شو مشان أنو 15 زائر بينهم 2 عضو 

شو كل هلقد المعجبين كتار

بكل الأحوال ما رح أحكي كتير هلأ ... رح أترككم مع كم شغلة وبكرة بكمل ...

ملاحظة: في مفاجئة بكرة 

الله يعينكم عليي

لكان رح بلش حكي عن حالي ... وانشالله لحق أحكي شغلات تانية لأنو حياتي مليئة بالإثارة والتشويق

انتظرونا مع .... مغامرات حســـان

والله صعب الواحد يحكي عن حالو ....

ألبي طيب كتير ... يعني لدرجة بتزعجني وبتزعج اللي حوليي أحيانا ... لأنو ما بحب زعّل حدا ... وحتى لو حدا زعلان مني لشغلة مالي مقتنع أنو خرج ينزعل عليها بتدايق كتير    ...

ما عندي شي مخبى ... بنوب   ... وهاد الشي رح تلاحظو من خلال حكيي هون   ... وكمان فيكم تقولو أنو بتسلح بهي الشغلة مشان ما حدا يكون ماسك عليي شي

عاطفي ... معظم ... أو كل قراراتي مبنية على العاطفة ...

صريح زيادة عن اللزوم .... وعفوي بتصرفاتي وبأقوالي

بحب أعرف العالم شو عم تحكي عليي من ورا ضهري  .... ( كتير كتير كتير)

في كتير تناقضات بشخصيتي ....يعني

بحب كون نحيف أكتر من هيك ... بس باكل وجبات سريعة كتير   .... وكتير يعني كتير كتير

بحب القراءة ... بس ما بقرأ كتير

بحب الرتابة (كتير) ... وغرفتي على طول منكوتة

اكتشفت مؤخراً إني بحب الشعر ... مع أنو ما بطيق العربي كرمال أستاذ حباب درسني بالأعدادي ... ومالي حافظ ولا بيت شعري

بحب البسط ... بس أحيانا بستلذ بالإكتئاب !!!!

وبالمناسبة ... بما أنو انجابت سيرة الأكل

أنا بحب كبة لبنية .... وشيش برك ... بالإضافة (طبعاً) لباشا وعساكرو

بحب الحرا بأصبعو ... كنت موت بالمحاشي بأنواعها بس من بعد ما عملت ريجيم بزماناتي بطلت آكل رز ولهلأ ماشية معي القصة

مشان هيك باكل وجبات سريعة لأنو أكتر من تلت رباع الأكل ما بحبو وكل أكلات الرز ما باكلها وأكلاتي المفضلة بدها شغل على يومين لتصير  

لو ما فتت صيدلة كنت فتت عمارة وبلا تردد ...

بالمناسبة ... أنا عايد الباكالوريا

بأول وحدة جبت 211 وعملت دورة عمارة وقدمت على الفحص ونجحت ..... بس ما ساعدوني علاماتي

والحمد لله بتاني سنة جبت 231 مع أنو ما كانت متوقعة بنووووووووووووووووووووووووب ... وصدقوني مو غرور عم قول أنو ما كانت متوقعة (متل ما بيعملو العالم ...  )

أنا وحيد على أختين أكبر مني ....   (دلال مضاعف )

لهيك تصرفاتي ممكن يعتبرها البعض شاذة عن تصرفات الرجال المعهودة  .... بس ما بيعرفو أنو تربيت مع بنتين ... ووقت وعيت على الدنيا متل العالم وبلشت تتكون شخصيتي كانو بسن المراهقة وما أدراك ما سن المراهقة  وبالإضافة أنو كنت الأصغر بيناتهم وبابا عاطينا حرية مطلــــــــــــــــــــــــــــــــــــــــقة

حساس زيادة عن اللزوم  ... يعني حتى رح تتفاجأو وقت قلكم أنو دمعتي سخية كتير لهلأ   ... بس مو لأنو تربيت مع بنات  .. يمكن وراثة!!! ..والله جد أمي وأخواتي نفس الشيء ... 

كمان بكون مبسوط آخر بسط وفجأة (يا من دون سابق إنذار .. يا أما بيكون في شي صغير كتير ) بينتزع مراقي وبزعل .. سموها متل ما بدكم (مزاجية أو حساسية أو ... إلخ)

لنا عودة غداً إن شاء الله ...

مسا الخير..............

