السلام عليكم :

بداية رح خبركم إنو تم اختياري لحتى كون رئيس للهيئة الإدارية بكليتنا الغالية

و تم تكليفي بهالموضوع آخر يوم بفحوص العملي.........

المهم أنا و باقي أعضاء الهيئة حابين نساوي شي و نغير الوضع بكليتنا للأحسن

طبعاً بالتعاون معكم و نكون سوا كإيد وحدة لحتى نغير :

مشان هيك بدي من كل سنة منكم        :
       
                    -  أفكار أو نشاطات حابين نساويها بالكلية .
         
                    - مشاكل مرت معكم بالعملي ، بالمخابر  ، بالمدرجات ، ............

و أنا إنشالله رح كون معكم دايماً و الهيئة رح تضل مفتوحة للجميع يلي بدو أي شي منقدر عليه .

حابب اسمع من الكل و خاصة بهالفترة لإنه عندنا بالاتحاد اجتماعات مكثفة حالياً

و دمتم بألف خير

رئيس الهيئة:

كريم الحراكي

السلام عليكم:

منكمل هون لكان بالإضافة للمكتبة والتكييف

في أمر بعتبره مهم بركي بصيروا بنزلوا النتائج عالانترنت

فور صدورها (لأن هنن بنزلوها بس بعد شو)

مشان يلي بدو يسافر يروح وبالو مرتاح أنه لما ينزل

شي بقدر يحصل عالعلامة فوراً أو كمان بجوز يكون الطقس سيء...

ولكم جزيل الشكر

بالتوفيق 

السلام عليكم ..

بالنسبة لمخبر الكيميا بالطابق -1
المخبر بشكل عام قديم بس أكتر شغلة تزعجني وجود المغسلة المعطلة .. دائما نخربط ونفتحها والمي تملي الأرض .. وبالنسبة للأدوات كمان في ملاحظة بس مشان الممصات .. يا ريت لو يكون في حدا خصوصي ليعقم الادوات او يغسلهن بالصابون .. لأنو نحنا مثلا بيكون قبلنا في فئة عملي فمنجي لنستعملها وما منعرف مين مستعملها قبلنا , ومتل مابتعرفو بيجوز يكون مريض وننعدى ..


مع الشكر 

مسا الخير :
ياريت الهيئة الإدارية يحلولنا مشكلة التدفئة ... لأنو بهالفصل سقعنا من بردنا ونحنا عم نحضر محاضرات سواء بالمدرج أو بالقاعات....

و أنا كمان مع آية الرحمن مشان النتائح ع الانترنت

حاول قد ما بتقدر

ولله بتكون كتييييييييييييييير خدمتنا

السلام عليكم وانا كمان مع أية الرحمن انو لازم تطلعوا النتائج عالانترنت فور صدورها
في مشكلة تانية انو  بالمدرج  احيانا بالمحاضرة بنطفي كل الاضواء وبنبقى على العتمة وما بنشوف اللوح فيا ريت تركبوا نيونات للاضوية يلي فوق اللوح ويلي على جدران المدرج وشكرا الكم

السلام عليكم ورحمة الله وبركاته

الله يجزيكم الخير على عملكم

بدي احكي مشان الممصات يلي بالعملي يعني الممصات يلي عم تكون ما فيها سحابات فعم نضطر أنو نسحب المواد بتمنا ويا ما شفت عالم عم يعانوا من هالشغلة ومن الأبخرة ويا ما حكينا بس لا حياة لمن  تنادي

بدي أحكي كمان عن المصلى يلي بالقبو ونحنا حكينا كتيير عنو وحتى في موضوع بساحة السنة التانية يعني منظر الحيطان فيه بأسي وما فيه سجادات أي رح نموت من بردنا فيه
مع العلم أنو كان فيه سجادات  وسجادة كبيرة كمان بس شفطوهن عالفحص  مع العلم أنو كل فحص بيعملوا فينا هالشغلة وبيعرفوا أنوا بالفحص ما في مكان نعد فيه غير المصلى لأنو المكتبة بتكون مسكرة فيا ريت كمان تلحقوا هالشغلة وتوليها الاهتمام الأكبر وبيكون جزاك عند رب العالمين



وشكرا

السلام عليكم

شكراً جزيلاً للأخ كريم و بارك الله بأمثالك....

و أنا متفائلة كتير بهمتك

أنا طلبي هو طلب طالبة على أبواب التخرج من الكلية

بصراحة أحلى ذكرى للطالب لما يتخرج من كليته هو حفل تخرجه

لذلك بتمنى إنو يكون حفل تخرج هالسنة عليه القدر و القيمة مو متل ما بكون متل العادة ما إلو علاقة بشي اسمو حفل تخرج

و إذا كان إقامة حفل تخرج مرتب يتطلب دفع مصاري أكتر مو مشكلة  مندفع بس المهم يكون مرتب و منظم

عن جد بتمنى تلبوا لنا هالطلب لإنو ما رح نلحق نحنا  طلاب الخامسة شي من إصلاحاتكم غير هالحفل يمكن

بادرة حسنة أنك بدأت بأخذ رأي الشعب


الله يقويك على المساهمة بحل هالمعضلات كلها ولو أنو في طلبات هون شكلها خرج وزير أو عميد مو بس رئيس الهيئة الإدارية 


صراحة الشباب كفوا ووفوا بالطلبات بس بدي أكد على 4 شغلات مما سبق ذكره بعتقد سهلين عليكم:

السعي مع رؤساء لجان باقي الكليات لتمديد مدة الامتحان شي 10 دقايق لحتى يحلق الواحد يظلل....


تفعيل الوايرليس بالكلية ....... صرلها التمديدات سنة وما شغلوها 


وأهم شي متل ما قالت "نور الهداية" حفل التخرج...... كلنا منتمنى يكون بمستوى معقول من التنظيم والترتيب ولو كلف زيادة.


كمان كلنا منعرف همم الهيئة الاعتيادية بموضوع الرحلات الترفيهية...... فيا ريت هالسنة تعملولنا همة لكم رحلة علمية لمعامل الأدوية القريبة (ريف دمشق وحمص) ... معقول رح نتخرج من الكلية وما شفنا معمل أدوية 





الله يوفقكم لتعملوا الشي يللي ما قدروا عليه السابقين