يسعد صباحكون صيادلة

عندي أستفسار بسيط

بحالات الرشح أو الكريب

متعارف عندكون

خلطة أبر ديكلون+ديكسا

بدون وصفة

مع أنه قسم كبير من صيادلة تانين
بحذروا منها

شو تأثيرها السلبي؟

معلش أستفسار تاني

عنا دكتور كل مرة باخذ أبني لعندو
مابيعطني دوا  غير "تيمبرا "
خافض حرارة

وأبر روزيف عيار 1000

دائما دائما نفس الوصفة

طبعا معه إلتهاب قصبات

حتى إني صرت أصرف الوصفة

كل مرة بصير معه هيك

بدون ما أرجع للدكتور

ياترى شو فاعلية هل الإبر وإلها

سلبيات ولا لأ؟

شكرا إلكون سلفا

موضوع في غاية الأهمية

سلمت أناملك طوق الياسمين

السلام عليكم

البيتاسيرك
المادة الفعالة فيه هي بيتاهيستين وفي عيار 8 و16 هو الدواء المفضل لعلاج حالات الدوار وطنين الأذن والدوخة... (يعني فينا نقول خاص بمشاكل الأذن الوسطى)....

أما الديمنهيدرات فهي لمعالجة الغثيان ودوار الحركة....

الأول عالأغلب ما بسبب النعاس... الثاني يسبب النعاس...

مشان عمر المريض ما بظن في تحديدات يعني عالأغلب الاتنين من فوق ال12 سنة...

من شوف آراء البقية....

اقتباس

بحالات الرشح أو الكريب متعارف عندكون خلطة أبر ديكلون+ديكسا بدون وصفة

"ديكسا" هو ديكساميتازون من مشتقات الكورتيزون لا يعطى إلا في الأرمراض المناعية أو (الميؤوس من علاجها بأدوية أخرى) يسبب اضرار كتير (منها احتباس سوائل وخلل بتوزع الشحوم بالجسم وخربطة لهرمونات الجسم هذه) رغم أنو الإبرة الذهبية يللي بتشفي الأعراض بسرعة.

وبالنهاية الرشح والكريب غالباً ما بيلزمهم سوى راحة والإكثار من السوائل ومسكنات بسيطة متل الباراسيتامول (بنادول).

اقتباس

عنا دكتور كل مرة باخذ أبني لعندو مابيعطني دوا غير "تيمبرا " خافض حرارة وأبر روزيف عيار 1000 دائما دائما نفس الوصفة طبعا معه إلتهاب قصبات حتى إني صرت أصرف الوصفة كل مرة

التيمبرا خافض حرارة مناسب جداً وآمن للأطفال

"روزيف 1000" دوا التهاب ثقيل بيجوز لما الدكتور وصفو لابنك كانت حالة الالتهاب عندو قوية جداً .........أما تكرار الوصفة عشوائياً فبيعمل مشاكل منها أنو الجراثيم بيصير عندها مناعة من هالدوا (رغم أنو قوي) وما بقى بيفيدو.......بالإضافة لأنو مو اي سعلة بإمكاننا نشخصها أنها التهاب لأنو نسبة منيحة من الأمراض التنفسية فيروسية لا ينفع معها أدوية الالتهاب إن لم تضر


والصرف العشوائي لهالأدوية مشكلة عالمية متوقع بعد كم سنة تبطل فعالية كل الصادات الحيوية تجاه الجراثيم.



إذا غلطانة بشي صححولي زملاء 

السلام عليكم

يسلم تمك golden pill هيك كنت بدي جاوب بس ما بعرف ليش اترددت.....

