السلام عليكم:

اقتباس

بفرط نشاط الدرق بتكون الرقبة حول الرغامى كبرانة ومحززة تقريباً وجحوط بالعينين أما هي فحالة نكاف "أبوكعب"

صحيح...

وبالنسبة للحمى القرمزية أنا حطيت رابط فيه معلومات عن المرض والعلاج

العلاج هو البنسلين أو الاريترومايسين  في حال التحسس على البنسلين

بالإضافة لمسكنات وخافضات حرارة

والنكاف علاجو مثل ما قالت غولدن بيل..

بس كإنو هاد الولد عيونو فيها جحوظ

مدري هو عيونو كبار زيادة



والله انا ما بحب قصص التشخيص

حطوني مع الادوية بفهم أما شي إلو علاقة بالتشخيص فمالي بهالمجال بنوب

منيح ما تورطت وفتت طب

كنت خليت نص المرضى يحكوا مع حالن

السلام عليكم:

اقتباس

بس كإنو هاد الولد عيونو فيها جحوظ مدري هو عيونو كبار زيادة

هو عيونو كبار ماشاء الله..

بس أنا كمان كنت ذاكرة انو عندو ارتفاع حرارة وهاد مابصير بسبب الغدة

بس بوجهنا لامراض التهابية أو إنتانية

اقتباس

منيح ما تورطت وفتت طب كنت خليت نص المرضى يحكوا مع حالن

على سلامتك.. يعني يلي درسو طب بشو أحسن .. كلو ع الممارسة بصير سهل

:::::::::::::::::::::::::::::::::::::::::::::::::::::::

مرة انذكر مضاد حيوي اسمو peflacine فيو حبتين بس وبيتاخدو سوا

اليوم كنت عم أقرأ انو السيلان البني غير المختلط ممكن معالجتها بجرعة مفردة

اقتباس

بس أنا كمان كنت ذاكرة انو عندو ارتفاع حرارة وهاد مابصير بسبب الغدة بس بوجهنا لامراض التهابية أو إنتانية

من أعراض فرط نشاط الدرق ارتفاع الحرارة نتيجة زيادة الاستقلاب بالجسم

يعني ارتفاع الحرارة مالو خاص بالأمراض الاتهابية....

بس حبيت علق مشان المعلومة

اقتباس

على سلامتك.. يعني يلي درسو طب بشو أحسن .. كلو ع الممارسة بصير سهل

مو قصة أحسن

القصة قصة ميول و رغبة

يعني أنا بحب الصيدلة أما الطب فمالي رغبة فيه من زمان....

السلام عليكم

المظهر لأي حالة كتير مهم للتشخيص

بس كمان مو كل شي
                                       
لأنو في حالات ما بتظهر بشكلها التقليدي
                                                       
مرة إمي صار معها التهاب رئوي قوي كتير
                                                             
من دون سعلة أو أي عرض رئوي.......... فقط حرارة مجهولة السبب
                                                     

يييي .... أبو كعب رايح كلو عن بالي هههههه

اي بس ما فيك تحدد من الصورة ..

وبرجع بأكد نحنا ماننا دكاترة ... يعني هي انو خدو صورة ونشخص مو شغلتنا .. معقول نحنا نطالب الدكاترة يلتزمو بالتشخيص آم نحنا نكون عم نتعدى على مهنتهن بهاد الشكل ..

وتاني شي نحنا مانا مؤهلين عملياً وسريرياً للتشخيص .. يعني مو قصة كلو عالممارسة بصير .. الشغلة مانها حرفة أو صنعة بيقعد الواحد عند حدا وبيصير بروفيشنال فيها ...

آسفة لصراحتي .. بس شغلة مزعجة .. عم نكتب مقالات لناخد حقوقنا كصيادلة آم منجي مننسى التزامنا بحدودنا وواجباتنا!!!

السلام عليكم

مها

بس معقول يعني ام تجيب ابنها عالصيدلية وما نعرف نقلها انو ابنك شو معو..؟؟ إنو نحط حدود بيننا وبين الأطباء شي... وإنو نخبر المرضى عن المعلومات الطبية يلي منعرفها شي تاني... لكن وين راح دور الارشاد الصحي تبعنا... يعني لازم نقلها للأم شو صاير مع ابنها وإنو ما بخوف هالشي... ومثل ما منعرف مو الكل قدرتو يروح لعند الدكاترة... وهيك حالات مو مستاهلة تحويل... أصلا في أمراض بحقلنا نشخصها ونعالجها من حالنا... لكان ليش أخدنا صيدلة المجتمع ....

مو كل الأمراض بنحسن نشخصها بالصيدلية
                                                                       
بس المهم نعرف نميّز الحالة الخطيرة يلي بدها تحويل من الحالة البسيطة
                                                     
يعني لو إجا ولد معو ضخامة كبيرة بالرقبة وعم يتوجع بتحريك تمو
                                                         
فأكيد بدي حولو للدكتور حتى لو عرفت أنو هاد أبو كعب
                                                                             
بجوز يكون شي تاني وأنو أخطأت بالتشخيص
                                                                                 

مها نحنا مو بس واجبنا نصرف الدوا ونحكي عن إرشادات دوائية

بصيدلة المجتمع كنا ناخد تشخيص كتير حالات ونقول أي منها يستدعي الإحالة للطبيب ......حتى بالامتحان كان يجينا أسئلة عن حالات أحد احتمالاتها "الإحالة للطبيب" بس مو على طول هو الصح

يعني وقت كل ما واحد صارت معو شغلة بسيطة بيروح عند الدكتور كان شعبنا صرف رواتبو معاينات 


الجدري والنكاف والحالات التحسسية والإسهالات والإمساك والرشح والقصص البسيطة بشكل عام فينا نشخصها ونعطي عليها دوا OTC بلا ما نكلف المريض روحة عند الطبيب لأنو هي شغلتنا وما تعدينا فيها حدودنا


أما المشاكل الأخطر والتي تستدعي تشخيص وتحليل دقيق فهي شغلة الطبيب وما بيحقلنا نتدخل فيها ونجرب بالمريض

لح نختبركم بقراية الراشيتات
هي راشيتة لدكتورة "بدون ذكر اسماء" مشهورة بخطها المعفكش يلي متل خرابيش الجاج!
عطونا رأيكم فيها, ويا حزركم شو مكتوب فيها؟!