مرحبا ...
أنا جديدة هون وهي أول مشاركة لألي ..
بصراحة أنا حابة سجل معكون بالمعهد بس قبل عندي شوية استفسارات ...
هلأ مو شوي كتير ..
أنا عملت زيارة للمعهد  وحاولت أستفسر بس ضل ببالي شوية أسئلة ما حدا بيقدر يجاوبني عنها
غير طلاب المعهد نفسه


سمعت كتير أنو الدراسة عنكون كتير صعبة ...!!!
شو مستوى صعوبتها ..؟؟
وهل هي صعبة لأن الكم كبير والوقت غير كافي ..؟؟
أم لأن المواد هي صعبة بطبيعتها ..؟؟


كمان قالولي ان الدراسة كلها بالانكليزي والفرنسي .. صح ..؟؟
طيب شو مشان الفرنسي نحنا مو متأسسين صح ...!!!
أنا بعرف انكليزي منيح بس مو لدرجة كل الدراسة باللغة ..!!
في شي صعوبة بالموضوع ...؟؟؟


قالولي كمان أنو ما في بنات كتير بالمعهد يعني صعب عالبنات أكتر ؟؟؟
واديش نسبة البنات عنكم ؟؟


عدد ساعات الدراسة قالولي أنو ما لازم ارفع راسي عن الكتاب ..
انا طلعلي هندسة اتصالات وبعرف انها صعبة ..
بس شو برأيكم أصعب ..؟؟؟


أنا ما بحب الحفظ أبدا وعنكم قالولي انو الدراسة ما بدها حفظ كتير تعتمد على الفهم أكتر يعني ما بتضطروا تحفظوا الكتاب من الجلدة للجلدة ...طيب إذا هيك ليش بيقولو صعبة و ساعات الدراسة كتيرة ...؟؟؟

و آخر شي هل الحصول على الموافقة من أجل السفر سهل أو صعب ..؟؟

وختاما أنتو شو بتنصحوني ...؟؟؟
أنا مجموعي 346 من 360

مرحباااا....

أول شي اهلا وسهلا فيكي واكيد كلنا جاهزين لنساعدك ونجاوبك ع اسألتك...

سمعت كتير أنو الدراسة عنكون كتير صعبة ...!!!
شو مستوى صعوبتها ..؟؟
وهل هي صعبة لأن الكم كبير والوقت غير كافي ..؟؟
أم لأن المواد هي صعبة بطبيعتها ..؟؟

هلأ هيي صعبة واحيانا بتكون كتير بس ازا بلشتي من اول يوم وعرفتي تشتغلي انشالله ما في خوف...

مستوى الصعوبة...هوي بمقدار مستوى الفائدة والمستوى يلي رح تكوني فيه كمهندسة بحوث ...وهوي افضل من كل الكليات بالجامعات وبالتالي الصعوبة اكبر...

اما سبب الصعوبة فهوي ضغط المواد....رح قلك كيف....نحنا عنا 3 فصول...بكل فصل من 8 الى 10 مواد...يعني بالسنة عندك بين 24 و30 مادة...كتب ما في...يعني عندك المحاضرات يلي بيعطيا الدكتور بالاضافة للمراجع يلي بتفيدك...ازا بدنا نحكي بالكم فكونو ما في كتب فما رح تحسي بكم كبير...بس انا عملت مقارنة لعدد الساعات ومضمون الصفحات الكتيرة بكتب الجامعة ولقيت انو عدد الساعات عنا اكبر بكتير بالاضافة انو نحنا مناخد الزبدة يلي موجودة بالمواد المشتركة بينا وبين الجامعة...

بس في ايجابية عنا بالمعهد انو توزيع المواد ب3 فصول متشابه من حيث المكان والدكتور والمضمون يعني ما بتحسي بضغط العدد...

منجي للامتحان...بجوز هون اكبر ضغط علينا..بالامتحان او المزاكرة ماعنا ايام فراغ بين المواد وما عنا شي اسمو قطع...بس انتو السنة رح يعملولكن مزاكراتكن بايام السبت خلال الدوام...

يعني كملخص...مضمون المواد بدو شغل ووقت بس اكتر شي بتحسي بالضغط بالمزاكرات والامتحانات...

