بشكركن من كل قلبي انكن عم تفيدوني من تجاربكم واشكرك ph.dima بس الولي شو لازم مثلا ساوي دورات او اي اجرآت لحتى اوي حالي مشان الصيدلة  وانا هلأعطلت وبقضي اغلب وقتي عالنت وبتصفح مواقع للصيدلة وهيك شي  يعني فهل هذا شي كافي 

السلام عليكم ...

اهلا وسهلا فيكي  moOoOn  نيابة عن طلاب السنة الاولى 

ومتل ما قالولك .. المهم تكوني حابة الفرع يلي بدك تتدخلي 

وبالنسبة للسنة الاولى الفصل الاول كان كتيييير غليظ ... بس بالفصل التاني يعني احلى شوي ... وخصوصا بمادة (( المدخل الى الصيدلة )) ..
وبشكل عام بتضل الكلية ممتازة من حيث الدوام والحضور والدكاترة والطلاب 

ومشان الدورات انا برأي انو هلأ ما في داعي لأي دورة لأنو حتى الانكليزي بالسنة الاولى كلها معلومات عامة ...     

واخيراااااااااااااااا

We all hope to achieve your dreams
 

     

السلام عليكم...

اقتباس

بس الولي شو لازم مثلا ساوي دورات او اي اجرآت لحتى اوي حالي مشان الصيدلة

هلأ مابتوقع في دورات للتقوية مشان الصيدلة
وماتهمي حالك كتير بالموضوع ...لاحقة :)

اقتباس

مشان الدورات انا برأي انو هلأ ما في داعي لأي دورة لأنو حتى الانكليزي بالسنة الاولى كلها معلومات عامة

فعلا بالسنة الاولى بيكون معلومات عامة وبالسنة التانية بتبلشو شوي بالانكليزي الاختصاصي بس ممكن كتقوية عامة مو مشان الصيدلة (مع انو بتفيد) بس بشكل عام اللغة منيحة

حلو كتير حماسك للصيدلة واذا بتتصفحي مواقع صيدلة وبتاخدي معلومات كمان شي حلو
موفقة وان شاء الله بتحققي اللي بدك اياه

اقتباس

انا هلأعطلت وبقضي اغلب وقتي عالنت وبتصفح مواقع للصيدلة وهيك شي

ممم بس سؤال.. مو لازم تكوني بكالوريا؟؟ يعني عم تقدمي هلأ امتحانات؟؟

السلام عليكم



مثل ما قالولك ما في داعي لأي دورة أو تعملي شي... لأنو بالجامعة رح تاخدي شغلات

بتكفي وبتوفي من الناحية النظرية بس... أما من الناحية العملية (يعني الشغل بالصيدلية

والأدوية ومعلوماتها والذي منو...)  فما كثير بيهتموا فيها هون بصير الاعتماد كلو عالطالب وقت

يلازم بالصيف بشي صيدلية ليكتسب الخبرة الضرورية بهالمجال... وهون عنجد بصير في مجال

للتميز... وكل واحد قديش بيتعب على حالو ليخلي الناس تثق بمشورتو...

اقتباس

مو لازم تكوني بكالوريا؟؟ يعني عم تقدمي هلأ امتحانات؟؟

يلي فهمتو إني هي هلأ بصيفية البكالوريا يعني السنة الجاية عندها بكالوريا...

اقتباس

مو لازم تكوني بكالوريا؟؟ يعني عم تقدمي هلأ امتحانات؟؟

والله هالشغلة يلي خطرت ببالي لما قرأت المشاركات ..... شلون عم تفوت على النت .... حاكم أختي ماعم تحسن تحك راسها من كتر مو مقصرة .... الله يكون بعون طلاب البكالوريا كلهم واحد يقول للتاني ...

