بعد ماحكينا بقم الاعلام عن ضرورة الحكي عن الفن وعلاقتة بالمجتمع وبالعلام والسياسة
اول شي لازم نفهم شو يعني فن واهم مدراسه
حطيت الموضوع هون لانو هو اقرب للفلسفة لانو هي افكار مجردة ونظرية للفن والجمال بشكل عام
الموضوع كتبتو باسلوب سهل مشان يكون مفهوم للجميع وازا في خطأ بالكلام بتمنى تصلحولي
الانتاج الجمالي او فينا نسميها الاعمال الفنية هي قديمة جدا بلشت مع بدايات تفاعل الانسان مع الطبيعة من وقت ماسكن بالكهوف وتعامل مع الحيوانات وعناصر اخرى من الكون وبكل مرحلة تاريخية يوجد انتاج جمالي بعبر عن خلفيات اجتماعية وتاريخية معينة ..
اما المادة المصنوع منها الانتاج الفني فهي مختلفة ومنتوعة عنا الصوت والصوت بنوعيه( الكلام والموسيقى ) ثم اللون والشكل الي هن الرسم والنحت والنقوش .. وعنصرين اللون والشكل بيعطوا بالمعنى المجازي كل اشكال المحاكاة : التمثيل المسرحي والسينمائي والرقص والادب كمان الخ
كل هالوسائل هي بالنهاية للتعبير , ومع نمو الوعي الانساني حاول الانسان التاطير النظري للانتاج الجمالي يعني تفسيره نظريا هالشي الي ادى الى ظهور علم هو علم الجمال الي بيدرس مختلف جوانب الانتاج الجمالي ..
علم الجمال علم قديم كتير والسؤال الاساسي فيه هو شو الي بخلينا نقول عن شي انو هو عمل فني او لما نشوف شي لوحة او منحوتة ليش بنقول هاد جميل وهاد بشع يعني كيف بنصنف الموجودات وعلى أي اساس بنصنف الجميل والبشع ومن اين ياتي الالهام للقيام بالعمل الفني ..
وملاحظة انو علم الجمال مش بس بيدرس الفن كمان بفوت بمجال الاخلاق والخ
ودايما للجواب على هيك سؤال بتظهر اراء مختلفة بالتالي مدارس متعددة ووجهات نظر
في كتير مدارس جاوبت على هاد السؤال
وبما انو حكينا انو علم الجمال قديم معناتو في مدارس قديمة وبالنسبة النا بتكون افكارها باطلة تماما بس رح نحكي عنها باختصار
المناحي الرئيسية في النظريات الجمالية :
المنحى الصوفي :
كانت الشعوب القديمة بتعتقد انو الصلة قوية بين القوى الغيببية والفن , عند اليونان مثلا كانت تعتقد انو في آله للفنون الجميلة وهي تسعة اله ومركز عبادتون هو جبل هيليكون
عند العرب مثلا بالجاهلية كانو بيعتقدو انو لكل شاعر شيطانه (الشيطان مش الي بنعرفو لأ هو مجرد اسم اطلقوه على قوة غيبية )
باختصار كان الالهام الجمالي بيجي من قوة غيبية
بالتالي الانتاج الجمالي هو انعكاس لتجربة روحية وليست تجربة عقلية او عاطفية بل ويعتبرالتدخل العقلي عند بعض فنانين هاد الاتجاه هو اهانة للعمل الفني ..
المنحى الانفعالي :
بشدد هاد المنحى على الأثر الانفعالي الذي يتركه العمل الفني عند الانسان وبتتوقف قيمة العمل الفني على مدى هالاثر ونوعه
تولستوي في كتابة ماهو الفن بشوف انو مهمة الفن هو انو يرتقي بالانسان اخلاقيا ودينيا ويخلصه من الطيش والملذات الجسدية يعني قيمة العمل الفني بتتوقف على قيمته الاخلاقية والاديولوجية
المنحى الشكلي :
التشديد هنا على الوظيفة التصويرية للعمل الفني وهدف الفنان هنا ان ينشئ نسخة للاشياء الموجودة او الاحداث مستخدم مادة ما متل البرونز او الرخام او الرسم او التمثيل او الادب وتكون جيدة بمقدار ماتكون مشابهة للأصل
ويمكن ان ننسب لهذا المنحى مذهب ادبي هو الواقعية القديمة والحديثة (هالمدرسة بتشوف انو وظيفة العمل الادبي تصوير الواقع والاحداث والمحيط متل ماهو دون اقحام أي حكم خلقي وترى ان الانسان هو حصيلة حتمية بيولوجية تاريخية ومحكوم بالضغوط الاجتماعية والاقتصادية )
الهيدونيزم او منحى المتعة :
هاد المنحى اقرب للاخلاق اهم الي كتبو فيها ابيقور وسيرينايكس وتقول بان المتعة هي الخير الوحيد في الحياة
هذا المنحى يربط قيمة العمل الفني بالمتعة التي ينتجها
فرويد اعطى لنظرياتو بعلم الجمال طابع جنسي تقريبا يعني قال انو الانتاج الفني يمختلف انواعه هم مجرد تصعيد لرغبات شاذة او طبيعية او مختلطة والاستمتاع بالاعمال الفنية هو نوع من التعرف اللاشعوري او الشعوري على تلك الرغبات او الازمات الداخلية الي بعبر عنها العمل الفني والتي تؤدي للتعرف على نوع من السلام الداخلي
هاي اهم نظريات علم الجمال
شو رايكون