أنا مو طالب رياضيات ولا غيرو
عندي رفقات رياضيات
الدراسة حلوة للي بيحبها
بالنسبة صعبة ولا لأ  . . رياضيات  . .
حسب قدرتك فيها
على كل حال أهلاً وسهلاً فيك
وإن شاء الله الله بيوفقك للي يريحك
أحمد

أول شي مبروك
ببساطة إذا بتحبها فوتها
أنا طالبة رياضيات وهلا صرت سنة تانية بلا ماأحمل شي علماً انو دراستي كانت مش ولا بد
يعني إذا عندك شوية خلفية فرح تحس الأمور سهلة كتير
بس متل ما قالت dream شوف مدى تطابق المناهج بين البلدين مع انو حسب وجهة نظري الرياضيات حلوة وسهلة وين ما رحت
good luck and hope 2 see u with us in the next year

مرحبا اخي
اول شي مبروك التخرج

بنسبة لقسم الرياضيات بشوفة قسم متل باقي الاقسام

بس ببساطة بيتميز هذا القسم بالخصائص التالية :

1) إن الرياضيات لغة تمتاز عن اللغة المعتادة بدقة التعبير ووضوحه وإيجازه .
2) إن الرياضيات من حيث الموضوع لها مميزات خاصة في تنمية التفكير الموضوعي وذلك ببروز الناحية المنطقية ولوضوح حقائقها وخلوها من العوامل العاطفية التي تؤثر في استخلاص النتائج .
3) الرياضيات هي الطريق إلى التفكير في هذا العالم فهي اللغة التي تتكلم بها العلوم الطبيعية
4) الرياضيات تعتمد اعتمادا كليا على اللغة الدقيقة والمنطق الرياضي السليم وتعمل على تعليم الطالب التفكير السليم والعمل القويم

في احلا من هيك

ع فكرة انا كنت بدرس فيزياء بس حولت لقسم الرياضيات

ما اخفيك لدراسة الرياضيات طعم تاني

  "كل شي او لة حل"

                                أهلا و سهلا فيكي و ألف مبروك النجاح
مشان سؤالك عن الرياضيات أنا طالبة سنة أولى و الحمد لله ترفعت عالثانية بس بعد مجهود كبير و نصيحة إلك إذا بدك تدخلي رياضيات لازم تحطي ببالك الدراسة المتواصلة أنا ما عم أقول هيك مشان أخوفك بس مشان تكوني أمام الحقيقة اللي أكتشفتها لأنو موادنا بدها متابعة دائمة و إذا كان عندكي خلفية و حب لهلمادة فأنا أنصحك بدخولها لأنو مهما كان فيها صعوبات بس رح تشوفي لذة بدراستها و أتمنى إلك التوفيق        

شكراً لكل مين رد علي

والحمد لله خليتوني اتفاءل 

بس سمعت من بعض الناس إنو الرياضيات صعبة كتير إذا ما كنت عبقري

وإنو في شوية ظلم بالعلامات

وأختي dreams ما فهمت عليك مشان موضوع الآله الحاسبة 

وياريت تشرحولي عن القسم بالتفصيل على اعتبار إني جاي من برا وما بعرف راسي من رجلي >>>ههههه

صديقتي
انا طالبة رياضيات ترفعت عالسنة التانية ومامعي ولا مادة وبصراحة الدراسة كتير حلوة وماكنت متوقعة اني رح انبسط هيك والمواد كتير حلوة صحيح فيها صعوبة بس اذا عندك شغف للرياضيات فكل شي بينحل

وحتى الدكاترة ماشي حالون وحبابين واذا بتسأليون اي سؤال بيجاوبوكي
فنصيحة فوتي هالفرع ولا تترددي
سلام
تحياتي المحملة باللوغاريتمات والتكاملات

السلام عليكم أختي (أخي ) qqwwqw  - بصراحة احترت -
- بالنسبة للفرع هو سهل إلى حد ما وممتع ليلي بيحبه ومستعد يشتغل فيه، وبالمقابل هو ممل جداً جداً جداً  وصعب على يلي ما بيطيء الرياضيات وداخل هالفرع لأنوا ما طلعله أحسن منه.
رح احكيلك عن المواد بالتفصيل:

- السنة الأوولى:

