اقتباس

الخيميائي بنظري آخدة صدى أكتر مما بتستاهل .. و بمراحل منها بتحسي بالملل وانو بدك ياها تخلص ولما تفرغي من قراءتها بجوز تسألي حالك انو اي وين الفكرة بالموضوع .. رغم انها مانها طويلة بس أخدت معي وقت منيح ... بس في حوالي مقطعين فيها بيعجبوني .. وبس

يعني قولتك اقرا شي بدالها أحسن

طيب شو الفكرة الرئيسية إلها؟

اقتباس

أحلام مستغانمي الها شطحات بس كمان الها طريقة وفلسفة خاصة بتميزها وبتعجبني .. هلأ مثلاً كتاب "نسيان كوم" مانو رواية ومفيد كتير كونه حصرياً للبنات وبيحكي عن تجارب واقعية ;) وكمان" قلوبهم معنا وقنابلهم علينا" مانو رواية وإنما كتاب بوثق كتير أحداث خصوصاً أيام حرب العراق مع وجهة نظر الكاتبة فيها ..

والله كمان سمعت كتير عن نسيان كوم
خلص حطيتها ببالي
بدي أقرأها و شوف هالكتاب اللي آخد صدى كبير بين البنات....


ومشان الشحطات فبرأيي (الحكمة ضالة المؤمن)
يعني الواحد بياخد المفيد من أي كتاب و بيتجاهل غير المفيد
و بالنسبة إلي بشوف إنو قراءة أي كتاب مو خسارة
يعني إذا بطلع من الكتاب كلو بفكرة وحدة فهي فائدة بحد ذاتها


هلأ الكتاب اللي عم أقرأه باينتو من هالنوع
توماس ارنولد مستشرق بريطاني موضوعي إلى حد ما عم يحكي بهالكتاب عن الدعوة الإسلامية كيف نشأت و كيف وصلت لبلاد المسيحيين و أصحاب الديانات الأخرى
فيه أفكار حلوة بس في بعض الأمور مالو فهمانها بشريعتنا فبتشوفي فيها مغالاة و إطلاق أحكام خاطئة
وكمان ترجمة الكتاب مو كتير زابطة فبتلاقي بعض الأفكار ركيكة
هاد رأيي المبدئي بالكتاب و بجوز بس خلصو يطلع معي رأي تاني....

الفكرة العامة للخيميائي :::::

راعي من اسبانيا عم يدوّر على كنز شافه بمنامه عند أهرامات مصر .. وآمن بصحته .. واتخلى عن كل شي ليدوّر عليه

وشخص أجنبي طالب للعلم ومعو كتب كتييير عم يسافر ليدوّر على "الخيميائي" يلي معو حجر الفلاسفة يلي نثرات قليلة منو بتحول أي معدن لدهب واكسير الحياة يلي بيشفي أمراض كتيرة ..

آم بالنهاية الراعي برحلته بيتعلم عن الكريستال وتجارته وعن السفر والأهرامات وبيلتقي بأشخاص حكماء وهو يلي بيلتقي بالخيميائي وبياخد من علمه وبيتعلم من حكمته وقدراته .. وبالآآآآآخر بلاقي كنزه بالمكان يلي انطلق منو بالبداية ..!!!

هي هيك عالسريع .. هلأ هيي حلوة بس في أحلى .. بس حلاوتها انها ما بحاجة لكتير من التفكير يعني فيك تقريها وانتي بالك مرتاح مو متل "وليمة لأعشاب البحر" يلي بدها مخ مصحصح وواحد ناوي يتعلم كتير شغلات ما بيعرفها وهو عم يقراها!

نسيان كوم ... أنا بحبه كتييير صراحة لأنو بخلي البنت تشوف الأمور على حقيقتها بدون ما تجملها متل ما بتعمل بالعادة .. وأنا كل فترة والتانية برجع لمقاطع منو لارجع عيدها واستذكرها ...

شكراً مها
هلأ حسب الفكرة السريعة اللي عطيتيني ياها عن الخيميائي
يبدو إنو فائدتها مو كتير كبيرة

بس مع ذلك فضولي ما بريحني لحتى اقرأها بنفسي و أحكم عليها

بس مو قبل ما خلص اللي علي قراءته.....

اقتباس

"وليمة لأعشاب البحر" يلي بدها مخ مصحصح وواحد ناوي يتعلم كتير شغلات ما بيعرفها وهو عم يقراها!

ليش عن شو عم تحكي؟
عنوانها غريب كتير!
معلش مها بدك تتحملني رفيقتك الفضولية

اقتباس

نسيان كوم ... أنا بحبه كتييير صراحة لأنو بخلي البنت تشوف الأمور على حقيقتها بدون ما تجملها متل ما بتعمل بالعادة .. وأنا كل فترة والتانية برجع لمقاطع منو لارجع عيدها واستذكرها ...

