تحية سورية دمشقية جامعية هندسية مدنية إلى جميع الزملاء وأخص الوافدين الجدد
- بالنسبة لمقالتي أنا اطرح فكرة أو سؤال اضمحل بسبب مصالحنا وحب الذات الاوهو:ما هو الشيء الذي اختص بيه نفسي ومجتمعي في آن واحد.
قديكن هذا السؤال بالنسبة للبعض في طي النسيان أو لم يصادفه طيلة حياته على شاشات التلفاز أو صفحات النت أو في احد السرافيس أو في أعين من يحب لكن انا صادفته في احد البرامج كان يتحدث عن الشعب الياباني (محادا يفكر أني بعدها اخترعت روبوت أعوذ بالله
مخي مابيتحمل هيك شغلات)بس صدقاً بعدها فكرت كيف يمكن ان اكون مفيد للمجتمع(صراحة عصرت عصرت مخي اول مرة ما طلع شي قلت لحالي بجرب مرة تانية ماني خسران شي وخصوصاً العصر كان ببلاش، المهم بالنتيجة حصلت على ثلاث قطرات شو بساوي هادا يلي انعصر معي) وهم كما يلي:
أولاً:النظافة
شباب صبايا خطرت ببالي النظافة كلنا نعلم وقرأنا الشعارات الطنانة التي توصي بالنظافة(ماأثرت ولابعمرها رح تأثر) لكن عندما شاهدة ذلك البرنامج(ياريتني ما شفته) انتابني شعور غريب وتذكرت شوارعنا وحدائقنا وشعبنا و بعدها امتنعت عن رمي الاوساخ في أي مكان عام ولو حتى كان من اوسخ الاماكن لاني آمنت بفكرة النظافة إيمانا صادقا من القلب للقلب( بصراحة أضع جميع المخلفات في جيبي ولا ارميها على مبدأ: بوسخ حالي وما بوسخ بلدي وبعدين نحنا طلاب الجامعة شو مخلفاتنا؟تذكرت سفر،قشور سكاكر،رسائل حب كاذبة،.....)
ثانياً: الكهرباء
شباب صبايا اذا كل شخص فكر شوي مع شويت ارادة بشوف انو ببيتو بامكانو يوفر بالكهرباء وهادا الكلام موجه للأشخاص يلي ما بيشعروا بقيمة فاتورة الكهرباء أو بالناس يلي ماعم بيشوفوا الكهرباء .
بالنسبة الي صار عندي سوسة في البيت في اطفاء ماهو غير لازم من الاضواء واحياناً بطفي اللازم.
ثالثاً: الماء ثم الماءثم الماء
صبايا شباب اذا تغاضينا عن ما سبق مستحيل نتغاضى ونتجاهل الماء نحنا عم نعيش ازمة حقيقة بالماء وهادا الكلام موجه لكُن ياصبايا قبل الشباب لأنكن انتن ستصبحن ربات بيوت ومربيات اجيال( بالاضافة انو الرجل بيسمع كلمة إمراته في هذا الزمان للأسف)
شباب صبايا نحنا مهندسين وحسب حكي الناس نحنا النخبة بعد الأطباء(ما بحبهم) فلازم يكون ألنا موقف ب الحياة
هاي تجربتي :بجوز البعض منكم يقول ياريت ما عصر مخه أو شو هالمهندس الفاشل يلي مستوى تفكيرو محدود
انا بقول: ياجماعة هادا الحكي موجه للاشخاص يلي متلي يلي حابين يصحو اما يلي أتجاوز هادا المستوى فبقلوا نحنا بحاجتك وبحاجة خبرتك لنكون متلك ونكون إيد وحدي ويلي عندو فكرة يطلق سراحها.
يا جماعة انا متل هالشباب مخي مليان(روحات وجيات- بحب البرازبل وريال مدريد- مدمن ميغ وماسنجر- وقريباً بدي قص شعري سبايكي) بس كل شي حكينا ما بيتعارض مع ميولنا ورغباتنا بس بدها شوية ارادة وخلينا نجمع افكارنا مع بعض لعلى وعسى بنساوي شي بيفيدنا وبيفيد اولادنا ومجتمعنا،
بالنتيجة: حاسس حالي مفيد ورح حاول قريباً اعصر مخي مرة تانية لعلى وعسى تكون نتيجة العصر(اختراع ربوت) وبتمنى كون قدمت تجربتي باسلوب يرضيي الجميع وبعيدا عن الخطابات والمقالات التقليدية وعذراً عن الأخطاء اللغوية
بشكركم وبشكر الزملاء المشرفين على المنتدى