هههههه
والله العظيم مالي حافظة شي

لسا عندي شي خمسين وصفة غيرها شو بدي احفظ لاحفظ

بعدين بتعرفي ليش ضحكت لأني نفس الكلمة كنت قولها لأبي هو وعم يعلمني وخصوصي على وصفات هاد الدكتور  

بس عن جد اذا بتركزي فيهاللوصفة بتلاقي كل شي كتبتو موجود بس بصراحة بدك حدا أول مرة يفك الشيفرةادامك وقتها بتشوفيها شلون بتصير واضحة

بعدين بسيطة يلي بيشتغل بالصيدلية بدو يمر عليه اشكال الوان من الوصفات وبالنهاية اذا كل وصفة مابدي بيعها لأني ماقدرت اقرأها هيك مابستفيد شي من شغلي بالصيدلية

عن جد انا بالفترة الأولى كنت وقت تجيني وصفة لهالدكتور فورا قول ماعندي الدوا لأني ما أعرف اقرأها ومستحيل قول للمريض مااقدرت اقرأها

بس بعدين قلت لحالي خلص حاولي تتعلمي وعن جد الحمدلله مشي الحال

لا تواخذونا   

السلام عليكم

الحمد الله تخميني طلع بمحلو الأول والتالت طلعو معي صح... بس التاني والله ما انقرا هيك معي....
يلا معنا معنا منتعود على فك الشيفرة السرية تبع الدكاترة...
يسلمو بلسم عالوصفات....


   

بارازون " حبة 3 مرات " .. و الله أبداً ما انقرأت معي هيك ...!!!!

الله يعينا .. عنجد في بعض الدكاترة بدهم دورة خط ..

شكراً بلسم ع الوصفات ...

************
و على سيرة الوصفات المفشكلة ..
بتجينا ع الصيدلية وصفات لدكتورة بتكتب اسم الدوا بالعربي !!!
و بخط مفشكل كمان من دون نقط !!!
             

اقتباس

صايرين كتير عبيوصفوا لأي واحد عبيصير معو عسر هضم

دوا مضاد إقياء (إبرة دي فوميت منخلطها بإبرة سباسمافير)

ودوا مضاد حموضة المعدة ...

متل الراشتة يلي فوق ....فشو صحة هالشي علمياً ....!!

اقتباس

الميتوكلوبراميد يزيد حركة الجهاز الهضمي والألفيرين أليتو تعتمد  على انقاص حركة الجهاز الهضمي

 

تمام......مرة قلتلكم أنو سمعت من دكتور أنو ما بينوصف مضاد تشنج ومضاد إقياء سوا.....و"مراقب أدوية" عطانا التفسير


بس في شغلة مهمة كتير لازم ما نتاخد فيها:

مو مرجعنا وصفات الدكاترة أبداً......في كتير كتب ممكن تفيدنا
والدكتور ممكن كتير يخطئ أو تكون هالراشيته لحالة معينة ما بصير نعممها لكل الحالات

===============

بلسم الآلام:

شكراً كتير عالوصفات 
راح علي كتير وصفات فحاولت فيهم زبطت معي أول وحدة بس التانية عبس ما انقرت الأدوية معي

مرة أجا لعندي واحد معو راشيته (ريتان - دوا أوله dexami).....الدوا التاني ما مرق علي من قبل فحاولت دور  عليه بالبرنامج وطلع معي (dexamide) تركيبو "ديكساميتازون" طبعاً ما صدقت واتصلت بالدكتور ردت علي سكرتيرتو وقالتلي هاد الدوا على طول منوصفو مع الريتان...قلتلها لشو؟؟ قالتلي يعني مشان الريتان

المهم الدكتور مو فاضي يحاكيني......وبعدين بعد معاناة طويلة طلع الدوا "doxamine" لآسيا تركيبو "كلورفينرامين" طبعاً بعد ما راح المريض

طيب وقت الدكتور ما بيوضح آخر حرف ممكن يجيب آخرة المريض إذا الصيدلاني ما انتبه

======

وكمان ما كنت صدق أنو في ناس جامعيين والمفروض أوعى من عامة الشعب بتجادل وبتفاصل الصيدلي مفاصلة ليعطيهم أي شي كورتيزون ليسمنوا !!!!