  * التحليل (1) فصل 1 : يبحث في المتتاليات وتقاربها والمتسلسلات وتقاربها والدوال واستمرارها ونشرها.
  * التحليل (2) فصل 2: يبحث في التكاملات المحددة وغير المحددة وتطبيقاتها في حساب المساحات والأطوال.(ممتع جداً)
  * الجبر الخطي ( 1) فصل 1: يبحث في المصفوفات والعمليات عليها والفضاءات الشعاعية والمعادلات الخطية وحلولها.(حلو)
  * الجبر الخطي (2) فصل 2: يبحث في الحدوديات والفضاءات الذاتية والفضاءات ذات الجداء الداخلي وغيرها.( لاتخف من أسماءهن موصعبين كتير)
  * الهندسة التحليلة فصل 1: مادة حلوة و موصعبة ودكتورتها كتييييييير منيحة بس ما بعرف شو بدي احكيلك عنها بتحكي عن المستقيم والمستوي والجداء العددي والخارجي...
  * تحليل المتجهات فصل 2: بتشبه الهندسة التحليلية فيك تعتبرها تتمة الها.
  * مبادئ الاحصاء والاحتمال فصل 1: اسمها يغني عن الشرح ، ( هي بيسمحولك تدخل الآلة الحاسبة فيها)
  * اللغة الأجنبية( 1 )فصل 1
  * اللغة الأجنبية( 2 )فصل 2
  * الثقافة القومية الاشتراكية فصل 2
  * اللغة العربية فصل 2
  * مبادئ عمل الحواسيب فصل 1
  * خوارزميات وبرمجة( لغة الباسكال) فصل 2
- السنة الثانية:
  * تحليل 3 فصل 1: بيشبه كتييييييير التحليل 1
  * بنى جبرية 1 فصل 1: تبحث في نظرية الزمر
  * تحليل 4 فصل 2 : يبحث  في الدوال ونهاياتها واستمرارها
  * بنى جبرية 2 فصل 2: تبحث في الحلقات والحلقات التبديلية
  * لغة أجنبية 3فصل 1    ( علمية )
  * لغة أجنبية 4 فصل 2  ( علمية)
  * تبولوجيا (1) فصل 2 : تبحث في المجموعات المفتوحة والمغلقة والفضاءات المترية وفضاءات الجداء الداخلي والفضاءات المنظمة .. (بعض مواضيعها تشبه مواضيع في تحليل 4)
    * تحليل عددي (1) فصل 1 : يبحث في حل المسائل المعادلات بطرق عددية وحساب الأخطاء في هذه الطرق (كمان هي المادة لازم تدخل معك فيها آلة حاسبة)
    * ميكانيك 1 فصل 2: قريبة جداً من الفيزياء وفيها ابحاث بتشبه بعض أبحاث الميكانيك بالبكالوريا( مثل حساب السرعات والتسارع والحركات المستقيمة والمتغيرة والمتغيرة بانتظام ....)
  * لغات برمجة ( لغة c++) فصل 1
  * معادلات تفاضلية 1 فصل أول:  مضمونها متل اسمها وهي مادة ممتعة كتييير وحلوة ودكتورها ممتااااز
  * معادلات تفاضلية 2 فصل 2: تبحث عن حل المعادلات التفاضلية باستخدام المتسلسلات وحلول المعادلات التفاضلية بطرق أخرى... كمان حلوة
هدول يلي بعرف عنهن للآن
وأما سؤالك عن الآلة حاسبة فمثلاً في آلات حاسبة تتضمن رسم خطوط بيانية ، أو تتمتع بخاصية إدخال القوانين عليها أو فيها أصلا قوانين مبرمجة يعني بتطلع النتائج بدون شغل أوتعب . فهذه التقنيات غير مسموح بها.
وأما المسموح بها فهي العمليات الأربعة، العاملي، الجذور، القوى، العدد النيبري، اللوغاريتم  هدول يلي بعرفهن أنا.
انشاء الله كون فدتك بشي.... أنا عم اعمل جهدي لأنقل رسالتي...

      مرحبا qqwwqw قبل كل شي بحب باركلك عالنجاح بالبكالوريا
                                  وعقبال تخرجك بالجامعة
                   
                      مابدي أحكي كتير منشان ماطول
    أكتر شي بد يقلك ياه قبل ماتقرر شوبدك تفوت شوف رغبتك شوبدها
                    طبعاً ماعمقلك أنو مالازم الواحد يتردد
التردد أحياناً مطلوب لشغلة مصيرية متل هي

وبحب طمنك أنو الرياضيات مافي أسهل منها
وخصوصاً إذا كان الطالب من هواة الرياضيات (يعني مخو رياضي)

على فكرة أنا طالب إحصاء عملت مقارنة بسيطة بين الرياضيات والإحصاء يمكن تستفيد منها
هي بمنتدى العلوم الرياضية تحت عنوان (خاص جداً لجميع طلاب الإحصاء)

تحياتي إلك أخ أو أخت qqwwqw  مابتفرق
ومنتمنى تكون بيننا السنة الجاي ونشوف أحوالك تمام مع الرياضيات

          تقبل مروري