والله خجلانة شارك خايفة  تألعوني من المنتدى على قد مو مشاركاتي قليلة؟؟؟؟
الموضوع كثير حلو وكثير عجبني(لاحظو راح الخجل)
حسان بعرف المايك معك بس أنا حابة احكي عن أميرة  شوي لأنها رفيقتي عملي نظري صيفاً شتاء فقط  فأميرة يا جماعة باختصار أميرة بكل معنى الكلمة بسلوكها بتعاملها مع الناس وهي فعلاً بتعرف تعيش الجد والمزح وهي بالتأكيد رفيقتي وأنا فخورة بصداقتها
أما إنت يا حسان ففعلا شخصيتك مميزة وعندك صفات ما كنت متوقتها بالشباب ؟؟؟وذكرتني بالريجيم والله هلكنا
موفقين

بكره الكذب ... أنا شخصياً رأساً ببين على وشي وقت أكذب (وهي من النوادر)

بكره التكبر ... كتيييييييييييييييييييييييييييييييييييييييييييييييييييييييييييييييييير

بكره التسلط ... فيكم تقولو مو كره ... بس بتجاكر من هدول العالم .. أنو شو مشان؟؟!!؟؟

بكره الظلم ... هي أكتر شغلة بكرهها

بكره أنو حدا يحرجني قدام العالم ... ما بتتصورو أديش ... يعني قلولي موت ولا حدا يخزيك ... بقلكم أتلوني أحسن

بكره أنو حدا يزعل مني ... مع أنو هي من النوادر وإذا حصلت بتكون بسبب سوء تفاهم

بكره الغش ... بكل شي .. يعني حتى لو غشينا بتجارب العملي بأنبني ضميري شوي

بكره أنو حدا يسكر بوشي سواء التلفون أو الماسنجر  (يا لطيف شو بتدايق وقت حدا يعملها)

بحب ألعاب الكمبيوتر كتير ... بأنواعها ... بيمضى الوقت وما بحس

بحب أتعرف على عالم جديدة كل يوم (هي الهواية جديدة ... لأنو كنت خجول زيادة عن اللزوم ... وهلأ خف شوي عن الأول بفضل الجامعة )

بحب أتعلم شغلات جديدة (أكيد مو قصدي شغلات عملية   ...لأني تنبل كتير  ... قصدي ثقافة) بس فيني علة أنو بنسى كتيـــــــر 

بحب أنو العالم تحبني

بحب الأطفال كير ... يمكن لأني خال لخمس ولاد أكبر واحد فيهم صف أول ... هلأ بنت أختي عم تمشي جديد   بطير عقلي وقت شوفها ... هيكة بتمد إيديها لأدام وبتمشي متل البطريق   ... بالمناسبة بحب البنات أكتر من الصبيان

بحب الموسيقا كتير ...عربي أو أجنبي المهم اللحن والكلمة يكونو حلوين... كمان ممكن تتفاجئو !!!  بحب بعض المطربين بشكل مميز ... متل شيرين أو فيروز ...

بحب الصيدلة ... عنجد كانت حلم حياتي ... ومتل ما بيقولو كانت (الحلم الضائع) وما كنت متخيل أبداً أنو فوت هاد الفرع بعلاماتي ....

بحب أتأمل الوجوه ... بعرف شغلة غريبة   ... بس ممتعة كتير

بحب الصداقة ... وما بحب يكون مخبى بين الرفقات شي بنوب سواء كان خاص أو عام

بحب الموضة والتياب ... وبحب الألوان كل الألوان بشرط تكون فاتحة ... وبحب اللون الأحمر ومشتقاته بشكل خاص

بحب فصل الخريف والشتاء ... يعني بحب البرد لأنو بحب الكمكرة والسكون والهدوء  وما بحب عجقة الصيف

بحب أنو أنهي كلامي عن حالي هون ...

سنعود بعد قليل ..

بقرأ حكم كتير ... بس ما بطبقهم كلهم

رح حطلكم كم حكمة ظراف

- أراد رجلٌ تطليق زوجته، فقيل : ما يسوؤك منها؟.. قال : العاقل لا يهتك ستر زوجته. فلما طلقها قيل له : لِـمَ طلقتها؟.. قال : ما لي وللكلام فيمن صارت أجنبية؟!..

- قال أحد الحكماء : لا يغرنك أربعة : إكرام الملوك، وضحك العدو، وتملُّـق النساء، وحـرُّ الشتاء!..

- كتمان الأسرار يدل على جواهر الرجال، وكما أنه لا خير في آنية لا تمسك ما فيها.. فلا خير في إنسان، لا يكتم سراً!..

- قال الفضيل بن عياض : ثلاثة لا تلومهم عند الغضب : المريض، والصائم، والمسافر.

- قال أحد الظرفاء : إني أخاف من النساء أكثر من الشيطان!.. لأنه سبحانه يقول في سورة النســاء : {إِنَّ كَيْدَ الشَّيْطَانِ كَانَ ضَعِيفًا}، وفي سورة يوسف : {إن كيدَكُـن عظـيم}.

- إحسانك للحرِّ، يحركه على المكافأة.. وإحسانك إلى الخسيس، يبعثه إلى معاودة المسألة!..