بس برجع بقلك...بتنظيم الوقت وبالصبر انشالله ما بتتعبي كتير...والصبر اهم شي وخصوصا ازا اخدتي شي علامة مو منيحة بشي مادة فلا تخلي شي ييأسك...

كمان قالولي ان الدراسة كلها بالانكليزي والفرنسي .. صح ..؟؟
طيب شو مشان الفرنسي نحنا مو متأسسين صح ...!!!
أنا بعرف انكليزي منيح بس مو لدرجة كل الدراسة باللغة ..!!
في شي صعوبة بالموضوع ...؟؟؟

لا اكيد مو صح...الدراسة بالسنة الاولى بالعربي...بالسنة التانية في  مادة بالفرنسي...وبالتاالتة لحد هلأ في مادة عم ناخدا بالفرنسي...

بالفرنسي بالسنة الاولى في 6 محاضرات بالاسبوع فرنسي وبيأسسوكن صح ومن الاول...لا تخافي من هي الشغلة...ازا بتعرفي انكليزي منيح فهي شغلة ممتازة لانو الانكليزي عنا اصعب...

وما في صعوبة بموضوع المواد يلي بغير لغة ابدا..لانو الشرح اغلبو بالعربي بس بكون في مفاهيم بدا حفظ وبتنحفظ ع التكرار والاسئلة بالفحص نمطية يعني بدا واحد بيعرف فرنسي وبيعرف المادة مو اكتر...

قالولي كمان أنو ما في بنات كتير بالمعهد يعني صعب عالبنات أكتر ؟؟؟
واديش نسبة البنات عنكم ؟؟

مظبوط ما في بنات كتير...يعني بنسبة 15 -20 بالمية...بجوز صعب ع البنات بحياتن بعد التخرج انو الدوام طويل...

عدد ساعات الدراسة قالولي أنو ما لازم ارفع راسي عن الكتاب ..
انا طلعلي هندسة اتصالات وبعرف انها صعبة ..
بس شو برأيكم أصعب ..؟؟؟

هلأ عدد ساعات دراسة ...قد ما بدك...حسب صبرك وتحملك بس الاحسن انو تضلي عم تدرسي...عمليا هادا الحكي صعب التحقيق بس انو قد ما فيكي تدرسي درسي لانو بالامتحان ما في مجال انو تدرسي في مجال انو تراجعي يلي دارستيه....

بالنسبة لهندسة الاتصالات هيي حلوة اكيد..وما في شي سهل...بس المعهد بضل اصعب بسبب ضغط المواد ...وازا بتحبي الاتصالات فشهادة المعهد العالي بهندسة الاتصالات افضل من شهادة الجامعة...

أنا ما بحب الحفظ أبدا وعنكم قالولي انو الدراسة ما بدها حفظ كتير تعتمد على الفهم أكتر يعني ما بتضطروا تحفظوا الكتاب من الجلدة للجلدة ...طيب إذا هيك ليش بيقولو صعبة و ساعات الدراسة كتيرة ...؟؟؟

ازا ما بتحبي الحفظ فالمعهد هوي انسب مكان الك....الصعوبة والوقت الطويل لانو بدك تضلي عم تحلي تمارين ومسائل واحيانا الفهم مانو سهل كتير...

و آخر شي هل الحصول على الموافقة من أجل السفر سهل أو صعب ..؟؟

ازا في سبب للسفر مانو صعب...بس بدو موافقة امنية وبتنجاب...بجوز طلال عندو تجربة مع الموضوع ازا فات بيحكيلك عنا...

وختاما أنتو شو بتنصحوني ...؟؟؟
 أنا مجموعي 346 من360

هلأ اهم شي ازا كان عندك الصبر الكافي والقدرة ع تحمل الضغط فالمعهد هوي مكانك المناسب...بس برأيي انو كونو طالعلك اتصالات يعني هندسة...فالمعهد افضل الك كمستقبل وكشهادة...

ازا في اي نقطة مو واضحة او في اي استفسار تاني نحنا بالخدمة...

واهلا وسهلا مرة تانية...

سلااام...

شكرا كتير عالأجوبة ...

