السلام عليكم ورحمة الله

موضوع خفيف لتنزيل وصفات طبخ أو حلويات سهلة وغريبة ونستفاد من خبرات بعض...

بتمنى مشاركة الجميع...

السلام عليكم

زهرة بالطحينة

طبخة سهلة وسريعة ... أنا ما كنت بعرفها صراحة وتعلمتها من فترة

المكونات راس زهرة يتناسب مع عدد الأشخاص.. يفضل كبير

نص كاسة طحينة

تلت كاسة لبن زبادي

تلت كاسة مي

مكعب ماجي

كمون عصير ليمونة وحدة

ملح وفلفل

وبهارات بابريكا (مو كتير ضروري)

الطريقة منسلق الزهرة بعد ما نقطعها منصفيها ومنقليها ومنحطها بصحن البايركس... الصوص منحط كل المكونات بالخلاط ومنخلطهم سوا... بعدين منصبهم فوق الزهرة...منحط الصحن بالفرن لربع ساعة لتختر شوي ويتقمر الوش وصحتين وهنا...

وعليكم السلام ورحمة الله أخت سلام..
موضوعك مفيد ..والفكرة مميزة..
بس للأسف أنا مالي مراق لشي أسمو طبخ هههههه
وكلشي متعلق بالمطبخ ما بحبو ..
باستثاء الأكل هههههه..
رح تابعك معك الموضوع بإذن الله..
بلكي اتشجع وأتعلم شي شغلة ..`_`

السلام عليكم

معكرونة الرافيولي

الها طريقتين وحدة بالصوص الأبيض (البشاميل يعني) والتانية بالصوص الأحمر

المكونات

معكرونة رافيولي ع حسب ما بتفضلوها بشو محشية سبانخ... صلصة البندورة مع البرميزان...الخ

كاسة حليب

معلقة كورن فلور

مكعب ماجي

جبنة موزاريلا أو برميزان مبشورة

الطريقة منسلق المعكرونة لتطرى... منحطها بالبايركس

منساوي البشاميل منغلي الحليب مع الكورن فلور ومكعب الماجي ليصير قوامه سميك ومصبه فوق المعكرونة منحط ع الوش الجبنة المبشورة.... منقمرها بالفرن ربع ساعة... وصحتين عوافي ...

السلام عليكم

مية أهلا وسهلا فيكي نور الشام ضيفة عزيزة حاليا وإن شاء الله قريبا بتصيري من أهل البيت وبتنزليلنا إبداعاتك :)

بدي حطلك تقييمات ع مشاركاتك..
بس خلصو التقييمات اليوم.

السلام عليكم

ههههههه.... الحال من بعضو ياريت يلغوها تقييد العدد

يسلم دياتك سلفا ^_^

يعطيك العافيه سلام .. بس كأنو عم تصعبي علينا شوي .. قلنالك نحنا مبتدئين ولو!

يعني مثلا .. ما منجيب كل انواع هالجبنه موزاريلا وبارميزان ووو ..

صوريلنا الطبخه بعد ما تخلص كرمال نشوف اذا ناجحه معك او لأ 😜

والاهم انو مثلا انا بحياتي مو عامله بشاميل .. اشرحيلنا بالتفصيل الوصفه بس بطريقه ما نحس عملها او مكوناتها صعب تتطبق ..

ويسلمو ايديكي 😊

يا هلا نور الشام وشكرا لمشاركتك ..

بتعرفو انا حبيت فكرة تقييد التقييم احسن ما تصير التقييمات هيك تنعطى عأبو جنب متل اللايكات عالفيس ..

السلام عليكم

والله ما صورتهن أول ما عيدهن بصور وبنزل الصور بإذن الله...

بس شو مشانك يلا نزليلنا شي وصفة طبخ أو حلو... ولوووو أكيد صهرنا طاير عقله بأكلاتك ما شاء الله حولك :)

يا ستي البشاميل هو التالي

بتجيبي كاسة لكاستين حليب بتحطيهن بالمقلاية ولكل كاسة تقريبا معلقة نشا الذرة بتحطيهن ع البارد بالأول وبتحطي معهم مكعب ماجي وبتضلي بتحركي لحت ما يلزقوا ليغلي وتحسيه متماسك وتقيل بس مو كتير يعني متل المهلبية... بتطفي عليه وخلص الصوص الأبيض... المعكرونة ممكن السباكيتي العادية تسلقيها وتحطي الصوص فوقها عالوش ممكن تجيبي قشقوان وتبشريه وبعدين ع الفرن للتقمر وعوافي يارب :)