رد مشاركة : تشريح الرأس والعنق .. سنة أولى طب أسنان
يعطيكم ألف عافية صبايا وشباب
أنا من الزمرة السادسة وقدمنا يوم الأربعاء متل ما بتعرفوا كان داخل معنا للصفحة 118 وأنا ما لحقت غير للصفحة 70 بس مرت على خير
من وجهة نظري:
القسم النظري من المادة من أكبر سلبياته طول مدة المحاضرة... يعني كطلاب سنة أولى بتصور ما حداعم يقدر يحافظ على زمام الأمور اكتر من ساعة كحد أقصى... الدكتور عم يعمل اللي عليه.. الظاهر الوقت والظروف وضخامة المنهج ما بتسمح للشرح المفصل والتكرار.. يعني يعطيه العافية عم بيقوم بدوره وهاد الواقع بدنا نتحايل عليه ونتأقلم معه...
بالنسبة للقسم العملي.. شفت أنه المشرفين عندهم كفاءة مناسبة وعم نستوعب أكتر عالشرح على العظام مباشرة وعم نطلع حافظين خطوط عريضة مهمة وهاد الشي بيساعدنا كتير..
وبالنسبة للأخت إيناس أنا تقريبا عم عاني من نفس مشكلة البطء في الانجاز اللي عم تعاني منها.. بتصور هاد شي طبيعي لبين ما نتأقلم مع المادة ونلاقي طريقة مناسبة لدراستها.. وبتصور نتائج المذاكرة رح تكون جيدة وترفعلنا معنوياتنا وتعطينا طاقة لقدام انشالله.. فلا تخافي أختي
أنا كمان عم عاني من مشكلة الملل من الدراسة يعني ما عم اقدر اتحمل دراسة متواصلة يمكن بسبب الجو تبع البكلوريا اللي لسى محاوطنا لا شعوريا.. ما بعرف حدا عم يعاني من هالمشكلة؟؟
أنا هلق ناوي تابع مع جلسات العملي يعني انتقل من الفك العلوي للعمود الفقري والقسم الللي تركته بحاول استدركه بأوقات مناسبة لأن فهمان أكتره من العملي.. شو رأيكم بهالطريقة؟؟
وبالنهاية عندي استفسار صغير... لوين وصلنا باللنظري؟؟
سلامي ومحبتي واحترامي
أخوكم عودة