بس لسا في عندي شوية استفسارات إذا ممكن ..

 

اما سبب الصعوبة فهوي ضغط المواد....رح قلك كيف....نحنا عنا 3 فصول...بكل فصل من 8 الى 10 مواد...يعني بالسنة عندك بين 24 و30 مادة...كتب ما في...يعني عندك المحاضرات يلي بيعطيا الدكتور بالاضافة للمراجع يلي بتفيدك...

 

طيب مثلا مثلا اذا واحد حملو شي مادة ((بعيد الشر)) لظرف طارئ ايمتى بعيدها .. يعني ما في دورة تكميلية .. ؟؟!!

والمراجع شو بتدرسو منها بالضبط .. غير أنها بتساعدكم بالحل .. ؟؟

 

 

بس انا عملت مقارنة لعدد الساعات ومضمون الصفحات الكتيرة بكتب الجامعة ولقيت انو عدد الساعات عنا اكبر بكتير

 

 

شو بتقصد بعدد الساعات ..؟؟

عدد ساعات الدراسة ..؟؟؟

 

توزيع المواد ب3 فصول متشابه من حيث المكان والدكتور والمضمون يعني ما بتحسي بضغط العدد

 

هي ما فهمتها ..!!

ممكن شرح لو سمحت ..

 

والاسئلة بالفحص نمطية يعني بدا واحد بيعرف فرنسي وبيعرف المادة مو اكتر...

يعني  المادة فرنسي

ولا بتقدموا المادة بالفرنسي ..؟؟

 

 مظبوط ما في بنات كتير...يعني بنسبة 15 -20 بالمية...

 

ممكن تصدف انو ما في غير بنت وحدة بالقاعة ..

 

 

 

وسؤال أخير ممكن الطالب يقدم تأجيل  أو اعتذار عن مادة لسبب أو ظرف ما ؟؟

 

سامحني على أسئلتي الكتيرة ..

 بس ضروري يكون عندي معلومات وتفاصيل لأنو اذا دخلت صعب اطلع ما ؟؟؟ ..

 

مرحبا مرة تانية...

شكرا كتير عالأجوبة ...


بس لسا في عندي شوية استفسارات إذا ممكن ..

لا شكر على واجب وتكرم عينك...ضروري تسألي مشان تتعرفي ع الفرع منيح...

طيب مثلا مثلا اذا واحد حملو شي مادة ((بعيد الشر)) لظرف طارئ ايمتى بعيدها .. يعني ما في دورة تكميلية .. ؟؟!!


والمراجع شو بتدرسو منها بالضبط .. غير أنها بتساعدكم بالحل .. ؟؟

 في شغلة نسيت قلك ياها...انو المواد عنا موزعة ع اربع كتل...كتلة الرياضيات والفيزيا والللغات والعلوم الهندسية...ولكل كتلة أمثال بتنضرب فيها...وضمن الكتلة بكونو المواد وكمان لكل مادة امثال...فبيتحقق النجاح لما يكون معدل كل كتلة فوق ال60...اما ازا كان معدل الكتلة النهائي فوق ال55 بصير في اكمال اما تحت ال55 او 50 احيانا بكون الطالب راسب وما بحقلو يأكمل...طبعا بعد الاكمال سقف العلامة بكون 60...يعني اي علامة بتجيبيا فوق ال60 بتنحط 60...

بالنسبة للمراجع...المرجع بيساعدك لترسخي فكرة معينة او تتوسعي بشي شغلة ومو ضروري تكون مطلوبة...مثلا بالرياضيات ازا حليتي تمارين من مرجع بتزيد خبرتك وبتزيد الافكار يلي عندك...

شو بتقصد بعدد الساعات ..؟؟


عدد ساعات الدراسة ..؟؟؟

قصدي بالسعات انو الساعات المخصصة لكل مقرر...يعني عدد المحاضرات

هي ما فهمتها ..!!


ممكن شرح لو سمحت ..

اكيد ممكن...