-  جاء رجلٌ إلى أحد الحكماء وقال له : إني تزوجت امرأة وجدتها عرجاء، فهل لي أن أردها؟.. فقال له : إن كنت تريدُ أن تسابق بها.. فردها!..

- قال إبليس : العجب لبني آدم!.. يحبون الله ويعصونه، ويبغضونني ويطيعونني!..

-  من ضيع حرثه، ندم يوم حصاده!..

-  تشاجر زوجان وامتنعا عن الكلام.. وقبل أن يصعد الزوج للنوم، قدَّم لزوجته ورقة مكتوب عليهـــا : ايقظيني الساعة الخامسة صباحاً، وفي اليوم التالي استيقظ الزوج، ونظر الساعة فوجدها الثامنة!.. فاغتاظ، ثم لبس ثيابه، ولما أراد الخروج، نظر فرأى ورقة مكتوب عليها : استيقظ، الساعة الآن الخامسة!..

- من التناقضات العجيبة أن يكون أول ما يهتم به الإنسان، أن يعلم الطفل الكلام، ثم بعد ذلك يعلمه كيف يسكت!..


.......

والباقي رح تشوفوهم بتواقيعي وبصفحتي الشخصية على مدار الأيام

بحب كتير أتفرج على الملفات الشخصية للأعضاء ...

وبكتشف منها شغلات أحياناً

يعني مثلا هلا وأميرة كاتبين جملة وحدة (الله يجيبك يا طولة البال !!!!!)

نجم كان كاتب جامعتو (دمشق ... وأفتخر) بعد شي يومين شفت حسام كاتب (دمشق وباعتزاز) وإياد نسيت شو كان كاتب بس من نفس السياق

أسيل بتغير كتير بملفها الشخصي ... وبحس أنو بتغيرو حسب المود تبعها ... يعني وقت تكون زعلانة بتمحي كل بياناتها على سبيل المثال يعني...

أنا كمان بغير ملفي الشخصي بس من باب التجديد مو أكتر

وكمان في عالم بتكتب أسماءها بطريقة غريبة خوفاً من المجهول !!!!!!

رح أحكي انطباعاتي عنكم   ... بكل موضوعية وبس إيجابيات 

إياد ... 

ظريف   .. ماشي حالو  ... من أول العالم اللي تعرفت عليهم بالكلية ... مثقف ... بحب استشيرو بكتير شغلات ... بيكتم الأسرار ... عندو تصرفات ما بتعجبني وعندي تصرفات ما بتعجبو ويمكن هاد سر صداقتنا القوية أنو على طول منتناقش ومنتجادل ... اسمو قبل اسمي بالعملي .. لك حتى وقت انتقلت لغير فئة لحقني ... يمكن كمان تلاحظو أنو على طول أنا وياه بالجامعة مع بعض ... وبصراحة هوة من أعز أصدقائي مع أنو شخصياتنا متناقضة بكتير شغلات

حسام ...

كتير حباب ... بعرفو من أيام المدرسة ... وقت يزعل ما ببين عليه ... ما بيخلي هم على القلب بنوب ... وقت كون زعلان بحب حاكيه ...

نجّوم (السيد بطريق)...

طموح ... شغيل ... شاطر ... حباب كتير وظريف ... متل الزبدية الصيني ما شاء الله بكل شي بيفهم ... على طول بقول يا ريتو من الدفعة تبعنا

في كتير شباب بس شي نسيتو حالياً وشي ما بتعرفوه

مننتقل للبنات ...

جماعة السنة الاولى ...

بصراحة لهلأ ما بعرف ميز وحدة من وحدة (بدون زعل) يعني بحس أنو كلكم نفس التفكير ونفس أسلوب الحكي وحتى بتدرسو مع بعض ... ووقت جاوبكم على شي سؤال ما بعرف مين عم جاوب

هلا ...

صاحبة مبدأ ... كمان حساسة ... بيعجبني رأيها ببعض الأمور ... مؤخراً اكتشفت أنو نقاقة (متلي)  ... اللي ما بتعرفوه عنها انو كان اسمها منفوشة ووقت سألتها ليش قالت مشان أسئل 

أميرة ...

بحسها بتحب القراءة كتير ... قلبها طيب ... عقلها كبير ... اللي ما بتعرفوه عنها أنو التانية على دفعتنا مع أنو بتستحق تكون الأولى بامتياز

إيلان ...

ما بعرف كتير عنها لأنو ما عم تشارك بالآونة الأخيرة ... بس اللي بعرفو أنو رفيقة أسيل كتير وأنو بتتجاكر وقت حدى يناديلها أيلان
...
كمان بالإضافة أنو كلهم أكابر ومربايين أحسن تربية