بالنسبة للجامعة فأنا يمكن كانت امي داعية علي وقت اللي دخلت عليها لهالجامعة و على الفرع..
أنا دارسة خارج سورية وبسبب انه  الجامعات كلها خاصة بالبلد اللي انا فيه وغلاء الاسعار
اضطررت ارجع لبلدي الام سوريا واللي والله لما كنت جاية عليه كنت حابة البلد وحابة اعيش بعيد عن جو العيلة و اعتمد على حالي وبالفعل سافرت وارتحت لانه كانت رغبتي اني سافر على الشام من وقت ما كنت صغيرة
المهم وبلا طول سيرة
بعد حذف العلامات بالمفاضلة ((الله يسامحهن)) ما عاد طلعلي الا اداب ومعاهد ومع انه بكالوريتي علمي
دخلت أدب انجليزي ولقيت انه أحسن شي من الخيارات المتاحة(( وانا ما بحب الفرع و لا بطيقوه)) و تسمى علي.... . 
طبعا بالاول كنت متشجعة اني صرت كبيرة وجامعة
اول شي بحب قول اني ما رح فكر مجرد فكرة انه اشتاق للجامعة
حدا بيشتاق للهم ؟؟
كنت مبسوطة انه رح يصيروا رفقاتي كلهن سوريين مو متل البلد اللي درست فيها من كل قطر اغنية
وبعد كل هالبسط ما لقيت و لا بنت بتستاهل انها تكون رفيقتي واكتشفت ان بالشام كل بنت همها مصلحتها وبس
وانا اللي عندي مفهوم الصداقة فوق كل شي!!!
بقى شو رأيكن؟
ومضت سنتين ما بعرف كيف و هلق صرت تالتة الحمدلله
و السنة الماضية وقبل الفحص لحتى تعرفت على مجموعة بنات وعرفت انه هي المجموعة تكونت من بنات ما لاقوا حدا يمشوا معي يعني متل حالي تمام ..

و هاد غير دكاترة الجامعة ((طبعا مو كلهن )) اللي بيفتحوا النفس عالدراسة..
اخ اخ 
قال متل ما بقولوا :

((متل السفرجل كل عضة بغصة))

وهاد راي بمنتهى بصراحة
و الحمدلله على كل حال

بتشكرك على الموضوع

akram1

     

Moutasem89  جوابك منطقي, ممكن نشتاق بالفعل.

white_hearts  الله يجيرك ويكون بعونك لكان. انشالله النحس يروح وتبلش ترتاح.

شكرا على الموضوع الحلو Ekram1
بصراحة هاد الموضوع فكرت فيه من أول ما دخلت على الجامعة و اتخرجت هالسنة
و بقدر قول إني رح اشتاق للجامعة و للمواد و الدراسة ...... أنا ما كنت أحضر بالجامعة لذلك ما بقدر إحكي عالرفقات و العالم اللي بالجامعة.....
بس بقدر قول أن في دكاترة كان إلهن وقع خاص على حياتي بالجامعة متل وضاح الخطيب و ندى زين الدين و جمانة الضحاك و حنان الغفري ...
بتخيل أن ما رح انسى فضل هالدكاترة على حياتي الجامعية و لهلأ بتمنى أقرأ محاضراتن ......
بس بتخيل أي حدا بيطلع من الجامعة أكيد رح يشتقلها مع كل التعب اللي كان فيها و مع كل شي واجهناه من متاعب بس مع ذلك رح اشتقلها ........
شكرا كتير عالموضوع عن جد موضوع حلو و بتمنى للجميع حياة جامعية موفقة و إن شاء الله عقبال التخرج للجميع .

اكرام شو هل الموضوع المتميز هذا جد بشكرك عليه وسلمت يداكي


بالنسبة الي اكيد رح اشتاق ايه انا داومت بالسنة الاولى بس الفصل الاول ولما صرت بلسنة التانية اشتقت للاول فكيف بدكن ياني مااشتاق

             


وخاصةانو انا هلق عم اشتغل بس كتتتتتتتتيرمشتاقة مشان هيك باذن الله السنة رح احضر وداوم


سلام وتحية للكل

nyno  يعني لا أحدبامكانه أن يعطينا نصيحة جيدة من تجربة سابقة, إلا أنتم المتخرجون, ولذا أثق بردك , وأرى أنه واقعي , من الممكن أن نشتاق للجامعة, ولكن بعد التخرّج, وإلى ذلك الوقت سيبق العذاب والدراسة وتعب وسهر الامتحانات هو ما يمثل الجامعة .  أظن أ كلامك منطقي حقيقي.

lovelyface خجليني , شكرا لك.
الحضور مهم لطلاب اللغة الفرنسية, وانشالله تتمتعي بالجامعة, ولا تكون عبء عليك
أتمنالك النجاح والتوفيق.
وكم وردة لك              

انا من جهتي ما رح اشتاق للجامعة

لأن الجامعة مو قبلاني تتخلى عني ولا بأي شكل ... يمكن هيي بتشتقلي


شكرا للموضوع

تقبل مروري     

انا بصراحة كنت كتير بحب الجامعة
و ماكنت صدق ايمتى يخلص الليل ميشان روح تاني يوم
حبيتها طبعا مو ميشان الدراسة و لا ميشان النظافة و القاعات المكيفة و الأدب يلي عم بشرشر من هالطلاب ( مو الكل)
حبيتها لاني فيها التقيت بانسان رائع و طاهر 
خلاني شوفها جنة
و صارت الجامعة بالنسبة الي جنينة التقي فيها بحبيبي 
بس يلي مالو حظ لا يتعب و لا يشقى
السنة التانية حمل حالو و سافر و تركني يا جماعة 
و من يومها صرت مالي قلب فوت عالجامعة و قصرت بدراستي كتير
بس الحمد لله مع الوقت الله عاني و نسيته لهال...............
و هي أنا هلأ رح اتخرج انشالله
و حالفة يمين بس اتخرج ما بقى فوت عهالجامعة يلي كانت  سبب يتعاستي و حزني.
و بنصح البنات الجداد ما يكونو ضحية لأي شب بهالجامعة لانو انا الله بحبني  و نفدت بقلب مكسور
أما غير بنات عم يخسرو كتييييير..........
فميشان هيك انا ابدا ابدا مارح اشتاق للآداب
باي

LOBNA  يعني انشالله تتخلى الجامعة عنك هاهاها بالتخرج

عليك بالصبر لبنى, كلنا ننتظر التخرج


amalalhendil  قصتك حزينة
الله لا يسامحو للخاين, بسيطة أخذت درس منها, وشكرا على النصيحة.

بس لا تكرهي الجامعة كرمال شخص ما بيسوى.

الله يعوضك بالانسان المناسب

عزيزتي بالتأكيد سيكون هناك حنين لا شك
بالرغم من كل السلبيات التي ذكرتها والتي واجهتني عندما كنت طالبا فيها
فالحنين لاصدقاء لا يثمنو بكنوز الدنيا و جلسات الاستراحة بين المحاضرات
واعود للتأكيد على الأصدقاء وخصوصا الآن كل واحد بدوله ( مغتربين )
ان شاء الله تتخرجو
وبتمنالك التوفيق
 

عبد, شكراً على الرد الواضح

أنا أفهم مشاعرك تجاه الكلية, خاصة وأنك  مجرب الموضوع, وأصدقائك المغتربين, بالتأكيد ستشتاق لهم.

أنا لا أريد أن أشتاق, ومع ذلك, قد أشتاق

وربما سأزور الجامعة بعد التخرج, وأحضر محاضرات في القسم, وأرثي لأمور الطلبة عندها.