في وحدة جننتني بدها كورتيزون لتسمن (مع أنها مو نحيفة) قال رفقاتها عم يعيبوا عليها وقالولها أنو الكورتيزون هو الحل الوحيد والأمثل بعد ما جربت كل فاتحات الشهية والفيتامينات


=====

وسؤال الآن عن الكورتيزون.......في طبيب وصف إبرة "ديكسونالين" لامرأة حامل قبل الولادة بيوم.......حدا بيعرف شو دخل الديكساميتازون بالولادة؟؟

وسؤالي التاني بعيداً عن الكورتيزون    شو قصة البروكسيمول؟؟
على علمي انسحب من السوق اقتداءً بالأسواق والدراسات العالمية التي أثبتت خطره......وإذ بتفاجأ أنو رجع والدكاترة عم يوصفوه

فليش عنا رجعوه؟؟
وليش الدكاترة لسا عم يوصفوه؟؟
طيب مو لازم أنا ما أرضى أصرفلهم ياه لأني بعرف خطورته ؟؟

السلام عليكم

[[شو دخل الديكساميتازون بالولادة؟؟]]
                                                                 
بعرف أنو بساعد على تحسين تطور الرئة للجنين في حال تأخر تشكلها
                                                             
وبينعطى حتى قبل بضع أيام من الولادة
                                                             
يا هو يا أنا نسيان

كمان شغلة:

اقتباس

مشان الجيلاتين .. يلي بعرفوا انو أي دواء أجنبي كبسول لين أو قاسي بيكون مصنّع من عظام الخنازير ..
مشان هيك إذا الواحد مو مضطر أو إذا ما في بديل ما لازم ياخدو ...

كان عندي حلقة بحث أيام الصناعية عن كبسولات زيت الثوم، فطلعت عن تركيب الجيلاتين وما كان الأساسي هو الخنزيري......بعدين بالمناسبة مشتقات الخنزير متل ما بسمع مو رخيصة فمو من مصلحتهم يستخدموها بشكل اعتيادي للكبسولات

هي مقتطفات من يللي طلع معي وقتها:

اقتباس

قديماً كانت الكبسولات الطرية تتطلب وجود الجيلاتين وملدّن وماء - إن أنواع الجيلاتين الأكثر استعمالاً هي المشتقة من مصدر بقري-
........
ومؤخراً تم تطوير قشور من مواد غير جيلاتينية (نشاء/كاراجينان)
.......
لقد استعمل في الـVegiCap Soft (التي طورت من قبل Cardinal Health) مشاركة من lota carrageenan والنشاء المعدل وذلك كبديل للجيلاتين. إن مشاركة تلك الهلامتان المائيتان تؤدي إلى تفاعل تآزري synergistic ينتج عنه شبكة هلام مناسبة لإنتاج الكبسولات الطرية
هي منيحة كتير مشان النباتيين والهنود يللي ما بيهون عليهم يقربوا على مشتقات البقر

بالنسبة لخط الدكاترة فما شاء الله إذا عالكمبيوتر عندهم

بس مستحيل تصير ... كيف بدهم يأثبتو وجودهم كدكاترة إذا ما فشكلو الخط !!

حتى قال في منهم قصادة بيفشكلو

يعني أد ما كانو مشغولين ما حتفرق معهم تزبيط كلمة

وعقولة الصيدلانية ... هاد تقليل احترام للمريض وللصيدلاني

ومرة حكت مع دكتور مشان يزبط خطو لأنو وصفاتو مو مفهومة

زبطو فترة رد رجع متل أول

ـــــــــــــــــــــــــــــــــــــــــــــــــــــــــــــ

اقتباس

ليعطيهم أي شي كورتيزون ليسمنوا

مبارح حكتلي الصيدلانية عن شغلة صارت معها بهالخصوص

مرة أجتها وصفة من دكتور (أنف أذن حنجرة) لبنت عمرها 15 سنة

فيها حب كورتيزون ومكتوب أنها تاخد عدة جرعات باليوم لمدة 20 يوم

فسألتها لشو الوصفة ؟؟؟ قالتلها مشان أسمن !!!

