة ..... و لما كبرت و فهمت عرفت كيف المرة بتحمل و بتولد .. و عرفت و ياريتني ما عرفت .

زمان  كنت مفكرة انو الرجل ما في بحياته الا زوجته و بس ... و لما كبرت و فهمت  عرفت انو اغلب الرجال لازم يكون بحياته اكتر من وحدة .. عرفت و يا ريتني ما عرفت ؟

زمان كنت مفكرة انو  معاملة قريبنا او مدرسنا معي نوع من انواع العطف الابوي ... بس لما كبرت و فهمت  عرفت انها من انواع التحرش الجنسي ...  كرهتهم و عقدوني ... و عرفت و يا ريتني ما عرفت .

زمان كنت مفكرة انو الرجولة موجودة باي رجال .. كبرت و عرفت معنى الرجولة الحقيقية ..  عرفت و ياريتني ما عرفت .

زمان كنا دايما نغني ( تحيا الوحدة العربية ) ... كبرت و فهمت انها اغنية و بس .. عرفت و ياريتني ما عرفت .

زمان كنت افرح باي قرار لمجلس الامن ... كبرت و فهمت و عرفت شو هو مجلس الامن ... عرفت و ياريتني ما عرفت .

زمان كنت  مفكرة انو الخير لازم ينتصر بنهاية كل فيلم .. كبرت و فهمت و عرفت انو الافلام كلها اوهام ...
عرفت و ياريني ما عرفت .

زمان  كنت مفكرة انو البنت المحافظة و الي ما عندها تجارب  أي شب بيتمناها .. كبرت و فهمت انو هالبنت بنظرهم معقدة .. عرفت و ياريتني ما عرفت  .

صار عمري 28 سنة ... و لسه بكتشف اشياء جديدة ... و كل الاشياء القديمة ملامحها تشوهت  ... و متأكدة في اشيا تانية رح تتشوه

و عرفت و ياريتني ما عرفت

( عرفت وياريتني ماعرفت )  بالعكس إشكري الله إنك عرفت عشان تعرفي تتعاملي مع هي الأشياء كلها بدراية وحذرو أهم شي بمعرفة

zmzm

المعرفة صح منيحة ... بس تشوه اشياء حلوة هي المصيبة ..

كل ياتنا متلك كنا نعرف إشيا معينة و مفكرينا هية الكمال و المثالية

و بس كبرنا منكتشف غير هيك و كل يوم منعيش بصدمة جديدة لانو

منكون عم نعرف حقيقة شي نحنا من زمان ما كنا منعرفو

و احلى شي عجبني
زمان  كنت مفكرة انو الرجل ما في بحياته الا زوجته و بس ... و لما كبرت و فهمت  عرفت انو اغلب الرجال لازم يكون بحياته اكتر من وحدة .. عرفت و يا ريتني ما عرفت ؟

زمان كنت مفكرة انو الرجولة موجودة باي رجال .. كبرت و عرفت معنى الرجولة الحقيقية ..  عرفت و ياريتني ما عرفت

(2)


زمان  كنت مفكرة انو الصداقة الحقيقية بتجمع بين اي تنين ما بيكون وراها اشي هدف و انها بتصير بشكل عفوي ... بس لما كبرت و فهمت ما لقيت حد  منهم جنبي الا اذا بده مصلحة مني ...
و عرفت انو الصداقة هي صداقة المنفعة و المصلحة .... و عرفت و ياريتني ما عرفت .



زمان كنت مفكرة انو في حب صادق و حقيقي و طاهر ... بس لما كبرت و فهمت عرفت انو الغرائز هي الي بتحرك الحب بين اغلب الشباب و الحب الحقيقي انتهت صلاحيته ... و عرفت و ياريتني ما عرفت .


زمان علمونا انو الاسلام هو دين التسامح و الرحمة ... بس لما كبرت و فهمت لقيت  الدين تشوه .. و نظلم من كتار ناس ... و صار هو رمز للارهاب و العنصرية ... و عرفت و ياريتني ما عرفت .


زمان كنت احب احلم و احلم و احلم ... بس لما كبرت و فهمت لقيت انو مش من حقي احلم ...

و عرفت و ياريتني ما عرفت .

أختي وعزيزتي
صح نحنا ما رح نقدر نغير كتير بهالأمور
بس على الأقل غيري بنظرك وبمحيطك والأمور الربانية واقع بدك تآمني فيه
والحلو بالحياة أنك تطمحي لمعرفة كل شي مخبأ ما منعرفوا
وبشكرك على موضوعك حلو كتير بس بدو رشة أمل

الفن التشكيلي طموحي

و الله خوف ما يقولي عني معقدة عنجد حطيت كلمة اغلب بكل فقرة كتبتها عن الرجال .... لانو يقيني عنهم افظع من هيك 

(3)



زمان قالولنا بالمخيم انو جارنا ابو معتز مات شهيد .. و كل ما بروح عالمقبرة بقرا على قبره الفاتحة ... بس كبرت و فهمت ... ضليت اروح بس ما لقيت شاهد على قبره .. عرفت انه نقتل لانه كان جاسوس ... بعدني بروح عنده و بقرا الفاتحة ... بس عرفت و ياريتني ما عرفت .


زمان كنت كل مرة اشوف فيها الشيخ عبد الفتاح امام مسجدنا .. اقول يارب ارزقني بزوج متله ,,, بس كبرت و فهمت قالتلي مرته انو مجننها بالبيت  و ما بيراعي  الله معها ....

عرفت و يا ريتني ما عرفت

كثيرة هي الأمور التي يكتشفها الشخص و يرى نفسه انه قد غبن بها

لكن مع ذلك قد يكتشف انه مغبون أيضاً في بعض اكتشافاته

هذه نظرة شخصية و ليست موضوعية قابلة للتغير و التبدل بتقلب الظروف و الأحوال

تحيتي ...

اشكرك دوفي على الموضوع الرائع والمميز متلك وحقيقة يحمل في طياته امور عظام وكلام حساس ولكن :
هي الدنيا تقول بملى فيها            حذاري حذاري من بطشي وفتكي
فلا يغرركم من ابتسام                      فقولى مظحك والفعل مبكي
اتمنى لك التوفيق والنجاح في الحياة علما انى لا اوافق على النظرة السوداوية للحياة فهي جميله وحلوة لمن عرف حق الله ثم حق نفسه فيها .
ثانيا لا اوفق على ان ( زمان كنت مفكرة انو معاملة قريبنا او مدرسنا معي نوع من انواع العطف الابوي ... بس لما كبرت و فهمت عرفت انها من انواع التحرش الجنسي ... كرهتهم و عقدوني ... و عرفت و يا ريتني ما عرفت ) لان التعميم خطا وربما مريتى بموقف او تصرف ولكن الاصابع ليست سوا .
تقبلي مروري مع كل الحب والاحترام والتقدير
خالد111