صباح الخير
صدرت من كم يوم بس نتائج الثانوية العامة والكل صار يعرف انو المفاضلة العامة كمان صارت بمتناول الأيدي هلق ليش سموها مفاضلة طبعاً نحنا دائماً منحب نقلد غيرنا من دون مانعرف اذا هالشي بناسب مجتمعنا ولا لاء طيب كمان مو مهم لأنو صار وخلص بس لازم نعرف ياشباب ويا صبايا يلي حصلتو على الثانوية العامة هالسنة انو المفاضلة تعني مفاضلة الخيارات وبمعنى أدق الرغبات المفضلة ودائماً هالدول يلي نحنا عم نقلدها بتكون ناجحة بتجربتها بس برى فعلاً الطالب بختار رغباتو مو بيختار حسب علاماتو نحنا تربيتنا فرضت علينا أشياء غلط يعني رحوا اسألو أي طفل بالمدرسة شو بتحلم تصير بقول دكتور أو مهندس اشتهيت شي مرة شوف شي طالب قال بحب يصير مدرس أو ميكانيكي أو باحث فيزيائي أوأو .... يعني نحنا حشولنا راسنا بالدكتور والمهندس وخلونا نفكر حالنا فاشلين لأنو ماصرنا لا مهندسين ولا دكاترة هلق بتسألوني ليش كل هالمقدمات طيب رح قلكم أنو لازم كل واحد يسجل الفرع يلي بحبو موشرط يكون طب ولا هندسة!!! طيب البلد موبحاجة لفيزيائيين وكيميائيين وصناعيين وباحثين تاريخ وغيرو وغيراتو نحنا منعرف انو العلامات هي يلي بتحدد مصيرنا بس والله كمان نحنا فينا نحدد رأينا واختيارنا صحيح انو رسب يلي رسب ونجح يلي نجح وفي ناس جمعت علامات منيحة وفي ناس ماجمعت العلامات يلي بتخليها تسجل الفرع يلي بدها هوي بس نحنا هيك أفضل حل عنا للدخول للجامعات وإلا لو بدنا يخلونا على كيفنا كان كل الناس بتسجل طب هلق أنا نصيحتي الكم انو كل فروع الجامعات منيحة بس بشرط انو نحنا ننجح بعملنا ونتفوق بدراستنا ويلي بتفوق بالجامعة صدقوني درب السعادة والنجاح بكون قدامو هلق أنا مابدي شائمكم ولا بدي فائلكم بس لازم كل واحد يسجل الفرع يلي بحبو وبحس حالو انو بيبدع فيه طبعاً ضمن حدود علاماتو لأنو هيك القانون عناّ والحق علينا مو ع الوزارة لأنو نحنا هيك ربونا أهلينا وانتو هلق أول عمركن فايتين على حياة جديدة ونظام جديد وعلاقات جديدة خليكم عصريين بالفكر وخلي الأمل بعيونكم لأنو أيام الجامعة راح تصقلكم وتنمي فيكم أشياء جديدة ورح تنطفي أشياء أخرى للأبد خلو شعاركم نحنا منصنع الحياة من ماحل ما منكون والأبداع والتفوق بأي مجال بدنا ندخل عليه والله يوفقكم .........
حمادة