السلام عليكم

اليوم صارت معي قصة اكتشفت انو بأي مهنة فيها اشخاص من اصحاب المهنة مو فهمانين فيها  اجتني وصفة فيها خمس ابر روسيفلكس عيار 1000 وللأسف بلاقي الدكتور كاتب طريقة الاستخدام:

ابرة بالوريد تُحل بـ لدوكائين1%  

قمت قلتلو للمريض هالحكي غلط مابيصير ينعطى الليدوكائين بالوريد روح لعند الدكتور واتأكد
قام قلي رحت لعند الدكتور واتأكدت من الوصفةقمت انا رفضت طبعا اعطيه

وقلتلو روح لعندصيدلية تانية قام قلي المريض هي خامس صيدلية بروح عليها

ومابيرضوا يعطوني الوصفة الله يخليك صلحيلي الغلط وعطيني ياها قمت عطتو مي لحل الابرة بدون مخدر

يلي بيعيش كتير بشوف كتير


وعنجد عم يجي لعندي كتير مرضى ضغط بدهون دوا احتقان وانا ماعم ارضى اعطيهون ليروحو لعند الدكتور
يا حرام والله زعلت عليهون أغلبون بيقولو معقول نروح عند دكتور مشان دوا احتقان بصراحة مشتهية اكتشف شي دواللاحتقان للمرضى يلي عندون ضغط    

آسفة عالاطالة بس سؤال من بعد اذنكون:

المطهرات المعوية متل ايرسيفوريل_ميديوفوريل........

الأفضل تناولها قبل الطعام ولا بعد الطعام
   

((ابرة بالوريد تُحل بـ لدوكائين1%))

أكيد الدكتور مخربط بين العضل والوريد


أما منشان الاحتقان فحتى لو راح عند الدكتور عأساس الدكتور شي شغلة بيقلوا ما بيأثر ..!

طبعاً بس الفرق بين الصيدلي والدكتور أنو الأول يحاسب على كل صغيرة أم االثاني فلو أدى خطؤه إلى موت المريض فلا مسؤولية وكله قضاء وقدر ..

أنا بنبه المرضى وبظن ما كتير بيأثر إذا الضغط مضبوط جيداً وطبعاً مع التنبيه إلى متابعة الضغط !!

المطهرات المعوية يمكن قبل الأكل

السلام عليكم

مريض الضغط ممكن ياخد مضاد احتقان موضعي

لأن الكمية الممتصة للدوران قليلة جداً

وكمان ممكن ياخد مضاد احتقان فموي مع التأكيد على تناول دواء الضغط بموعده

إلا إذا كان عندو فرط ضغط خبيث هون بصير في خطر مع أدوية الاحتقان

                                 
===============
                           
بالنسبة للأدوية يلي ذكرتيها فحاولي تشوفي بالنشرة شو ذاكرين
                                       
ما عندي فكرة إذا كان الطعام بأثر على فاعليتها

السلام عليكم
هلأ انا متفاجئة أكتر شي ... لأنو  لازمت السنة الماضية وهالسنة عم انزل عالصيدلية بس مالي عم حس حالي عم استفيد وماعم شوف حالات من اللي انتو عم تشوفوها  , لأنو الصيدلانية مابتخليني قرب على شي اسمه وصفات بنوب  يعني كل قعدتي عم تكون بس لأفتح علب الأدوية وشوف المعلومات عن هالدوا , وبصراحة شي بيملل كتير ,  وحتى لما كنت بدي غير وروح على صيدلية تانية كان الشرط الأساسي انو ماوقف فوق راسه (( من وجهة نظره انو اذا كنت بدي شوف الوصفة فبكون واقفة فوق راسه )))
وبصراحة مالي عم افهم ليش هيك عم يعملوا الصيادلة يعني انا شو بدي اعمل لحتى اتعلم !!!!!! والله كرهوني شي اسمه صيدلية :(( 

اقتباس

مضاد احتقان موضعي لأن الكمية الممتصة للدوران قليلة جداً

على ألا تزيد المدة عن 5 أيام على الأكثر .................

====================

اقتباس

لازمت السنة الماضية وهالسنة عم انزل عالصيدلية بس مالي عم حس حالي عم استفيد

طبيعي جداً ...
على قولة الصيدلي يلي عم لازم عندو .... فحالكم سألته نفس السؤال ...

