بسم الله الرحمن الرحيم



مع بداية الامتحانات الجامعية، صدرت تعليمات جامعة دمشق بخصوص المراقبين الامتحانيين وهي: "عدم الصراخ في وجه الطلاب بل اللجوء في حال إثارة الطلاب للشغب إلى الطرق القانونية والتعامل معهم بهدوء ولطف، ويمنع منعاً باتاً اللجوء إلى المجادلات والملاسنة مع الطلاب".

هذه المادة من سلسلة التعليمات وكما يقول عدد من الطلاب في جامعة دمشق ربما لم يقرأها المراقبين أو تم اسقاطها سهواً بعد تحول الطلاب لمتهمين حتى تثبت برائتهم.

فمع بداية الأيام الأولى من الامتحان أكد عدد من الطلاب أنّ معاملة المراقبين معهم وبأقل وصف لها هي لا إنسانية ولا أخلاقية، بعد أن استلم زمام الأمور في القاعات والمدرجات الامتحانية أشخاص لا علاقة لهم بأسط متطلبات الحوار الإنساني، ويؤكد الطالب (فادي.م) أنّه وعندما تصبح زمام الامور بيد شخص لا يفقه فيه شيء فالمصيبة كبرى، والخاسر الأول في هذه المعادلة هو الطالب ".



ويتسائل عدد آخر من الطلاب عن سبب هذه المعاملة من قبل المراقبين، فهم يعاملوهم وكما يقول (نادر.م) كأعداء: "عانيت كثيراً من ازعاج المراقبين، لدرجة أنّ المراقب لم يوزع الأسئلة بعد حتى بدأ بالصراخ وتهديد الطلاب بالحرمان من الامتحانات "، مضيفاً: "متى سنصل لمرحلة يكون فيها المراقب على قدرٍ من المسؤوليه تجاه نفسية الطالب، خصوصاً في الدقائق الأولى من الامتحان".

تطمين
عميد كلية الآداب الدكتور وهب رومية يؤكد لـ "دي برس" أنّه لا يحق لأي مراقب إخراج أي طالب من قاعة الامتحان إلا بعد الرجوع لرئيس القاعة والأخير بدوره لا يحق له هذا الأمر إلى بعد معرفة عميد الكلية شخصياً.

مشيراً إلى أنّ عدد موظفي الجامعة لا يكفي ما يضطرها إلى استقدام المراقبين من وزارت الدولة المختلفة، منوهاً إلى أنه يتمّ تنبيههم بأن مهمتهم محصورة بمراقبة الطلاب فقط.



______________________________________________


طبعا الخبر متل مو مبين منقول من موقع دي برس الاخباري السوري
وهاد الرابط
http://www.dp-news.com/pages/detail.aspx?l=1&articleId=70905
_______________________________________________


طبعا....بكليتنا بيصير هيك قصص متل ما الكل بيعرف
وما في داعي احكي عن رواياتي الطويلة أو بالأحرى مشاهداتي مع المراقبين أثناء الامتحانات كوني شخص ما بحيج حدا ليتعامل معي بعنف أو يدخل معي بملاسنة (( اسلم لأمي شو بريء وطيب وبتضل عيوني عم تراقب   )) وقصدي هون عن المراقبين .


يعني بس رح عرج على شوية مواقف وومضات :
متل طقة الكعب تبع المراقبة...اللي بتكون مشترية الكندرة جديد وجاية لتورجيها لرفقاتها المهندسات والموظفات...و انت عليك تسمع نغمة الكعب وتحزر شو الغنية 


أو لما بتكون مراقبة أو مراقب مشتريين موبايل جديد...وبيكونوا رابطين المنبه لحتى يرن بنص الفحص حتى المراقب التاني يقلن واااااااااااااو..شو هالموبايل ورجيني لشوف  ....وهون انت دبر حالك...فقدت التركيز ....طارو معلوماتك...هي مشكلتك...(( مشان تحرم تاني مرة تدرس ليلة الفحص و " تسكج " المعلومات براسك "سكاجة " ويطيروا مع أول منبه أو نغمة جديدة جايبها المراقب))


أو لما بتكون المراقبة متخانقة مع زوجها قبل بيوم مشان روحتو لعند أمو كل شوي والتانية وبتجي وبتتفشش فينا......