السلام عليكم

أنا برأيي إذا كان ابنك الله يسلمو بضل بينتكس وكل مرة بيوصفولو نفس الدوا

فالأفضل تطلب زرع جرثومي من أحد المخابر

مو شرط يكون العيار عالي بأنو يقضي على كامل الجراثيم الممرضة

لأنو ممكن تكون شكلت مقاومة

(كأنو في وجه شبه بهي الحالة مع الشي يلي عم يصير عنا)

لازم يتحدد الدوا يلي بأثر نوعياً على هي الإصابة المتكررة

لازم تنتبه لهي الحالة وتعالجها وما تخليها تتفاقم لأنو بهالعمر يمكن يتطور عندو ربو


ربنا يعافيه ويسلملكم ياه

حلو كتير ... بس يا شباااااااب بترجاكن حاجي تقولو دوا التهاب وظرف التهاب .. نحنا كصيادلة مو معقول نكون أول الغافلين عن الموضوع هاد

يعني حلاوة الانكليزي انو في شي اسمو inflamamtion بيتعالج بالـ anti-inflammatory drugs

وفي شي اسمه إنتان (عدوى) infection يلي بيتعالج بالـ antibiotics (صادات حيوية) ...

يعني إذا ما نحنا نبهنا الناس أو المرضى بانو هاد اسمه ظرف أنتي بيوتيك وعودناهن على هالمصطلح ونبهنا للفرق بين الاتنين .. رح تكون مشكلة كبيييرة بمعرفة سبب المرض وطريقة علاجه والمقاومة للأنتي بيوتيك كل مالها رح تزداد أكتر وأكتر ورح نوصل لمرحلة ما نلاقي أي فائدة من الصادات الحيوية.

 

طيب بعدين لازم ننشر ثقافة الزرع الجرثومي .. يعني انو المريض يعمل زرع وياخد صاد واحد مو أحسن ما ياخد 10 صادات ويصير عندو مقاومة للكل .. طيب ممكن تكون هي أحد أهم وظائف الممثل العلمي للشركات الدوائية تنبيه الأطباء لهالناحية ..

 

صار لازم استئصال الاستخدام والصرف للصيادلة ووصف الأطباء (والصيادلة) العشوائي للصادات ..

 

والله يجزي الخير كل صيدلي بيتعامل مع المهنة بإنسانية وبحرفية عالية

يسعد صباحكون
مرة تانية أحبائنا صيادلة المنتدى سحورك مبارك بإذن الله

وجزاكم الله خير على الرد الشافي والوافي

وربي يسلم الجميع ويرزقكم الذرية الصالحة

رح صحح فكرة أوردتها أنا وهي
أنه
إبرة روزيف عيار 1000 كنت أعطيها لأبني جرعتين بظرف 24 ساعة

طبعا حاليا بالصيف الحمدلله تشافى تقريبا بس أحيانا
بس يكون نايم بالغرفة تحت المكيف بسعل شوي
ويصير صوت هرهرة بصدره
‏ عملتلو صورة كذا مرة وأكدلي الدكتور وجود إلتهاب في شعيرات القصبات الصدرية

عموما أنا رح أعمل بنصيحتكون
ومرة تانية شاكر إلكون أنا

بالعودة لموضوع أخر

مع إعتذاري الشديد إني عم لازم

الموضوع وأقطع ملازمتكون

الرائعة

لدي سؤال أخذت من الصيادلة

عليه أجوبة متناقضة

يوجد في الصيدلية أبر سحرية

على حد وصفهم

لايستحضرني الأسم العلمي لها الآن
ولكن نسميها عموما أبر "كلس"

ونستخدمها مع الأطفال

عند تأخر نمو الأسنان أو تآكلها

وهذا ليس موضع سؤالي

وليست السحرية هنا

إنما في الإستخدام الثاني لها
وهو تأخر الطفل في المشي

بمجر أعطائها للطفل ماهي

إلاساعات أو أيام حتى نلمس

أثرها عند الطفل على قولة

الصيدلي بصير يكرج كرج

المهم

أعطيتها بوصفة طبيب و صيدلي

لأبني

ثلاث أبر على مدار 21 يوم

أي كل اسبوع إبرة بالفخذ

طبعا والحمد لله جابت نتيجة

رائعة وصار الصبي ينط نط

لكن بالمقابل هناك من حذرني

‏(أطباء وصيادلة)

