والله يا شام القصة مو قصة خيار وفقوس.....القصة قصة سياسات عليا ونظام
بقى انت روقي عليي وشوي وما بتكوني الا رضيانة وحياة عيونك وحياة عيونك بترك منصبي وبعطيكي اياه
..........
الكويت...الكويت
لك دخيل رب الكويت ما احلاها
الكويت ....المركز العلمي....والله حافظون اكتر من اسمي
انا عشت 15 سنة بالكويت وصرلي سنتين هون مشان الجامعة
بس حالي متل حالك يعني اهلي لساهن بالكويت وانا كل كم شهر بطلع لهونيك
ما فيني استغني عن حبي.....الكويت.....وهلأ صارت الشام حبي الجديد...بس ما تخليت عن القديم م
انا كنت بمدرسة الجميل الاهلية بالنقرة...بس هلأ صار اسمها الاكادمية العربية الحديثة

ومشان البكالوريا...يعني والله لو انك ضالة هونيك احسنلك..مين اللي نصحك بالجية الله يهديكي
انا جمعت 96%

شو عرفتيني؟؟؟؟؟؟؟؟ 


 

والله يا ام محرقصة....يعني الشغلة مو شوربة
بس انتي تكرم عيونك....الك منصب معتبر((صرت عم وزع  مناصب على ابو جنب))
يعني انتي بنت دفعتي وبتعرفيني وانا ما بعرفك....اقل منها يعني

ومشان الموعد والله انا بحترم خالد صاحب الموضوع...ولازم بما انو هو صاحب الفكرة لازم هو اللي يحدد

بس انا برأيي يكون الموعد بوقت ما فيه ذروة
يعني يا امها الضهر يا اما بالليل متأخر مشان ما نموت ونحنا عم نتصل

بقى بانتظار خالد..وما بدنا هالموضوع يطول...يعني رحتصير القصة اطول من مسلسل نور
   

خلص وانا كمان عم استنى خالد (( المهندس المخطط )) لحتى يحددلنا معاد
المهم اني ضمنت منصب (الله يخليلنا الواسطة) مو هيك مجد؟؟
لا تطول علينا خالد نحنا بانتظارك

لك تكرم عيونك احلى واسطة لعيونك.....ولو نحنا المدنية عنوان الواسطة الاخوية

شو كم ام محرقصة عنا...على راسي بنات دفعتنا والله

له يا نارت سلامتك
طول بالك ما بدنا لا حكة مزمنة ولا فضول شديد
صحيح انا من دفعتك بس انا رسبت سنة اولى وبعدين حتى لو قلتلك اسمي ما رح تعرفني مشان هيك طول بالك الشغلة مو مستاهلة

بعدين ازا مجد بدو يعملي واسطة لشو تقطع بنصيبي؟؟
ماتكون غيران ؟؟ قلو واكيد بيتوصتلك انت كمان
وبرجع برحب فيك هون معنا بالمنتدى من جديد  

خلص نارت ولا يهمك جبتلك معي دوا للجرب

ومشان ميمي(شكرا للموافقة)..لازم نسميها ام مُحرقِصة

وتكرم عيونك يا ميمي الك احلى واسطة......وبما انك عملتي واسطة لنارت..رح دبرو بشي شغلة بعيلتنا...يعني آذن منيح ولا مانك قدها
 

ياجماعة أنا موجود في كل يوم ومالي هربان
بس بحب أحسب أي خطوة قبل ما أخطيها ولازم تكون ناجحة مية بالمية
ومع ذلك بما أنو في بعض الحماس منكم فأنا رح أخطيها


وأنا جاهز وعندي اقتراح
شو رأي أفراد عيلة المدني كل واحد متحمس للفكرة أنو يبعتلي رسالة مستعجلة

يأكدلي هالشي ويعطيني الوقت اللي بيناسبه
وأنا بعدين بشوف الوقت اللي بيناسب الكل مشان
أنو نتناقش بالشات عن المناصب

واذا حصل هالشي ف رح يكون نقلة نوعية بالشات بهالمنتدى واول اجتماع مسبق

انا بتمنى انو تساعدوني بهالشي

لا والله يا مجد ما عرفتك والهيئة ما رح أعرفك على كل حال أنا كنت بمدرسة التفوق بالرميثية إذا بتعرفها وأخي هلأ بالإخلاص يلي بالسالمية ...
و مشان يلي نصحني هو بابا قال هيك أحسن ..  
    .

حلو يا خالد...بداية ناجحة
بس بتعرف انا جربت الدردشة شي 5 مرات وفي مرتين منها ما فتحت معي
كل ما يعمل تسجيل يرجع يطلع ويكتبلي سجل من جديد

وتكرم عيونك احلى رسالة صاروخية لعيونك