باب الحارة  أو باب الملايين .... كما يحلو لأحد أقربائي أن يسميه .. و ذلك لكثرة الملايين التي جناها منتجو هذا المسلسل و خصوصاً بالجزء الثاني منه , فكلنا نعرف أنه أثناء فترة عرضه العام الماضي كان الشارع يكاد يخلو من المارة كما لو أن حظراً للتجول قد حدث ....

هذا بالإضافة إلى الإعلانات و الندوات و المنتجات التي ظهرت و تحمل اسم باب الحارة ...[ ففي العام الماضي مثلاً وجدت مغلفاً لعلكة و عليها صورة [ صطيف ] و [ العكيد أبو شهاب ] و مكتوب عليها علكة أبطال الحارة  .... ] 

هذا بالإضافة إلى [ الكنزات ] و [ البنطلونات ] التي  تمتلئ بصورة أبو شهاب و معتز و أبو عصام  وغيرهم من شخصيات المسلسل ....

إلا أن شخصية محورية مثل شخصية  عباس النوري [ أبو عصام ] و التي سرقت البطولة دون أي منازع في الجزء الثاني  ..... تلغى و بهذه البساطة ؟؟؟ فأمر لا يصدق ؟؟؟

فكيف يستطيع الكاتب  أن يلغي شخصية أساسية و محورية مثل هذه الشخصية بجرة قلم ؟؟؟؟

[ يعني بالفعل مبارح باسم ياخور ببقعة ضوء حط النقط عالحروف لما بأحد المشاهد عتب عالكاتب إنو لغى شخصية أبو عصام بجرة قلم ...موبضربة موس أو شبرية أو حتى شنتيانة  على حد قوله !!!]

يعني هالقصة والمسلسل صار متل [ التكية ] الطالع طالع و الفايت فايت .....

وبالفعل مبارح ببقعة ضوء الشباب عملو شغل كتير مرتب ... لأنو بس كان ناقص يقلدو حبسة أبو عصام بالدكانة ليعملو ملخص عن هالمسلسل [ أحد الصحافيين انتقد المسلسل قائلاً يجب أن يسمى باب الدكانة بدل باب الحارة ] لأن كل الأحداث تقريباً صارت من خلال حبسة أبو عصام بالدكانة ....

المهم ما أود قوله أن بقعة ضوء في حلقة الأمس من خلال لوحة [ عودة أبو عصام ] أضحكوا المشاهدين من القلب و اختارو مادة للسخرية و التهكم لم يسبق لغيرهم أن اختارها وهي [ مسلسل باب الحارة ] ...

و عن نفسي أقول أني في حلقة الأمس ضحكت من القلب  و برأيي حلقة الأمس من بقعة ضوء أحلى من أحلى حلقة من باب الحارة طلعت ورح تتطلع ...

و أرجو رأي الزملاء عن هذه اللوحة [ عودة أبو عصام ] ......
 

             

مبارح باسم ياخور -- يا جماعة -- طيرلي مخي بتقليدو المتقن لسامر المصري

و كذلك الأمر بالنسبة لقصي خولي ...

و أفضل كلمة هي :  الله يعطيهم العافية !!!!

والله مبار ح يمكن فرطت ومعد لموني من كتر ماضحكت على باسم ياخور وابو عصام تبعو ههههههههههههههههههههههههههههههههههههههه

عن جد كانت حلقة بقعه ضوء
بتجنن والتقليد كااان رائع
يعني انا حبيت هالكوميديا كتير
الله يعطين العااااافيه للشبااااب

والله حلقة كتير حلوة كانت مبارح بتفرط من الضحك
خاصة لما يروحوا لعند الكاتب والمخرج وينادوا عليهم

حلقة مبارح

من اجمل حلقات باب الحارة


ضحكت فيها لدرجة انو كل ما

تذكرتا اليوم صير اضحك


شكراً  ....  و احد عايف حالو


تقبل  مروري

يعني عنجد كانت لوحة بقعة ضوء كتير حلوة وبتفرط من الضحك ودور متقن لباسم ياخور وقصي خولي وعنجد بيعرفوا يقلدوا منيح واحلى شي بحلقة بقعة ضوء مبارح وقت بدهم يعطوا مصاري زيادة لأبو عصام مشان يرجع على المسلسل
بس ملاحظة صغيرة موت ابو عصام برأيي نا أثر كتير وخاصة انو بيعلم قيمة مهمة جدا في الحياة الا وهي الشهادة اعظم الدرجات مقابل فدى الوطن الغالي ونحن شفنا كيف مات الادعشري وكان شخصية كتير ناجحة هو والزعيم ومهمة بالمسلسل متل ابو عصام وما اتأثر المسلسل بالجزء التاني وكان كتير ناجح يعني كل جزء له قصة بتختلف عن غيرو
وشكرا كتير الك يا واحد عايف حالو على هذا الموضوع الرائع وتقبل احترامي ومروري
الفتى الدمشقي

بتعرف مبارح وأنا عو أحضر الحلقة كنت عم أكل تفاحة ومن كتر الضحك غصيييت وما عاد فيني أحكي لشي عشر ثواني يعني منيح يلي مرقت على خير
وأحلى لقطة وقت بيصرخ باسم ياخور
ياااااااااا عززززززززززززززززززززت
يعني طالعة معه  ولا أحلى

سلاااااااااااام

من أحلى المشاهد مبارح لما العكيد أبو شادي [ باسم ياخور ] بيوصل باللانسر التكسي و بيضربو ل [ قصي خولي ] و بيقلو ريتها انكسرت إيدي قبل ما مدها عليك يا خال .....

و خصوصاً مع الموسيقا التصويرية و المؤثرات الصوتية .....  يا سلام ...

يا جماعة ........... أنا خايف يصير باب الحارة [ كساندرة باب الحارة ]

يعني يصفقونا منه شي خمسين جزء .....