منها بقوله تساوي هشاشة

بالعظام


ولكم النصح لنا

حتى نحتاط ونتنور

وجزاكم الله كل خير

اقتباس

بس يا شباااااااب بترجاكن حاجي تقولو دوا التهاب وظرف التهاب .. نحنا كصيادلة مو معقول نكون أول الغافلين عن الموضوع هاد

يعني حلاوة الانكليزي انو في شي اسمو inflamamtion بيتعالج بالـ anti-inflammatory drugs

وفي شي اسمه إنتان (عدوى) infection يلي بيتعالج بالـ antibiotics (صادات حيوية) ...

هالمصطلحات هي الشائعة وأنا شخصياً ما بحب أستخدم مصطلحات علمية دقيقة جداً أثناء التعامل مع المرضى غير المختصين بالأمور الطبية.......لأنو المريض ما بهمو شو الاسم الدقيق للزمرة الدوائية بل بيهمو يفهم حل لمشكلتو حسب مفهومو هو بغض النظر عن اي تسمية........لأننا عايشين بهالمجتمع ولكل مقامٍ مقال


خدي مثال..........نحنا كصيادلة مثلاً ما منفهم كتير بأمور البرمجيات لما أجي اسأل واحد عن شي بمفهومي ويجي يجاوبني عليها بس بتسمية "اختصاصية" مو شائعة هون بحس  شعور مو كتير ظريف وبصير بدي فكر بالتسمية الجديدة وفرقها عن مفهومي وبنسى سؤالي....

ذكرتيني مرة مريض سألني: أنا رح آخد ديكلون بدل بروفن لأنو برتاح عليه أكتر بيمشي الحال؟؟؟ قلتلو: أي الاتنين مضادات التهاب لا ستيروئيدية ........قلي: شو يعني؟؟ ولي أنا ما بدي دوا التهاب بدي مسكن الألم..........بصراحة هون حسيت حالي مفزلكة وضيعت الزلمة


بالمناسبة حديثي عام وما قصدت فيه الأنتي بيوتيك بحد ذاته.....

السلام عليكم

بالنسبة إلي فبستخدم مصطلح مضاد حيوي حتى مع الناس العاديين

هي الغرب بقولو antibiotic ومتعودين عليها

وبالنسبة للديكلوفيناك والبيروفين فمتل ما تفضلتو المريض بيرتعب بس تقلو مضاد التهاب ((لا ستيروئيدي))، وقعود شرحلو أنو شو هاد لا ستيروئيدي


استاذ عبد الله
أهلاً وسهلا فيك دائماً

الأفضل ما تنيم ابنك تحت المكيف

أول شي ممكن يجيه رشح أو غريب
وتاني شي المكيف بينمو فيه فطور وجراثيم وممكن تنتقلو إذا كان قريب من المكيف

بالنسبة للإبر بالعضل للأطفال يلي حكيت عنها فبعرف أنو هي إبر فيتامين د
بتجي إبر زيتية وحقنها صعب
ما عندي فكرة إذا ممكن تسبب هشاشية عظام
لأنو بالأساس فيتامين د هو باني للعظم
لكن رح ابحث بالموضوع وردلك جواب



بالنسبة لموضوع الزرع الجرثومي
طبعاً مو أول ما يجي المريض عم يسعل أو حرارة عالية بنقلو روح عالمخبر
ممكن الاعتماد على صاد حيوي واسع الطيف

مع أنو الزرع الجرثومي بيعطيك المعالجة النوعية الناجعة
بس الوضع المعيشي ببلادنا ما بيسمح لكتير ناس


مرة مريضة صار معها التهاب قصبات
وضل الطبيب يوصف نفس المضاد الحيوي (غالي الثمن)
ومافي فائدة
وبعد زرع القشع طلعت الجراثيم بتتحسس على مضاد حيوي تاني رخيص الثمن