شوقتيني كتير لقراءتها
بس تعرفي هالطبع اللي بالبنت هو اللي بميزها عن الشب
بس كمان الموضوع يحتاج إلى عقلانية كمان
خلص بس اقرأها بعطيكي رأيي فيها تمام

على سيرة الفضولية

شلون الواحد بدو يخفف فضولية



أحياناً إذا شغلة بدي أعرفها و ما عرفتها ما بنام و ما برتاح لحتى أعرفها

هالطبع فيني من لما كنت صغيرة



بس كمان إذا كانت الشغلة سخيفة ما بهمني أعرفها

يعني أحياناً بتكون رفيقتي عم تحكيلي سيرة بتفاصيل ما بتهم بقوم من نص الدنيا بقلها: وصليني للآخر حبابة

اي مظبوط كلامك عن الخيميائي ... فيها مقطعين متل ما قلتلك حلوين بعملهن اقتباس بمشاركة لاحقة ...

وليمة لأعشاب البحر كمان بتحكي عن شخص عراقي أيام الحرب وراح لتونس يمكن .. أنا وصلت للصفحة 70 وهيي شي 500 .. وحاسة انو حتى هال70 لازمهن إعادة لأني ما فهمت شي .. هي نظرة مبدئية .. بس هيي رواية مشهورة كتير والكاتب سوري ...

نسيان كوم ما بياخد منك يومين لأنو كتير حلو وخفيف وبدو قعدة بعد ما تقريه لنتاقش فيه .. ;)

 

الفضولية عندي بما انها طبع فخلص أمورك صعب تتغير ههههه

أما إنك بتقطعي حدا فهي لازم تغيريها وتحاولي تصغي لأنو في ناس بيتحسسو من هيك ردّ :)

الواحد مو مشكلة يكون فضولي
                                                                           
بس إذا عرف السيرة بعدين لازم يبدي بعض الاهتمام
                                                         
مو خلصنا عرفنا شو صار وبعدين مالي علاقة
                                                                       

اقتباس

اي مظبوط كلامك عن الخيميائي ... فيها مقطعين متل ما قلتلك حلوين بعملهن اقتباس بمشاركة لاحقة ...

بس لا تنسي ها

اقتباس

وليمة لأعشاب البحر كمان بتحكي عن شخص عراقي أيام الحرب وراح لتونس يمكن .. أنا وصلت للصفحة 70 وهيي شي 500 .. وحاسة انو حتى هال70 لازمهن إعادة لأني ما فهمت شي .. هي نظرة مبدئية .. بس هيي رواية مشهورة كتير والكاتب سوري ...

مممممم
والله مخي حالياً مو متحمل تعقيد بنوب

اقتباس

نسيان كوم ما بياخد منك يومين لأنو كتير حلو وخفيف وبدو قعدة بعد ما تقريه لنتاقش فيه .. ;)

اقتباس

الفضولية عندي بما انها طبع فخلص أمورك صعب تتغير ههههه

لأ مها كل شي بتغير بس بصعوبة بالغة....

اقتباس

أما إنك بتقطعي حدا فهي لازم تغيريها وتحاولي تصغي لأنو في ناس بيتحسسو من هيك ردّ :)

لأ اطمني ما بتعامل بهالأسلوب إلا مع هالصديقة بس لإنو انا وهي كتاب مفتوح على بعض و منتحمل بعض
اما مع باقي الناس فقليل لحتى قاطعهم بس أكيد بظهر علي التململ لإنو بقولولي رفقاتي إنو كل شي بظهر على وجهي فوراً

اقتباس

الواحد مو مشكلة يكون فضولي
                                                                           
بس إذا عرف السيرة بعدين لازم يبدي بعض الاهتمام
                                                         
مو خلصنا عرفنا شو صار وبعدين مالي علاقة

معك حق
والحمد لله انا مالي من هالنوع أبداً

كتير اسفة بدي ائطع حديثكن بس كتير مضطرة اذا في حدا كتب حلقة بحث عن الصبار بليز يساعدنا شوي دورت كتير ومالائيت الو تنافرات بليز بليز ساعدوني

إذا كان قصدك نبات الصبار فاسمه agave ما عندي معلومات عنوغير أنو بيحتوي على صابونينات ستيروئيدية وبتقدري تدوري بالنت على هاد الاسم لمعلومات أكتر
أما إذا كان القصد نبات الصبر aloe vera في كتير معلومات عنو بقدر أكتبلك ياها إذاكان هاد النبات المقصود

السلام عليكم ....

ما بعرف اذا خلصتو حديثكن 

بس كمان انا بدي ائطعلكن الحديث   

شفت هالمعلومة عل الفيس بوك ....

قلت لاكتبها قبل ما انساها 



هـــــــــــل تعــــــــــلم

=--=--=--=--=--=--=
هل تعلم الوقت المناسب لشرب الماء ..
سوف يضاعف فوائده على جسم الإنسان ...
عدد ( 2 ) كأس من الماء بعد الاستيقاظ من النوم – يساعد على تنشيط الدورة الدموية .
كأس ( 1 ) من الماء – قبل الوجبة بنصف ساعة – يساعد على الهضم .
كأس ( 1 ) من الماء – قبل الاستحمام – يساعد على خفض ضغط الدم .
كأس ( 1 ) من الماء – قبل النوم – يجنب السكتة أو النوبات القلبية


************

لا تواخذونا