فيك تشبهي ممارسة المهنة بالصيدلية متل خزان ماء يدخل الماء إليه من الاسفل ... وفي الأعلى فتحة ... فإذا انتلى الخزان بيصير بيطلع الماء من الأعلى يعني دليل الإمتلاء .... وكمان نفس الشي الخبرة بالأدوية مارح تحسي أنك لح تستفيدي إلا بعد فترة ... وبتحسي يومها في اختلاف كبير ....  بين الأيام الأولى و الأيام تلك

اقتباس

يعني كل قعدتي عم تكون بس لأفتح علب الأدوية وشوف المعلومات عن هالدوا , وبصراحة شي بيملل كتير

ييييييييييي  أكتر شي بكرها هالشغلة ... كنت ساويها أول شي ... بس بعدين داق خلقي ....

اقتباس

وحتى لما كنت بدي غير وروح على صيدلية تانية كان الشرط الأساسي انو ماوقف فوق راسه (( من وجهة نظره انو اذا كنت بدي شوف الوصفة فبكون واقفة فوق راسه )))
وبصراحة مالي عم افهم ليش هيك عم يعملوا الصيادلة يعني انا شو بدي اعمل لحتى اتعلم !!!!!! والله كرهوني شي اسمه صيدلية :((&

ياهيك الشرط يا مابلا ...


يللا اصبري شوي .... هانت ولح نتخرج بإذن الله


   

بلسم مشان الأدوية اللي ذكرتيها.. بزمانو قال مراقب أدوية إنو بتتاخد قبل الأكل بس وقت سألت الصيدلاني قال لي مع إنو المفروض تتاخد قبل الأكل بس عم تساوي اضطرابات عند المرضى لهيك يفضل بعد الأكل.. وأنا هيك باخدها وبستفيد عليها

والله يا ياقوت برأيي روحي غيري هالصيدلية لأنو إذا ما تعلمتي عالوصفات ما رح تستفيدي كتير لأنو في وصفات بتتكرر عندك فبتقدري من خلالها إنك تعرفي الحالة والعلاج الأمثل إلها..

و حاولي تنقي صيدلية شغالة مشان تتعلمي أكتر.

بس إنو والله شي غريب لشو هالنفسيات للصيادلة شو ماكانوا طلاب؟؟!..

يالله أمري لله إذا عبتتعتروا هيك

خلص بخليكم تلازموا بصيدليتي



بس ما بدي حدا يوقف فوق راسي
 

آيرون مان.. شو يعني فتحت صيدلية؟!

إن شاء الله مبارك

                                                                         

                                 

اقتباس

بس ما بدي حدا يوقف فوق راسي

والله إذا ما في مكان بالصيدلية فما عنا خيار غير نوقف فوق راسك 

يعني قصدي أنو نزعجك ..... لاتفهم غلط ... اصحك .... حاكم بدي استعير منك كتاب الملازمة ... وبعدين ازعال قد ما بدك .............


=======================

أحلى شي مرة اجى واحد محشش بدو بروكسيمول يلي حرموه دولياً .... فمن شان ما يتعذب معو الصيدلي  ويحكيلو عن أضراره ومشاكله ... قلو :

صار بدها ورقة من الأمن الجنائي ... وبعد ما تجيبها ... بتجي لعنا لأعطيك ياه ...
فالزلمة صار بس بدو يطلع من الصيدلية وقت سمع أمن جنائي .....


   

ياقوت بسيطة حبيبتي طولي بالك والله مرحلة فتح العلب وشوفة الوراق يلي بقلبها مريت فيها ومتت مية موتة لحتى خلصتها

بعدين مشان الله كل شي الا الحكي عالبروكسيمول

لأني اكلت رعبة مرتبة من ورا هالدوا

ولولا فضل الله انو عاملين بين الصيدلية والسوبرماركت يلي قدامي جرس كنت هلأ ميتة وبالعالم الآخر مشان بروكسيمول

كنت قاعدة فات شخص مبين عليه مرتب ومحترم طلب بروكسيمول قلتلو ماعندي آم

بلش يعلى صوتو قمت قلتلو تفضل لبرا ماعندي بروكسيمول قام قال انا بعرف وينو بدي

جيبو اجباري قمت رنيت الجرس قام اجى صاحب سوبرماركت شحطو هو وشغيلتو

وطلعوه برات الصيدلية بس انا شو اكلت رعبة لهلأ مابنساها عن جد من وقتها ادركت صعوبة انو تقعد بنت لحالهابالصيدلية ومن وقتها صرت باخد معي شي واحد من اخواتي  

السؤال اذاممكن:
اذا ولد عمرو سنة وعم ياكل تراب وعندو اسهال بلون اخضر شو أفضل شراب  نعطيه مطهر معوي متل ايرسيفوريل ولا فلاجيل ولا شو