مثلا كتلة الرياضيات بالسنة التانية فيا 5 مقررات...في مقررين ونص بيعطين دكتور...ومقررين ونص بيعطيون دكتور تاني...بضلو معك ع مدار ال3 فصول...وبنفس المدرج...بيتغيرو الدكاترة تبع التمارين بس...يعني بتحسي انو مادة وحدة ع كل السنة...والبرنامج بكون نفس التوزيع بالنسبة لكل كتلة فما بتحسي بعدد المواد...(ازا مو واضحة قليلي كمان بشرحلك وبعطيكي امثلة)...

يعني  المادة فرنسي


ولا بتقدموا المادة بالفرنسي ..؟؟

المادة بالفرنسي والتقديم بالفرنسي...بس بالاعطاء بكون اغلب الشرح بالعربي...ونمط الاسئلة بكون بس انو تحطي كلمتين تلاتة بالمكان المخصص للاجابة او ترسمي ...وبعد السنة الاولى رح يفرق مستواكي بالفرنسي بشكل كتير كبير يعني ما رح يكون عندك مشكلة ابدا مع هيك نوع بالمواد...حتى الضعاف باللغة ما عم يكون عندن مشكلة..

ممكن تصدف انو ما في غير بنت وحدة بالقاعة ..

لا بكونو 3 او 4 بنات بكل فئة من اصل 19 او 20 طالب...

وسؤال أخير ممكن الطالب يقدم تأجيل  أو اعتذار عن مادة لسبب أو ظرف ما ؟؟

هلأ انا بعرف حالي وحدة صارت مع شب بالسنة الاولى...انكسرت ايدو اليمين...المواد يلي فيا كتابة كان في مين يكتبلو هوي بس يحكي...اما مادة الرسم الهندسي اجلولو ياها...بس غير هيك سبب ما بظن التأجيل ممكن...

سامحني على أسئلتي الكتيرة ..


بس ضروري يكون عندي معلومات وتفاصيل لأنو اذا دخلت صعب اطلع ما ؟؟؟ ..

اول شي اسألتك مو كتيرة...تاني شي ضروري تسألي....انا لما كنت متلك فتت ع المنتدى وسألت كمان...

في شغلة ما بعرف ازا بتهمك...فيكي بعد ما تسجلي بالمعهد تاخدي وثيقتك وتسجلي بالجامعة وتوقفي تسجيلك وبعدين ترجعي الوثيقة للمعهد مشان ازا لا سمح الله ما تأقلمتي مع الوضع هون ما يروح عليكي مقعدك بالجامعة وبترجعي من اول شهر...

وازا في اي استفسار تكرم عينك..لا تترددي ابدا...

شكرا كتير مرة تانية ..

بس نسيت شغلة ...

بس انتو السنة رح يعملولكن مزاكراتكن بايام السبت خلال الدوام...

في دوام رسمي يوم السبت ..؟؟؟

قصدي بالسعات انو الساعات المخصصة لكل مقرر...يعني عدد المحاضرات

قصدك من قبل بالمقارنة أنو عدد ساعات المحاضرات عنكم أكبر من الجامعة ..يعني محاضرات أكتر ما ..؟؟

(ازا مو واضحة قليلي كمان بشرحلك وبعطيكي امثلة)...

هلأ أنا فهمت شوي بس إذا بتعطيني مثال بيكون أحسن ..

في شغلة ما بعرف ازا بتهمك...فيكي بعد ما تسجلي بالمعهد تاخدي وثيقتك وتسجلي بالجامعة وتوقفي تسجيلك وبعدين ترجعي الوثيقة للمعهد مشان ازا لا سمح الله ما تأقلمتي مع الوضع هون ما يروح عليكي مقعدك بالجامعة وبترجعي من اول شهر...

ما فهمت عليك ... شو بتقصد ؟؟؟

يعني فيني سجل بالمعهد وبالجامعة بنفس الوقت ...؟؟؟

لما سألت عنكون قالولي أنو بعد الدوام ممنوع الانسحاب ..

ممكن توضحلي ..

 

كمان شغلة لو سمحت ..

بعد ما الطالب يتخرج ويقضي سنين الوظيفة الالزامية بيقدر يسافر على كيفو ولا بيضل بدو موافقة ..؟؟؟

وشكرا ..

مرحباا..