أول شي هالوصفة مو من اختصاص الدكتور ... تاني شي واصف الكورتيزون بنفس الجرعة بشكل مستمر ... يعني مو متل ما يفترض تقل الجرعة مع الأيام

بعدين فهمتها أنو أصلاً السمنة حتكون بسبب احتباس سوائل يعني مضرة وما منها فايدة ... لا هي شحوم أو عضلات ولا شي

فما عطتها ياها وقالتلها ما بيصير هيك يوصفلك

راحت المريضة لعند الدكتور وحكتلو ... فراح اشتكى عالصيدلانية لنقابة الصيادلة لأنو قالت أنو ما بيصير هيك يعمل (تشكيك بمهنيتو)

فحكو مع الصيدلانية وقالولها تعتذر ويهدو الأمور أحسن ما تكبر القصة ... فقالتلهم خلي يشتكي ويا شهادتي يا شهادتو بتنسحب

فطبعاً مو لمصلحتو الدكتور لأنو عارف حالو عامل شي غلط ... فبعدها اعتذر وما عد عادها نهائي

اقتباس

شو قصة البروكسيمول؟؟

إي والله حتى مبارح هيك كانت عم تقول الصيدلانية

انسحب من السوق رد رجع

بس يمكن مشان يصرّفو اللي عندهم 

اقتباس

شو قصة البروكسيمول؟؟

إي والله حتى مبارح هيك كانت عم تقول الصيدلانية انسحب من السوق رد رجع بس يمكن مشان يصرّفو اللي عندهم

لا تعليق ...
بس بظن السبب أكبر من هيك ...
و ما بينحكى هون.....

السلام عليكم ...

هلأ شو اضرار البروكسيمول حتى منعوا ؟؟؟؟

مو هو مسكن الم وخافض حرارة ... بس قوي شوي ...

   

(((لسا عندي شي خمسين وصفة غيرها شو بدي احفظ لاحفظ)))

بلسم الآلام ..

يلا الله يرضى عليك بتكسبي فينا أجر حطيلنا ياهن وحدة وحدة لحتى نشوف شو بيطلع معنا ;)

بعدين بما انك قطعتي شوط منيح بهالموضوع .. شو رأيك نعمل موضوع صيدلي اونلاين .. وبالوقت يلي أي واحد منا بالصيدلية وعندو نت مفتوح بيقدر يجاوب على أسئلة الأعضاء حول الأدوية لحتى ما يضوع وقت المرضى وهو عم يدوّر ...

 

(((حتى قال في منهم قصادة بيفشكلو)))

color your life

ولهيك لازم يندرج طلب كتابة الوصفات عالكمبيوتر ضمن اعتراض يقدّم لنقابة الصيادلة عالدكاترة .. لأنو الواحد منا إذا رايح لعند دكتور واتأخر دقيقة عن الموعد بروح موعده لتاني يوم هاد إذا ما بيلتغى أما نحنا نروّح 10 د على بلا طعمة معلش يعني!!!!!؟؟

((((فحكو مع الصيدلانية وقالولها تعتذر ويهدو الأمور أحسن ما تكبر القصة ... فقالتلهم خلي يشتكي ويا شهادتي يا شهادتو بتنسحب

فطبعاً مو لمصلحتو الدكتور لأنو عارف حالو عامل شي غلط ... فبعدها اعتذر وما عد عادها نهائي)))

 

والله هالصيدلانية كفوووو .. وعلى راسنا يلي عملته ولازم كلنا نعمل هيك .. ونكون أد حالنا لأنو هيك دكاترة بهيك تصرفات ناتجة عن جنون العظَمة ما بتمشي غير بالرصّ 

 

((هلأ شو اضرار البروكسيمول حتى منعوا ؟؟؟؟

مو هو مسكن الم وخافض حرارة ... بس قوي شوي ...)))

البروكسيمول = باراسيتامول + ديكستروبربوكسيفين

الديكستروبروبوكسيفين مادة مسكنة مركزية وهالمادة طلع الها أثر ضار للقلب وممكن تعمل لانظميات قلبية قد تؤدي للموت ..