اقتباس

ممكن تقولولي اشياء ونصائح لازم ساويها مثلا قبل ما فوت على كلية صيدلة

بنصحك تعدي مو للعشرة ... عدي للمية قبل ما تفوتي الكلية .... مو المقصود كليتنا كلية الصيدلة ... المقصود أي كلية بدك تختاريها .... وأسألي ناس كتير .... عم يدرسو الفرع أو متخرجين أو مختصين أو دكاترة .... وبعتقد هالمنتدى بيفيدك وبنصحك تتواصلي مع هالأعضاء يلي سبقوني بالرد لأنو ماشالله حولهم أغلبهم من الأوائل  ......
و حتى إذا بدك أسألي متخرجين من فترة طويلة هدول بيعطوك فكرة أحياناً أشمل وأدق عن طبيعة ومشاكل المهنة ما بتكون هالأفكار موجودة عنا بشكل كافي ..........  

وأنا من وجهة نظري الكلية بعتبرها جيدة بس لولا هالكم ألف علة يلي فيها ....
يعني فيها إيجابيات وسلبيات .............
بس اجمالاً فرع متل مابيقولو : خفيف ونظيف وممتع وبنفس الوقت مسلي وخاصة وقت العملي حاكم بتصير قصص وسير داخل هالمخابر .....

وبعتقد أهم شغلة أنك تكوني بتحبي (((( الكيمياء )))))

وأهم شي وقبل كل شي وقت بدك تختاري الفرع ... اختاريه على حسب رغبتك وميولك .... مو على حسب شو بيمليه عليك المجتمع المحيط  .... أنت ادخلي حسب رغبتك وحسب تطلعك لمستقبلك ...........



وبالتوفيق .......................

السلام عليكم...

اقتباس

يلي فهمتو إني هي هلأ بصيفية البكالوريا يعني السنة الجاية عندها بكالوريا... 

اها فيا وجهة نظر 

اقتباس

الله يكون بعون طلاب البكالوريا كلهم واحد يقول للتاني

عنجد 

السلام عليكم...

اهلا وسهلا فيكي بالمنتدى    ... وانشالله بتقدري تحققي حلمك ان كان بالصيدلة او بغير فرع...

بس بدي قدملك نصيحة مشان ترتاحي وقت السنة الدراسية ... بالعربي ادرسي الفنون النثرية هلأ لانو بصراحة 3/4 الطلاب بيشكو منها اخر السنة  ... واذا قدرتي تعيديها اكتر من مرة ما تقصري...

وركزي كتير منيح عالعلوم ... وكمان بنصحك تطلعي على سلالم تصحيح السنوات الماضية لانو بتفيدك بطريقة الدراسة..((وهالشي عن تجربة شخصية))

وموفقة  بدراستك... وانشالله منسمع عنك الاخبار الحلوة والعلامات العالية...


وانشالله بعد النتائج منحكيلك ((طلاب السنة الاولى))   عن موادنا...

سلام

السلام عليكم.
لا انا هلأ حادي عاشر  والسنة الجاية بكلوريا انا مواليدي 1995 بس الله يخليكن لا تتصغروني  ................يعني انا تفكيري اكبر من يلي بعمري  .......... والدليل طموحي واني عم بفكر بالمستقبل ويعني ما في فرق كتير بيني وبين طلاب السنة الاولى شي سنتين بس......................... ; ;  

السلام عليكم ....

اقتباس

انا هلأ حادي عاشر والسنة الجاية بكلوري

معناها متل ما قالت هلا ... لازم تبلشي دراسة المذاهب والفنون من هلأ 

واذا بتحاولي تدرسي العلوم بكون كتييير منيح ..

بالتوفيق ان شاء الله ...

اقتباس

  ويعني ما في فرق كتير بيني وبين طلاب السنة الاولى شي سنتين بس......................... ; ;

   
بكرا بتشوفي ...

والله البكلوريا لوحدا قد عشر سنين   

بس موبكير انا عم قول لحالي انو بعد ما اخلص حادي عشر بصيفية البكلوريا بلش دراسة ولان انا بيشملني المنهاج الجديد ولسا ما طلع المنهاج .......بتعرف ولله خايفة من هالمنهاج الجديد الله يسترنا