أي شو الشغلة تعجيز ....!!!

مشان الله عطوني الحل لأني جوعانة ....  

أولا: المقاطعة:

1- قاطع المنتجات الأمريكية لأنها تدعم إسرائيل

2- قاطع المنتجات البريطانية لأنها تدعم أمريكا

3- قاطع المنتجات الدانيماركية مشان الكاريكاتير

4- قاطع المنتجات الهولندية مشان الفلم

5- قاطع المنتجات الألمانية لأنها بجانب الدول السابق ذكرها

( و بالنهاية كل الناس بيبعتوا الايميلات لبعض من كمبيوترات و لابتوبات كل البرامج يلي فيه أمريكية، وهنن قاعدين بكوستا كوفي بعد ما تعشوا في كنتاكي ومعهن "تيك أوي" للبيت وبالأخير بيركبو سيارة أمريكية و كمان وبدخنو سجاير أمريكية  )


ثانيا: الصحة

1- لا تشرب بيبسي لأنه بيحتوي على مواد تنظيف وعصارة خنزير

2- لا تشرب ريد بول لأنه بسبب عقم

3- لا تستعمل مزيل العرق ولا الشامبو ولا الصابون لأنه بسبب السرطان

4- لا تأكل لحم البقر لأنه بسبب جنون البقر

5- لا تأكل دجاج بسبب أنفلونزا الطيور

6- لا تأكل سمك بسبب المد الأحمر

7- لا تأكل خضار ولا فواكه لأنها كلها هرمونات

8- لا تشرب مي لأنه معالج بالكلور

9- لا تأكل معلبات لأنها بتحتوي على مواد حافظة

10- لا تشرب عصير طبيعي لأنه بيجي على شكل عصارة مركزة

11- لا تشرب عصير غير طبيعي لأنه كله ألوان

( طيب يعني آكل هوا؟!!! .....  )

12- لاء لا تاكل هوا.. طبعا لأنه الهوا ملوث بعوادم السيارات ودخان المصانع

( و إذا خالفت النواهي السابقة كلها، دخلنا على العادات ) :

13- لا تشرب مي بعد الأكل

14- لا تنام و لا تمشي ولا تقعد بعد الأكل

15- لا تدخن و لا تشرب شاي ولا قهوة بعد الأكل

( أحسن شي .... انك تاكل و تنتحر!!!!!!  )

16- لا تخلي الماء بالبراد بقنينة  بلاستيك لأنها مسرطنة

17- و لا تخليه في قناني قزاز لأنه ممكن ينكسر بدون ما تعرف و تشرب وتموت

18- و لا تخليه بره البراد لأنو ممكن يتلوث وتشرب وتمرض
               
19- لا تشرب من الحنفية لأنها مو نظيفة

20- و لا تشرب مية صحة لأنها معبئة من الحنفية أو مكررة وفيها مواد مسرطنة

21- لا تحكي عالموبايل بدون سماعة لان الموجات بتقتل خلايا المخ

22- و لا تحكي عن طريق السماعة مشان الكهربا الساكنة

23- و لا تحكي عن طريق البلوتوث لان الموجات كمان بتقتل خلايا المخ

( يعني كل العالم يلي عايشين هالأيام عايشين بدون مخ )

24- لا تشغل المكيف بالسيارة لأنو الهوا بيجي من بره ملوث

25- لا تعبي بنزين الصبح لان الكثافة عالية

26- و لا تعبي في الليل لان الكثافة واطية

27- و اشراب خل مشان يحرقلك الدهون .... و لا تشرب خل مشان ما يعملك قرحة

28- و اطلاع في الشمس مشان فيتامين "د" .... ولا تطلع في الشمس مشان الأوزون.





ثالثا: الدين:

1- بيبعتولك  إيميل بقولولك أبعتو لجميع من عندك والله رح يعطيك 25864973 حسنة ....

( لأنه يلي باعت الايميل مكشوف عنه الحجاب )

2- و بيجيلك ايميل مكتوب بأوله أنك تقسم تبعت الايميل لكل يلي تعرفهم وبعدين بتم يذكرك انك أقسمت.

(ماسك عليك ممسك)

3- و ايميل بيقلك " دعاء من دعاه حققت له 100 أمنية "

( مصباح سحري هاد مو دعاء )!!!!

4- و فتوى تحريم " البوكيمون "

5- و فتوى تحريم " البلايستيشن "

6- و أحلى فتوى فيهن ............ فتوى قتل " ميكي ماوس "

يعني أحسن حل ....

انو الواحد لا ياكل ولا يشرب ولا يتنفس ولا يحكي عالتلفون ولا يطلع من البيت

بس يقعد يبعت ايميلات ....