أو....
أو....أو

طبعا ما بنسى انو في مراقبين محترمين..ملتزمين بمهمتن...بيخافو عالطالب وعلى نفسيتو بالفحص...وبيحاولوا انو يساعدوه قد ما بيقدروا....وبصراحة هدول مروا عليي أكتر من الأوائل اللي حكيت عنن


بس التعليقات كانت عن موضوع الخبر اللي نقلتو مو أكتر .




هامش:
اللي بدو أدلة على كلامي...وشايف اني كالعادة بحكي كلام بلا أدلة ...وبدو صور ووثائق و براهين على كلامي ....


بقلو....لو ما كان الموبايل ممنوع بالفحص كنت صورتلك هالقصص....(( أي أوامر تانية حضرتك ؟؟!!))




مجد

    الله يبشرك بالخير اخ مجد يعني ليش متل هيك قرار ما بيعملو منو كم نسخة وبحطو بلوحة الشرف ..عفوا الاعلانات   
  بس نسيت شغلة مهمة مجد انو المراقب من لما بفوت لاخر ورئة بياخدا وهو عم يعد ب هالصلاحيات يلي بايدو ع ئولة فيي طلعكن لبرا وفيي احرمكن من الامتحان وفيي  حولكن مدري لوين فيي ........وفيي ............. ايه    الله كبير     
        بس ياريت مين يسمع وينفذ  

معلش لو علق شوي:
أنا طالب ماجسيتر صيدلة، ومطالب بالمراقبة في كلية الآداب.
ما رح احكي عن حالي بالمنيح، بس أنا ما بسمح يصير تنقيل بالقاعة اطلاقا وهادا واجبي، بس ما بحب دايق الطلاب لأني كنت طالب وبعرف شو يعني حدا يزعجك، وبالأخص طقة الكعب. عنجد مشكلة. لأ و حتى الحكي مع الزملاء المراقبين أو الموبايل  بعتقد هالشغلات محرمة، والسبب باختصار ما بقدر اتحمل دعوة طالب عليي.
بس بالمقابل في طلاب أقسم بالله ما بيفهموا    
في وحدة اليوم نبهتها أكتر من 5 مرات وما كانت تفهم     جاية على الفحص مو دارسة شي وبدها ترفع المادة!!!!!!!!! طيب شو مشان. نقلتها مكانها وما كانت تفهم، آخر شي حاولت تطبق المراقب التاني الموجود معي، وهون ما عاد تحملتها فقمت لاسحب ورقتها وصارت تترجى، رق قلبي وما هان عليي، قلت حرام، خليها تعصر مخها بركي بيطلع معها شي ، ساعتها إذا رسبت بيكون بسببها.
طيب هيك موقف ما بيستدعي انو المراقب يطلع خلقه. يعني الانسان بيفهم من كلمة وحدة، والقاعة صغيرة والهمسة بتبين، فوين جايين تعرجوا بحارة المكرسحين!!!!!!!!

          في نوعية من المراقبين مابصدقوا حالن كأنن صحللن  يتحكموا بحدا
  وبيستفذوا الطلاب  ....  اليوم انا كنت عم راجع بقلب القاعة قام قللنا طلعوا الكتب وسكرون  مانتبهت شو قال  اجا بدو ياخد بطاقتي  .....  قلتلو بأي حق بدك تاخدها  مو لتوزعو الاوراق
تجاكر مني  وقللي بدو يأذيني ماطلع منو شي  بس عرف اسمي مابعرف  بس قلولي شو في يعمللي شي  يأذيني فيه ؟؟؟؟  لا وقلتلو شو تجني  قللي ايه بدي اتجنى عليكي ..
    منشان الله شو اعمل  ... وهيك واحد بش ممكن يأذيني  وشوهالاسلوب هاد  ؟؟؟
                ياريت حدا يرد عليي  لأن صرت قلقانة  يزورولي علمتي او مابعرف شو ممكن..