شكرا كتير مرة تانية 

ومرة تانية لا شكر على واجب...اهلا وسهلا...

في دوام رسمي يوم السبت ..؟؟؟

لا يوم السبت عطلة بس وقت يجي موعد المزاكرات انتو ما رح تعملوها معنا لانو انتو داومتو بعدنا باسبوعين لهيك بتصير ايام السبت للمزاكرات...وباول فصل مزاكراتكن مو كتيرة يعني شغلة اربع خمس مزاكرات...

قصدك من قبل بالمقارنة أنو عدد ساعات المحاضرات عنكم أكبر من الجامعة ..يعني محاضرات أكتر ما ..؟؟

قصدي انو الساعات المخصصة للمقرر يعني عدد المحاضرات عنا اكتر..مو بوقت المحاضرة...بالعدد..

هلأ أنا فهمت شوي بس إذا بتعطيني مثال بيكون أحسن ..

اوكي...كتلة اللغات بالسنة الاولى فيا 6 مقررات 3 فرنسي و3 انكليزي...انتي كل فصل عندك لغات لهيك ما رح تحسي انو تغير شي او زاد مواد...والرياضيات كمان بتحسي انو رياضيات بغض النظر عن اسم المقرر...تحليل ..جبر...تفاضلية...توابع...وهيك

ما فهمت عليك ... شو بتقصد ؟؟؟


يعني فيني سجل بالمعهد وبالجامعة بنفس الوقت ...؟؟؟


لما سألت عنكون قالولي أنو بعد الدوام ممنوع الانسحاب ..


ممكن توضحلي ..

قصدي انو سجلي بالمعهد اول شي...بعدين بتقدمي طلب انو بدك تسجلي بالجامعة وتوقفي التسجيل...بيعطوكي الوثيقة...بتسجلي بالجامعة وتاني يوم بتوقفي تسجيلك...وفي ورقة بتاخديا من المعهد بتلزمن انو يوقفو التسجيل....بهالحالةما بتخسري مقعدك بالجامعة في حال صار شي لا سمح الله بنص السنة او باخرتا انو قررتي تتركي...بتلاقي مقعدك بالجامعة ناطرك...

بالنسبة انو ممنوع الانسحاب هنن عم يعطو فرصة كم اسبوع ليلي بدو ينسحب بكون لسا فيكي تسجلي بالجامعة...

بعد ما الطالب يتخرج ويقضي سنين الوظيفة الالزامية بيقدر يسافر على كيفو ولا بيضل بدو موافقة ..؟؟؟

بصراحة ما عندي فكرة عن هي القصة فيما يخص المركز...بس بشكل عام منع السفر بيستمر بعد انتهاء لخدمة لعدد من السنين...هي بالجيش هيك...بسألك عن الموضوع...بس ع الاغلب ما في مشكلة...

اهلا وسهلا مرة تانية وتالتة وكأنو نسيت باركلك بنجاحك...انشالله الف مبروك...

ازا في اي شي مو واشح او اي سؤال تاني انا بالخدمة...

بالتوفيق...

الله يبارك فيك ..

بس شو مشان المذاكرات غير الفحص ...؟؟؟

هلأ أنا غالبا رح اجي لعنكم بس كيف المعهد بدو يعطيني ورقة لتوقف تسجيلي بالجامعة وانا سحبت الوثيقة من عندون ما فهمت ...

ممكن بالتفصيل ..

وشكرا سلفا ..

الله يسلمك يارب

المذاكرة غير الامتحان...علامة المقرر بتكون ع الشفهي (الاعمال) والمذاكرة والامتحان....

بيعطوكي ورقة انو انتي طالبة بالمعهد العالي وبيعطوكي الوثيقة....هلأ ممكن ما تلزمك(متل ما صار معي) بس احيانا بتلزم....

وانشالله بتلاقي حالك بالمعهد وبتكوني مبسوطة ومرتاحة وبتطلعي من الاوائل...وانشالله انا رح ضل انصحك بكل مرحلة....

شكرا ..

عذبتك معي ..

بس سؤال أخير وحقك عليي ...

لمين بدي قول عالوثيقة .... لمكتب التسجيل ..,,, ؟؟؟

ما فهمت ..!!!