ملاحظة : إذا قلت لكل يلي بتعرفون يقرو الموضوع رح يطلعلك جني سويسري راكب موتور يشكرك عني و إذا ما قلتلون رح اطلعلك أنا كل يوم بالمنام و قلك ليش ليش ليش ليش ليش للصبح و رح تضل تشوف كوابيس .....
   

ولييييييي
والله  ما انتبهت إنو كل هدول عم يصيروا معنا

بجد صديقتي والله الموضوع بجنن

وخاصة شغلة الإيميلات
       

مسا الخير
والله انا ياصديقتى ما بعترف لا على الشيوخ  اولا على شى اسموا سلطتون
لانوا فى عندي عقل او بعرف شغلوا
او هي المقاطعة شغلة فاضية او كترت حكي
شكرا
فراس الفرحان

يعني انا كنت بعرف انو حياتنا فيها تعقيد بس ما كنت متوقعة كل هلقد
بس ولله معك حق
كل يوم عم نسمع شي جديد وعم يطالبونا بشي جديد و اعملو هيك ولا تعملو هيك و اذا عن التناقض بحكيهن فحدث ولا حرج
يعني ما عاد نعرف لمين بدنا نسمع ومين بدنا نصدق

شكرا لموضوعك
تقبلي مروري

والله معك حق يا شامية بس كمان الواحد يكون معتدل يعني أنا متلك بميل للملل من هالتعقيد بس والله في شغلات خطرة عالصحة لازم الواحد يتجنبا
أما بالنسبة لشغلة الايميلات معك حق أنا كمان بجاكروني وخصوصي قصة الحلفان (قال انتى أقسمت) وبصراحة ماكنت رد عليون ورد ابعتا واصلا قريت مقال انو في ناس من اعداء الدين بيعملو يك ايميلات وبينشرو بين المسلمين وبيضحكو علينا بعدين متل ايميل قتل ميكي ماوس أو تحريم البوكيمون

ايه والله معك حق بكل كلمة قلتيها 

بس إنت غلطانة بشغلتين :   

  1- الدخان بعد الأكل ألذ شي   

  2-الرسائل ياريت  على الاميل بس 

وكمان على الجوال بيبعتوا رسالة...................! 

وبقولوا ابعتها لعشرة أشخاص بتعرفن وإذا مابتبعتها يا ويلك 
فإذ كل رسالة بـ 8 وحدات صار المجموع 80 وحدة 

يعني ماحدا كسبان غير الشركة 


على كل حال الله يعطيكي ألف عافية على الموضوع الحلو   

أنا من ناحيتي بس شوف هيك إيميل دغري بحذفو ومابقراه بنوب


وشو مشانك محمد

هيك طلع معك

اقتباس

وكمان على الجوال بيبعتوا رسالة...................! 

وبقولوا ابعتها لعشرة أشخاص بتعرفن وإذا مابتبعتها يا ويلك 
فإذ كل رسالة بـ 8 وحدات صار المجموع 80 وحدة 

يعني ماحدا كسبان غير الشركة 

هي إذا ماكانت الشركة هي يالي عما تروج لهيك رسائل

مزبوط متل ما عم تحكو أنو الشغلة فيها تعجيز بس كلو ادام العالم يعني منقاطع أمريكا بس على التلفزيون  وبالمظاهرات  بس  بعدين مننسى كل شي لأنو لكل وقت قانونو الخاص      مرة واحد طلع بالمظاهرة ومن كتر ما عصب حرق علم أمريكا وصار يدعس عليه بسباطو أام ألو رفيئوا دير بالك مشان مايحترق السباط  فرد عليه دغري لا تخاف سباطي أمريكي     
ومشان شغلة الايميلات لا تخافو كتير منها لأنو كلها خزعبلات

يا صديقة لا تهتمي بهي الشغلات
لان اغلبها حكي مو علمي وماله اساس من الصحة
ماعدا  الكاركاتير و كم  شغله كمان
ونحن مافينا انقاطع لان رح انصير من العالم الرابع مو التالت
وما في دوله ما بتدعم اسرائيل من الدول الغربيه
شو لازم نعمل

احلا شي الاميل تبع الشيخ احمد اللي شاف الرسول عليه الصلاة والسلام بمنامو

وخبرو انو القيامة قريبة ( كانو جاب شي جديد ) حفظتو غيب
وهاد الاميل اللي حكيتي عنو تبع القسم بيفلجني وبحس لو اللي بعتلي اياه جنبي لنتفتو

بس نسيتي تذكري الاميلات الدارجة هي الايام تبع صوت لنصرة الرسول وغرفة لسب النبي وسوف يحرق القران وشو بعرفني ( كل يوم سيرة مو جديدة بنوب )

هلئ الحل انك تقاطعي كل شي اجنبي وكلي شو ما بدك ( طبعا اذا لقيتي شي تاكليه بعدها)

غير الهوا اللي ذكرتيه سابقا