يسلمو هالايدين على هالنقل زميل مجد

من زمان كان لازم يطلع هالقرار والله ناطرين هيك خبر من زمن

على انت بورقتك ولاه وبئيان نص ساعة وسلمني ورئتك بسرعة

وما بعرفش شو الله شاف حالنا

السلام عليكم
يسلمهن اخ مجد عالنقل لهالموضوع
مافي بس كل هالحكي كوم ووقت بيصير المراقب ساعة مؤقت تراجعي كوم تاني
بكون الفحص ساعتين ولما بتخلص أول ساعة بيشتغل المراقب
"بقيان ساعة.........................بقيان نص ساعة................بقيان تلت ساعة...........بقيان ربع ساعة.......بقيان عشردقايق
بقيان خمسة.....بقيان اربعة...بقيان تلاتة..بقيان اتنين.بق بق هات الورقة خلص الوقت واعطيتكن خمس دقايق إضافي كمان"
وبكون الواحد عميحل مسألة أو شي سؤال معقد معو مابيعرف بدو يفكر بالوقت ولا بالمسألة
وياما حاصلة معي أخطاء قاتلة بآخر ربع ساعة وحامل المادة على علامة أو تنتين لأني كنت عم عجل قبل ما يخلص الوقت
وأحلى شي بالخبر الصورة المحطوطة ضمنه "بالموقع الأصلي"


شفتولي هالمدرج شو مرتب
كانو يجوا لعنا بالمدني للمدرج التالت ويصوروا
أو حتى تقريبا كل المدرجات بكليتنا بتشهي التصوير
الله يكون بعوننا

يالله سلام

wite angel

شو مفكرة المسؤولية والمنصب شي قليل....أكيد بكرا انتي كمان اذا استلمتي منصب فخامة المراقب رح تعملي نفس الشي بالطلاب



Pharma87

اقتباس

طيب هيك موقف ما بيستدعي انو المراقب يطلع خلقه. يعني الانسان بيفهم من كلمة وحدة، والقاعة صغيرة والهمسة بتبين، فوين جايين تعرجوا بحارة المكرسحين!!!!!!!!

معك حق 100%
في كتير ناس ما فيهن ذوق...وما بيحترمو حالن وبيكون للمراقب كامل الحق بكل شي بيعملو

إنت من الناس اللي شكرتن بموضوعي بس بدون ما اذكرلهم مواقف


الله يعطيك العافية





مجد

saly1

أنا بس عندي سؤال صغير منين بجيبو هالسير وهالكم الهااااااااااااائل من القصص بهالساعتين
والله مبارح مراقب ومراقبة تعرفو ع بعض وبلشت تحكيلو من يوم ماولتها امها لحد ماوصلت لعنا
لك انصرعت

يعطيكم العافية جميعا


بالنسبة لكلية التربية اليوم زار وزير التعليم العالي الكلية  جخوووووووو ههههههههه.



والله ما بعرف شو سبب زيارة بس الكلية صغيرة ومشي الحال .


منتمنى يكون في تحسن بالنسبة للمراقبة لانو بكل كلية في نقص مراقبين ومابعرف شو كمان


وبالفعل متل ما تفضلت أسيل بأنو القصص كلها بتصير فوق الروس مين بيحكي اكتر بياخد جائزة الازعاج

شو الطبخة ووين اخر روحة .



الله بعين .

بشكر صاحب الموضوع على الجهود في طرح الموضوع.